Senbi, 20 Şilde 2019
Qwyılsın köşiñ 5182 21 pikir 23 Säuir, 2019 sağat 19:56

Endi qazaq köşiniñ ekinşi "Altın däuiri" bastaladı

Sonımen, "Nur Otan" partiyasınıñ kezekten tıs ötken HİH S'ezinde Elbası Nwrswltan Nazarbaev kelesi prezident saylauına ümitker retinde Qasım-Jomart Kemelwlı Toqaevtıñ kandidaturasın wsındı.

S'ezde Wlt Köşbasşısı Nwrswltan Nazarbaevtıñ wsınısı ortağa qoyılğan soñ, Ädil Ahmet, Nwrlan Noğaev, Jaqsılıq Üşkempirov bastağan onşaqtı memleket jäne qoğam qayratkerleri söz söyledi. Söz ieleri jaña kandidat Qasım-Jomart Kemelwlınıñ qazirgi tañda eñ layıqtı kandidat ekenin tilge tiek etumen birge, Elbasımızdıñ Wlı eñbekteri turalı keñ kösilip söyledi. Ärkim öz salası boyınşa jetkizip ayttı.

Ärine, Täuelsiz Qazaqstandı qwru, bükil düniejüzine tanıtu jolındağı Elbası eñbegi bügingi bir s'ezdiñ ayasına sıyması anıq. Mäñgilik Elimizdiñ aldağı asar asuları men bağındırar biikterinde bolaşaq wrpaqtıñ auzımen añızğa bergisiz tarih bolıp mäñgi aytıla bereri dausız!

Endi prezidettikke kandidat Qasım-Jomart Kemelwlı Toqaevqa kelsek, söz joq, ol kisi bügingi tañda memleket basqaruğa eñ layıqtı twlğa.

Biz de öz tarapımızdan aytar bolsaq, Qasım-Jomart Kemelwlı Qazaqstan Respublikasınıñ Sırtqı ister ministri bolıp qızmet atqarğan twsta Elbası erte jolğa qoyğan köşi-qon sayasatınıñ öz deñgeyinde jüzege asırıluı üşin birqatar tiimdilikter jolğa qoyıldı. Sonıñ biri – şet elde twratın wltı qazaq adamdarğa Qazaqstanğa kelu üşin räsimdeletin vizannıñ konsuldıq alımdardan bosatıluı. Atalğan jeñildik sol kezdegi köşi-qon sayasatınıñ mañayında jürgen belsendi azamattardıñ biri aqın Almas Ahmetbekwlınıñ wsınısımen jüzege asqanın ayta ketuimiz kerek.

Ärine, atajwrtına kelgisi keletin ağayındar üşin bes-on teñgeniñ jarası jeñil. Qaytse de tabadı. Biraq onıñ moral'dıq jağın eskersek Qazaqstannıñ alıstağı ağayınğa degen kün nwrınday jıluın sezdiredi.

Köşi-qon sayasatın jolğa qoyıp, alıs-jaqın şetelderdegi qandastarımızdı Atajwrtına tartuda, basqa memleketterge qarağanda Şığıstağı körşimiz Qıtaymen til tabısıp, mämilege kelu oñayğa soqpağanı bärimizge belgili. Bwl taraptağı jwmıstardıñ maydan qılşıq suırğanday etilip dwrıs jolğa qoyıluı da Elbasımızdıñ bet-bedeli men ıqpalınıñ arqası ekenin biz jaqsı bilemiz. Al, ekinşi jağınan qıtay tilin jettik biletin Qasım-Jomart Toqaevtıñ da zor eñbegi bolğanın eşkim joqqa şığara alması anıq. Bwl mäseleniñ 1995 jıldıñ qırküyek ayındağı Elbasımızdıñ Qıtayğa jasağan saparı kezinde sol kezdegi Qıtay Halıq Respublikasınıñ Törağası Czyan Czemin'men kezdesui barısında oñ şeşim tapqanın Qasım-Jomart Kemelwlı öziniñ «Belasu» attı kölemdi eñbeginde «... degenmen, bwl mäsele jöninde de principti uağdalastıqqa qol jetkizdik: Qazaqstanğa twraqtı twruğa köşkisi keletin wltı qazaq QHR azamattarına Qıtay ükimeti tarapınan eşbir kedergi jasalmaydı. Bwl mañızdı kelisim Qıtaydan köşip kelem degen oralmandar sanın arttıra tüsuge järdemdeseri anıq» (Q.Toqaev, «Belasu» kitabı, 212-bet) dep jazadı.

