ەلىمىزدە قر پرەزيدەنتتىگىنە ۇمىتكەرلەر 11-مامىردان باستاپ ۇگىت-ناسيحات جۇمىسىن باستادى. ازىرگە، ءامىرجان قوسانوۆ سولتۇستىك اۋىلداردى، دانيا ەسپاەۆا الماتىنىڭ قاراپايىم ەڭبەك ادامدارىمەن كەزدەسسە، سادىبەك تۇگەل تۇنگى كلۋبتاردى تۇگەندەپ كەتتى. ال، قاسىم-جومارت كەمەلۇلى Nur-Otan پارتياسىنىڭ وكىلدەرىمەن باس قوستى.

ايتا كەتۋ كەرەك، Nur-Otan - ەلىمىزدەگى ەڭ كوپ مۇشەسى بار پارتيا. ونىڭ قۇرامىندا مەملەكەتتىك قىزمەتكەرلەر مەن ەلگە بەلگىلى ونەر ادامدارى بار. سودان بولار توقاەۆ مىرزا ۇگىت-ناسيحات دەپ اسا اۋرەلەنىپ جاتپاعان سياقتى. ويتكەنى، پارتيا قۇرامىنداعى انشىلەر الەۋمەتتىك جەلىدەگى وقىرماندارىنىڭ كوپتىگىن پايدالانىپ، وزدەرىنىڭ قارقىندى ناسيحاتىن باستاپ كەتتى.

توقاەۆ - ۇمىتكەرلەر ىشىندەگى ەڭ سالماقتى تۇلعا. ونىڭ مىقتى كانديدات ەكەنىن التىناي جوراباەۆا، گۇلنۇر ورازىمبەتوۆا سەكىلدىلەرگە ايتقىزعاننان توقاەۆتىڭ اينالاسىنداعىلار نە ۇتادى؟ ەرتەڭ بۇكىل ءبىر مەملەكەتتىڭ تىزگىنىن ۇستايتىن كانديدات تۋرالى ايتۋ قاجەت بولسا، اۋزىندا دۋاسى بار ەل اعالارى ايتسىن. ايتپەسە، جوراباەۆالارمەن ءبىر سەلفيگە ءتۇسىپ، ودان قىرىپ داۋىس جيناۋ دەگەن قاي كانديداتقا بولسىن ابىروي اپەرمەيدى.

جاسىراتىنى جوق، ءبىزدىڭ حالىق قازىر جاڭالىق اشقان عالىمدى نەمەسە ۇرپاق يگىلىگى ءۇشىن ەڭبەك ەتىپ جۇرگەن ءبىلىمدى ازاماتتاردى ەمەس، انشىلەردى جاقسى تانيدى. ويتكەنى قوعامداعى ناسيحات سولاي. ال، سول ناسيحاتتى جاساپ بەرىپ وتىرعان تاعى ءوزىمىز. بۇل بيلىككە دە ءتيىمدى. ويتكەنى، ولارعا حالىقتىڭ ەكونوميكادان، ساياساتتان حاباردار بولعانى ءتيىمسىز. ءتىپتى، ءبىزدىڭ بيلىك وسى ۋاقىتقا دەيىن ەلدىڭ تاعدىرى شەشىلەر اسا ماڭىزدى كەزەڭدەردى دە انشىلەردىڭ كولەڭكەسىندە قالدىرۋعا تىرىسقان جاعدايلار بولدى. سولاردىڭ ەستە قالعان ەكەۋىن اتاپ وتەيىك.

ءبىرىنشىسى - 2016 جىلدىڭ مامىر-ماۋسىم ايلارىندا بۇكىل حالىق جەردى ساتۋ مەن شەت ەلدىكتەرگە جالعا بەرۋگە قارسىلىق تانىتىپ، ءار قالادا باس كوتەرىپ جاتتى. ءدال، سول ساتتە بايان ماقساتقىزىنىڭ وتباسىلىق جانجالى شىعىپ، سايتتاردىڭ باسىم كوپشىلىگى جەردەن جەتى قويان تاپقانداي جارىسا جازىپ كەتتى. بيلىك جەر داۋىنان ەلدىڭ نازارىن باسقا تاراپقا بۇرىپ اكەتەر جول تاپپاي وتىرعاندا قۇداي توبەدەن تۇسكەندەي ەتىپ، باياننىڭ تاعدىرىن "سىيلاي" سالدى. بۇل ارينە، ىرىقسىز بولعان وقيعا...

