سونىمەن، "Nur Otan" پارتياسىنىڭ كەزەكتەن تىس وتكەن ءحىح سەزىندە ەلباسى نۇرسۇلتان نازارباەۆ كەلەسى پرەزيدەنت سايلاۋىنا ۇمىتكەر رەتىندە قاسىم-جومارت كەمەلۇلى توقاەۆتىڭ كانديداتۋراسىن ۇسىندى.

سەزدە ۇلت كوشباسشىسى نۇرسۇلتان نازارباەۆتىڭ ۇسىنىسى ورتاعا قويىلعان سوڭ، ءادىل احمەت، نۇرلان نوعاەۆ، جاقسىلىق ۇشكەمپىروۆ باستاعان ونشاقتى مەملەكەت جانە قوعام قايراتكەرلەرى ءسوز سويلەدى. ءسوز يەلەرى جاڭا كانديدات قاسىم-جومارت كەمەلۇلىنىڭ قازىرگى تاڭدا ەڭ لايىقتى كانديدات ەكەنىن تىلگە تيەك ەتۋمەن بىرگە، ەلباسىمىزدىڭ ۇلى ەڭبەكتەرى تۋرالى كەڭ كوسىلىپ سويلەدى. اركىم ءوز سالاسى بويىنشا جەتكىزىپ ايتتى.

ارينە، تاۋەلسىز قازاقستاندى قۇرۋ، بۇكىل دۇنيەجۇزىنە تانىتۋ جولىنداعى ەلباسى ەڭبەگى بۇگىنگى ءبىر سەزدىڭ اياسىنا سىيماسى انىق. ماڭگىلىك ەلىمىزدىڭ الداعى اسار اسۋلارى مەن باعىندىرار بيىكتەرىندە بولاشاق ۇرپاقتىڭ اۋزىمەن اڭىزعا بەرگىسىز تاريح بولىپ ماڭگى ايتىلا بەرەرى داۋسىز!

ەندى پرەزيدەتتىككە كانديدات قاسىم-جومارت كەمەلۇلى توقاەۆقا كەلسەك، ءسوز جوق، ول كىسى بۇگىنگى تاڭدا مەملەكەت باسقارۋعا ەڭ لايىقتى تۇلعا.

ءبىز دە ءوز تاراپىمىزدان ايتار بولساق، قاسىم-جومارت كەمەلۇلى قازاقستان رەسپۋبليكاسىنىڭ سىرتقى ىستەر ءمينيسترى بولىپ قىزمەت اتقارعان تۇستا ەلباسى ەرتە جولعا قويعان كوشى-قون ساياساتىنىڭ ءوز دەڭگەيىندە جۇزەگە اسىرىلۋى ءۇشىن بىرقاتار تيىمدىلىكتەر جولعا قويىلدى. سونىڭ ءبىرى – شەت ەلدە تۇراتىن ۇلتى قازاق ادامدارعا قازاقستانعا كەلۋ ءۇشىن راسىمدەلەتىن ۆيزاننىڭ كونسۋلدىق الىمداردان بوساتىلۋى. اتالعان جەڭىلدىك سول كەزدەگى كوشى-قون ساياساتىنىڭ ماڭايىندا جۇرگەن بەلسەندى ازاماتتاردىڭ ءبىرى اقىن الماس احمەتبەكۇلىنىڭ ۇسىنىسىمەن جۇزەگە اسقانىن ايتا كەتۋىمىز كەرەك.

ارينە، اتاجۇرتىنا كەلگىسى كەلەتىن اعايىندار ءۇشىن بەس-ون تەڭگەنىڭ جاراسى جەڭىل. قايتسە دە تابادى. بىراق ونىڭ مورالدىق جاعىن ەسكەرسەك قازاقستاننىڭ الىستاعى اعايىنعا دەگەن كۇن نۇرىنداي جىلۋىن سەزدىرەدى.

كوشى-قون ساياساتىن جولعا قويىپ، الىس-جاقىن شەتەلدەردەگى قانداستارىمىزدى اتاجۇرتىنا تارتۋدا، باسقا مەملەكەتتەرگە قاراعاندا شىعىستاعى كورشىمىز قىتايمەن ءتىل تابىسىپ، مامىلەگە كەلۋ وڭايعا سوقپاعانى بارىمىزگە بەلگىلى. بۇل تاراپتاعى جۇمىستاردىڭ مايدان قىلشىق سۋىرعانداي ەتىلىپ دۇرىس جولعا قويىلۋى دا ەلباسىمىزدىڭ بەت-بەدەلى مەن ىقپالىنىڭ ارقاسى ەكەنىن ءبىز جاقسى بىلەمىز. ال، ەكىنشى جاعىنان قىتاي ءتىلىن جەتتىك بىلەتىن قاسىم-جومارت توقاەۆتىڭ دا زور ەڭبەگى بولعانىن ەشكىم جوققا شىعارا الماسى انىق. بۇل ماسەلەنىڭ 1995 جىلدىڭ قىركۇيەك ايىنداعى ەلباسىمىزدىڭ قىتايعا جاساعان ساپارى كەزىندە سول كەزدەگى قىتاي حالىق رەسپۋبليكاسىنىڭ توراعاسى تسزيان تسزەمينمەن كەزدەسۋى بارىسىندا وڭ شەشىم تاپقانىن قاسىم-جومارت كەمەلۇلى ءوزىنىڭ «بەلاسۋ» اتتى كولەمدى ەڭبەگىندە «... دەگەنمەن، بۇل ماسەلە جونىندە دە ءپرينتسيپتى ۋاعدالاستىققا قول جەتكىزدىك: قازاقستانعا تۇراقتى تۇرۋعا كوشكىسى كەلەتىن ۇلتى قازاق قحر ازاماتتارىنا قىتاي ۇكىمەتى تاراپىنان ەشبىر كەدەرگى جاسالمايدى. بۇل ماڭىزدى كەلىسىم قىتايدان كوشىپ كەلەم دەگەن ورالماندار سانىن ارتتىرا تۇسۋگە جاردەمدەسەرى انىق» (ق.توقاەۆ، «بەلاسۋ» كىتابى، 212-بەت) دەپ جازادى.