Qasım-Jomart Toqaev Qazaqstan Respublikasınıñ Prem'er-ministri qızmetin atqarğan 1999- 2002 jıldar aralığında da qazaq köşi irkilgen emes. Mısalı, 1997-2001 jıldarı 82 335, 2002-2006 jıldarı 384 106 qandasımız Qazaqstağa oralğanın eske alsaq, bwl kezeñ – Qazaq köşiniñ «Altın däuiri» bolıp tarihqa qaldı.

Elbasımız özi bastap, aqsatpay alıp kele jatqan köşi-qon sayasatı Nwrswltan Nazarbaev prezidenttik ökilettigin toqtatqan soñ qalay bolar eken degen swraq alıstan kelgen ağayınnıñ är biriniñ tün wyqısın tört bölgeni şın.

Memleketşildik pen dästür sabaqtastığın tu etip wstağan jäne oğan degen qwrmeti men adaldığı şeksiz Qasım-Jomart Kemelwlı prezident retinde «Egemen Qazaqstan» men «Ayqın» gazetine bergen twñğış swqbatında bwl mäselege nükte qoydı. «Qoğamdıq pikirge qozğau salğan otandastar mäselesin qoldan sayasattandıruğa bolmaydı. Şeteldegi qandastarımızdı («oralman» degen sözge men qarsımın) Atamekenge qaytaru isi eşqaşan nazardan tıs qalğan emes, qalmaydı da. Älemniñ tükpir-tükpirindegi qandastarı­mızdıñ basın tuğan jerde biriktiru – bizdiñ parızımız» dedi, Qasım-Jomart Toqaev.

Prezident bwl sözin 2019 jığı 12 säuirdegi Mañğıstau öñirine jasağan saparı kezinde «Düniejüzindegi qandastarımızdıñ basın tuğan jerde biriktiru – bizdiñ qasietti parızımız» dep jwrt aldında tağı qaytaladı. Bwl jolı jay aytqan joq, «Qasietti» degen sözdi qosıp ayttı. «Bizdiñ qasietti parızımız» degen söylemge salmaq tüsirip ayttı.

Demek, «Nwrswltan bastağan Nwrlı köş» dästür sabaqtastığın üzbey öz jalğasın tabatın boldı. «Jalğasın tabatın boldı» degen jay söz, Alla qalasa, Qazaq köşiniñ «Ekinşi altın däuiri» bastalatınına meniñ senimim kämil!

Endi aldağı jerde prezidenttikke ümitker Qasım-Jomart Toqaevtıñ «Saylau ştabı» qwrılıp, respublika köleminde qoldau is-şaraları bastaladı. Osı jwmıs barısında qandastarımız tığız qonıstanğan öñirlerde köşi-qon sayasatınıñ tarihın, mañızın, jetistigin jan-jaqtılı tüsindiruimiz kerek. Jaña kandidattıñ wstanımın jüyeli jetkizgenimiz abzal!

Bwl – zañ şığaruşı organ men atqaruşı biliktiñ kezinde ketirgen qatelikteriniñ äserinen ağayındardıñ köñil tükpirinde qalğan reniş pen ökpe-nazdı juıp-şayudıñ, ornıqtılıq pen senim ornatudıñ tabılmas orayı.

Elbasımızdıñ qamqorlığınıñ arqasında Otanına oralıp, ösip-öngen qandastarı  "Nur Otan" partiyasınıñ kelesi prezidettikke Qasım-Jomart Toqaevtıñ kandidaturasın kandidat retinde wsınuın 100 payız dwrıs şeşim dep qoldaytınına meniñ kümänim joq!

Auıt Mwqibek

Nwr-Swltan qalası

Abai.kz

21 pikir