ەكىنشى مىسال – تورەعالي تورەالىنىڭ داۋى. تورەش تىڭدارمانىن زالدان قۋاردان بۇرىن داريعا نازارباەۆانىڭ وفشوردا اتى اتالىپ، facebook بەلسەندىلەرى سول تاقىرىپتى قاۋزاي باستاعان. الايدا، جان-جاقتان اعىلعان تورەعالي تۋرالى اقپاراتتار ەرىكسىز سول تاقىرىپقا بۇرىلۋعا ءماجبۇر ەتتى. ءسويتىپ، تورەعالي داۋىنىڭ ارقاسىندا داريعا نۇرسۇلتانقىزىنىڭ شەت ەلدە بۇعاتتالعان ميللياردتارى تاعى دا سۇراۋسىز قالدى.

قازىر، ينستاگرام جەلىسىندەگى ابىروي جازىلۋشىنىڭ سانىمەن ولشەنەدى. ونداي ابىرويدان قازاق انشىلەرى كەندە ەمەس. ەڭ كەمى 1 ميلليوننان استام ادامى بار. ونى وزدەرىنشە “وقىرمان”  دەيدى. ولار وقىرمانىن: "قازاقستاننىڭ ءار قالاسىنداعى گوسترولدىك ساپارلاردان سۋرەتتەر. جانە، “اقتاۋ، كۇت ءبىزدى”، “جاڭاوزەندىكتەر كەشكە كونتسەرتتە كەزدەسكەنشە” دەگەن سارىنداعى سوزدەر; ءار جۇما سايىن سالىناتىن مۇباراك كارتينالار. جانە، “جۇما قابىل بولسىن” دەگەن جازۋلار (ەرىنبەگەنى ۇزاقتاۋ ەتىپ، شۇكىر مەن تاۋبەگە شاقىراتىن پوست جازادى); ءبىر-ءبىرىنىڭ تۋعان كۇنىمەن قۇتتىقتاۋ; جارناما. كيىمگە، سۋمكاعا، تاماققا ت.ب;" اسىرايدى.

ەندى وسىنداي "عالامدىق ماسەلەلەرگە" قۇمارتاتىن وقىرمانعا انشىلەر بىلدەي بولاشاق پرەزيدەنتتىڭ جارناماسىن جاساۋعا كوشكەنى كۇلكىلى ەمەس پە؟

مۇنى قويشى، "جۇلدىزداردىڭ" دەنى قوعامدىق ماسەلەلەرگە قاتىستى سۇراقتارعا “مەن ساياساتپەن ارالاسپايمىن” دەپ جاۋاپ بەرەتىن ەدى. ساياسات ەمەس، قوعامدى الاڭداتقان ماسەلەلەرگە ازاماتتىق پىكىرىن بىلدىرە الماي جۇرگەندەر ەندى ەلدىڭ تاڭداۋىن شەشەتىن بولعانى قالاي؟

ءتۇيىن

بۇگىنگى قوعامدا مىقتى ەكونوميكا، ساۋاتتى ساياسات بولماسا دا، كۇنى-ءتۇنى تىنبايتىن داڭعازا اۋەندەر بار ەكەنى جاسىرىن ەمەس. ونىڭ ورىنداۋشىلارىنىڭ ءومىرىن قالت جىبەرمەي قاداعالاپ وتىراتىن كوپشىلىكتى كىنالاۋعا تاعى كەلمەيدى. بىراق، وتكەلدە تۇرعان قازاق قوعامى ارى قاراي دا وسى ءۇردىستى جالعاستىراتىن بولسا، مۇنىڭ سوڭى جاقسىلىققا اپارماسى انىق. سوندىقتان دا، توقاەۆ جۇرگىزەتىن ساياسات انشىلەردىڭ سەلفيىنەن سالماقتىراق بولسا ەكەن دەيمىز. بار ايتپاعىمىز وسى...

نۇربيكە بەكسۇلتانقىزى

Abai.kz