قاسىم-جومارت توقاەۆ قازاقستان رەسپۋبليكاسىنىڭ پرەمەر-ءمينيسترى قىزمەتىن اتقارعان 1999- 2002 جىلدار ارالىعىندا دا قازاق كوشى ىركىلگەن ەمەس. مىسالى، 1997-2001 جىلدارى 82 335, 2002-2006 جىلدارى 384 106 قانداسىمىز قازاقستاعا ورالعانىن ەسكە الساق، بۇل كەزەڭ – قازاق كوشىنىڭ «التىن ءداۋىرى» بولىپ تاريحقا قالدى.

ەلباسىمىز ءوزى باستاپ، اقساتپاي الىپ كەلە جاتقان كوشى-قون ساياساتى نۇرسۇلتان نازارباەۆ پرەزيدەنتتىك وكىلەتتىگىن توقتاتقان سوڭ قالاي بولار ەكەن دەگەن سۇراق الىستان كەلگەن اعايىننىڭ ءار ءبىرىنىڭ ءتۇن ۇيقىسىن ءتورت بولگەنى شىن.

مەملەكەتشىلدىك پەن ءداستۇر ساباقتاستىعىن تۋ ەتىپ ۇستاعان جانە وعان دەگەن قۇرمەتى مەن ادالدىعى شەكسىز قاسىم-جومارت كەمەلۇلى پرەزيدەنت رەتىندە «ەگەمەن قازاقستان» مەن «ايقىن» گازەتىنە بەرگەن تۇڭعىش سۇقباتىندا بۇل ماسەلەگە نۇكتە قويدى. «قوعامدىق پىكىرگە قوزعاۋ سالعان وتانداستار ماسەلەسىن قولدان ساياساتتاندىرۋعا بولمايدى. شەتەلدەگى قانداستارىمىزدى («ورالمان» دەگەن سوزگە مەن قارسىمىن) اتامەكەنگە قايتارۋ ءىسى ەشقاشان نازاردان تىس قالعان ەمەس، قالمايدى دا. الەمنىڭ تۇكپىر-تۇكپىرىندەگى قانداستارى­مىزدىڭ باسىن تۋعان جەردە بىرىكتىرۋ – ءبىزدىڭ پارىزىمىز» دەدى، قاسىم-جومارت توقاەۆ.

پرەزيدەنت بۇل ءسوزىن 2019 جىعى 12 ساۋىردەگى ماڭعىستاۋ وڭىرىنە جاساعان ساپارى كەزىندە «دۇنيەجۇزىندەگى قانداستارىمىزدىڭ باسىن تۋعان جەردە بىرىكتىرۋ – ءبىزدىڭ قاسيەتتى پارىزىمىز» دەپ جۇرت الدىندا تاعى قايتالادى. بۇل جولى جاي ايتقان جوق، «قاسيەتتى» دەگەن ءسوزدى قوسىپ ايتتى. «ءبىزدىڭ قاسيەتتى پارىزىمىز» دەگەن سويلەمگە سالماق ءتۇسىرىپ ايتتى.

دەمەك، «نۇرسۇلتان باستاعان نۇرلى كوش» ءداستۇر ساباقتاستىعىن ۇزبەي ءوز جالعاسىن تاباتىن بولدى. «جالعاسىن تاباتىن بولدى» دەگەن جاي ءسوز، اللا قالاسا، قازاق كوشىنىڭ «ەكىنشى التىن ءداۋىرى» باستالاتىنىنا مەنىڭ سەنىمىم كامىل!

ەندى الداعى جەردە پرەزيدەنتتىككە ۇمىتكەر قاسىم-جومارت توقاەۆتىڭ «سايلاۋ شتابى» قۇرىلىپ، رەسپۋبليكا كولەمىندە قولداۋ ءىس-شارالارى باستالادى. وسى جۇمىس بارىسىندا قانداستارىمىز تىعىز قونىستانعان وڭىرلەردە كوشى-قون ساياساتىنىڭ تاريحىن، ماڭىزىن، جەتىستىگىن جان-جاقتىلى ءتۇسىندىرۋىمىز كەرەك. جاڭا كانديداتتىڭ ۇستانىمىن جۇيەلى جەتكىزگەنىمىز ابزال!

بۇل – زاڭ شىعارۋشى ورگان مەن اتقارۋشى بيلىكتىڭ كەزىندە كەتىرگەن قاتەلىكتەرىنىڭ اسەرىنەن اعايىنداردىڭ كوڭىل تۇكپىرىندە قالعان رەنىش پەن وكپە-نازدى جۋىپ-شايۋدىڭ، ورنىقتىلىق پەن سەنىم ورناتۋدىڭ تابىلماس ورايى.

ەلباسىمىزدىڭ قامقورلىعىنىڭ ارقاسىندا وتانىنا ورالىپ، ءوسىپ-ونگەن قانداستارى  "Nur Otan" پارتياسىنىڭ كەلەسى پرەزيدەتتىككە قاسىم-جومارت توقاەۆتىڭ كانديداتۋراسىن كانديدات رەتىندە ۇسىنۋىن 100 پايىز دۇرىس شەشىم دەپ قولدايتىنىنا مەنىڭ كۇمانىم جوق!

اۋىت مۇقيبەك

نۇر-سۇلتان قالاسى

Abai.kz