Jaqynda ataqty Forbes basylymy songhy bir jylda eng kóp tabys tapqan sportshylardyng tizimin jariyalady. Búl tizimge qazaqstandyq boksshy Gennadiy Golovkiyn  de endi. GGG atanghan otandasymyz әlemdegi eng tabysty sportshylardyng ishinde 95-shi oryngha jayghasqan. Jalpy tabysy 25,5 million dollar mólsherinde.

Al Golovkinning kóne qarsylasy meksikalyq Sauli Alivares 94 million dollargha qaltasyn qalyndatyp, 4-shi oryngha taban tiregen. Osylaysha, «Kanelo» songhy bir jylda eng kóp tabys tapqan boksshy atandy. Ayta keterligi, búl tizimde bir jylda 127 mln dollar tabys tapqan argentinalyq futbolshy Lioneli Messy kósh bastap túr.

Golovkin búl somanyng kóbin 9 mausym kýni ótken Stiv Rollsqa qarsy jekpe-jegi ýshin aldy. Aqparat qúraldarynyng jazuynsha, Golovkin búl kezdesuden 2 mln dollar gonorar alghan. Al su jana seriktesi DAZN platformasynan alatyn syiaqyny qosqanda 15 mln tabys tapqan. Osy orayda otandasymyzdyng búghan deyin AQSh jerinde ótkizgen әr kezdesui ýshin qansha tabys tapqany turaly mәlimetterding basyn qosudy jón kórip otyrmyz.

Orta salmaqta WBC, WBA (Super), IBF jәne IBO tújyrymdary boyynsha búrynghy әlem chempiony Gennadiy Golovkin (39-1-1, 35 KO) boks әleminde óz qoltanbasyn qaldyrghan boksshylardyng biri. Búl jayly «Golovkinning boks tarihynda alatyn orny qanday?» degen taqyryppen jazghan edik.

Gennadiyding 20 tituldy jekpe-jekte jenilmegenin ýlken jetistik retinde baghalaugha bolady. Búnyng ishinde 18 kezdesudi nokautpen ayaqtaghan. Osylaysha, chempiondyq ataq ýshin ótken jekpe-jekte nokautpen jeniske jetu kórsetkishi 90%-gha jetti. Búl kórsetkish boyynsha orta salmaqta Marvin Haglerge (92%) ghana ese jiberip túr.

Búghan qosa, Golovkinning 23 jekpe-jek qatarynan qarsylastaryn merziminen búryn jenip, rekord ornatqany taghy bar. Sonymen qatar, GGG maqtanatyn taghy bir kórsetkish: onyng barlyq jekpe-jekterinde nokautpen jeniske jetu salystyrmasy óte joghary - 85% (41 jekpe-jek, 39 jenis, onyng 35-i nokautpen). Orta salmaqta búl eng ýzdik kórsetkish sanalady.

Solay bola túra otandasymyz úzaq jyldar boyy asa qomaqty gonorar ala almady. GGG-ge boks jankýierlerining kónilin kótergeni ýshin tólenetin syiaqy Miygeli Kotto, Feliks Trinidad syndy boksshylardan әldeqayda az. Búl jerde Floyd Meyvezer, Menny Pakiyao sekildi kәsipqoy bokstyng «akulalary» alatyn gonorarmen salystyryp jatudyng ózi artyq.

Golovkinning boks mәneri myqty, nәtiyjesi kórnekti, imidji jaghymdy, qiytúrqy әreketterden aulaq. Biraq Meyvezer, Pakiyaolarday qúny nege qymbat emes? Búl jerde GGG qazaqstandyq bolghany ýshin AQSh-ta qoldaugha bólene almay jýr deuding esh jóni joq. Sebebi, ukrainalyq Vasiýliy Lomachénko, biz esimin qaytalap aityp otyrghan Filippin boksshysy Pakiyaolar amerikalyqtardyng sýiiktisine ainalghaly qashan?!

