Beysenbi, 20 Mausım 2019
Arılu 1870 6 pikir 13 Mamır, 2019 sağat 14:44

Toqaev jürgizetin sayasat "änşilerdiñ selfiinen" salmaqtı boluı kerek

Elimizde QR Prezidenttigine ümitkerler 11-mamırdan bastap ügit-nasihat jwmısın bastadı. Äzirge, Ämirjan Qosanov Soltüstik auıldardı, Daniya Espaeva Almatınıñ qarapayım eñbek adamdarımen kezdesse, Sädibek Tügel tüngi klubtardı tügendep ketti. Al, Qasım-Jomart Kemelwlı Nur-Otan partiyasınıñ ökilderimen bas qostı.

Ayta ketu kerek, Nur-Otan - elimizdegi eñ köp müşesi bar partiya. Onıñ qwramında memlekettik qızmetkerler men elge belgili öner adamdarı bar. Sodan bolar Toqaev mırza ügit-nasihat dep asa äurelenip jatpağan siyaqtı. Öytkeni, partiya qwramındağı änşiler äleumettik jelidegi oqırmandarınıñ köptigin paydalanıp, özderiniñ qarqındı nasihatın bastap ketti.

Toqaev - ümitkerler işindegi eñ salmaqtı twlğa. Onıñ mıqtı kandidat ekenin Altınay Jorabaeva, Gülnwr Orazımbetova sekildilerge aytqızğannan Toqaevtiñ aynalasındağılar ne wtadı? Erteñ bükil bir memlekettiñ tizginin wstaytın kandidat turalı aytu qajet bolsa, auzında duası bar el ağaları aytsın. Äytpese, Jorabaevalarmen bir selfige tüsip, odan qırıp dauıs jinau degen qay kandidatqa bolsın abıroy äpermeydi.

Jasıratını joq, bizdiñ halıq qazir jañalıq aşqan ğalımdı nemese wrpaq igiligi üşin eñbek etip jürgen bilimdi azamattardı emes, änşilerdi jaqsı tanidı. Öytkeni qoğamdağı nasihat solay. Al, sol nasihattı jasap berip otırğan tağı özimiz. Bwl bilikke de tiimdi. Öytkeni, olarğa halıqtıñ ekonomikadan, sayasattan habardar bolğanı tiimsiz. Tipti, bizdiñ bilik osı uaqıtqa deyin eldiñ tağdırı şeşiler asa mañızdı kezeñderdi de änşilerdiñ köleñkesinde qaldıruğa tırısqan jağdaylar boldı. Solardıñ este qalğan ekeuin atap öteyik.

Birinşisi - 2016 jıldıñ mamır-mausım aylarında bükil halıq jerdi satu men şet eldikterge jalğa beruge qarsılıq tanıtıp, är qalada bas köterip jattı. Däl, sol sätte Bayan Maqsatqızınıñ otbasılıq janjalı şığıp, sayttardıñ basım köpşiligi jerden jeti qoyan tapqanday jarısa jazıp ketti. Bilik jer dauınan eldiñ nazarın basqa tarapqa bwrıp äketer jol tappay otırğanda Qwday töbeden tüskendey etip, Bayannıñ tağdırın "sıylay" saldı. Bwl ärine, ırıqsız bolğan oqiğa...

Ekinşi mısal – Töreğali Töreäliniñ dauı. Töreş tıñdarmanın zaldan quardan bwrın Dariğa Nazarbaevanıñ ofşorda atı atalıp, facebook belsendileri sol taqırıptı qauzay bastağan. Alayda, jan-jaqtan ağılğan Töreğali turalı aqparattar eriksiz sol taqırıpqa bwrıluğa mäjbür etti. Söytip, Töreğali dauınıñ arqasında Dariğa Nwrswltanqızınıñ şet elde bwğattalğan milliardtarı tağı da swrausız qaldı.

Qazir, instagram jelisindegi abıroy jazıluşınıñ sanımen ölşenedi. Onday abıroydan qazaq änşileri kende emes. Eñ kemi 1 millionnan astam adamı bar. Onı özderinşe “oqırman”  deydi. Olar oqırmanın: "Qazaqstannıñ är qalasındağı gostrol'dik saparlardan suretter. Jäne, “Aqtau, küt bizdi”, “Jañaözendikter keşke koncertte kezdeskenşe” degen sarındağı sözder; Är jwma sayın salınatın mübarak kartinalar. Jäne, “jwma qabıl bolsın” degen jazular (Erinbegeni wzaqtau etip, şükir men täubege şaqıratın post jazadı); Bir-biriniñ tuğan künimen qwttıqtau; Jarnama. Kiimge, sumkağa, tamaqqa t.b;" asıraydı.

Endi osınday "ğalamdıq mäselelerge" qwmartatın oqırmanğa änşiler bildey bolaşaq prezidenttiñ jarnamasın jasauğa köşkeni külkili emes pe?

Mwnı qoyşı, "jwldızdardıñ" deni qoğamdıq mäselelerge qatıstı swraqtarğa “men sayasatpen aralaspaymın” dep jauap beretin edi. Sayasat emes, qoğamdı alañdatqan mäselelerge azamattıq pikirin bildire almay jürgender endi eldiñ tañdauın şeşetin bolğanı qalay?

Tüyin

Bügingi qoğamda mıqtı ekonomika, sauattı sayasat bolmasa da, küni-tüni tınbaytın dañğaza äuender bar ekeni jasırın emes. Onıñ orındauşılarınıñ ömirin qalt jibermey qadağalap otıratın köpşilikti kinälauğa tağı kelmeydi. Biraq, ötkelde twrğan qazaq qoğamı arı qaray da osı ürdisti jalğastıratın bolsa, mwnıñ soñı jaqsılıqqa aparması anıq. Sondıqtan da, Toqaev jürgizetin sayasat änşilerdiñ selfiinen salmaqtıraq bolsa eken deymiz. Bar aytpağımız osı...

Nwrbike Bekswltanqızı

Abai.kz

6 pikir