Kәsipqoy bokstyng bir atauy biznes ekenin ekining biri biledi. Endeshe, boksshy biylet satyp arenany toltyra almasa, nemese aqyly (PPV) translyasiya arqyly kórermen jinay almasa, oghan tólenetin gonorar kólemi kóp bolmaydy. Birinshiden, bizding Golovkinning boks keshinde biylet qúny arzan. Ekinshiden, ol PPV-translyasiyasynyng naghyz júldyzy sanalmaydy. Anyghyraq aitsaq, Golovkinning jekpe-jegi HBO PPV arnasynan alghash ret 2015 jyly 17 qarashada ghana kórsetildi (qarsylasy - David Lemie).

Golovkin 18 tituldy jekpe-jegin nokautpen ayaqtady dep otyrmyz. Alayda, nazar salyp qaraghan adam atalghan qarsylastardyng aitalyqtay myqty emes ekenin angharady. Búl 18 boksshynyng 4-inde ghana әlem chempiony nemese búrynghy әlem chempiony ataghy boldy.

Atap aitqanda Kassim Ouma (sol kezdegi kórsetkishi 27-7-1KO) men Deniel Gil (sol kezde 30-2-16KO) búrynyghy әlem chempiondary bolatyn. Al Kell Bruk (36-0) eki salmaq tómen - 147 funtta chempion atanghan. IBF chempiony David Lemie (34-2) - bos túrghan chempiondyq beldikke ie bolghan adam. Demek bizding GGG birde-bir beli myqty әlem chempionyn taghynan taydyrghan joq degen sóz. Sol ýshin de otandasymyz ýsh birdey iri chempiondyq tituldy iyemdense de, alatyn gonorary azyraq bolyp jýrdi.

Osy jerde sózdi sәl erterekten bastaugha tura keledi. Golovkin 2006 jyly kәsipqoy boksqa auysqan bette AQSh-qa attanghan joq. Qayta Germaniya jerinde «Universum Box Promotion» promouterlik kompaniyasymen júmys istep jýrdi. Nemis jerinde alghashqy segiz jekpe-jegin qatarynan merzimnen búryn ayaqtady. Gabor Balog, Sergey Navarka, Siliven Gomiys, Saymon Mokoena sekildi boksshylardy qúm toltyrghan qapshyqtay tómpeshtedi deuge bolady. Tek 9-shy kezdesuinde ghana fransiyalyq Mehdy Buadla 8 raund boyy Golovkinning soqqylaryna shydap baqty. Odan bólek, 11-shi jekpe-jekte kanadalyq Yan Gardner, 13-shi kezdesude aljirlik Amar Amary 8 raund boyy nokautqa týspey, úpay sanymen jenildi.

Al osydan keyin biz aitqan 23 jekpe-jekke sozylghan nokauttar legi bastaldy. Qazaqstandyq mashinanyng nokauttar seriyasyn tek 37-shi kezdesuinde Deniyel Djeykobs toqtatty. Amerikalyq 12 raundqa shydas bergenimen, bәribir jenilis tapty. Al 38 jәne 39-shy jekpe-jek Golovkin ýshin sәtti ayaqtalghan joq. Birinde teng týsip, birinde jenilis tapty. Búl eki nәtiyje de Sauli Alivareske qarsy kezdesulerde tirkeldi.

Alghashqy on segiz kezdesuining bireuin Daniyada, qalghanyn Germaniyada ótkizgen Golovkin qaryq qyp gonorar alghan joq. Osydan keyin, 2010 jyly ghana múhit asyp, kәsipqoy bokstyng otanyna taban tiredi. Sol elding «K2 Promotions» promouterlik kompaniyasymen kelisimshart jasasty. Ári danqty mansabyn da osynda jasady.

Biraq otandasymyz AQSh-qa bara sala mayly shelpekten dәm tata alghan joq. Amerika naryghyn ashu onaygha soqpady. Alghashqy jyldary jýz myndyqtardyng ózin ýlken tabys sanap jýrdi. Tek WBA núsqasy boyynsha túraqty chempion, IBO tújyrymy boyynsha chempion atanghannan keyin ghana birneshe jýz myng dollarmen jýzdese bastady.

Mәselen, 2013 jyly amerikalyq Gabrieli Rosadogha (25-jekpe-jegi) qarsy ótken kezdesude 350 myng dollar tabys tapqan. Sol jyly ótken GGG - Matiu Maklin kezdesuinde tabys 350/300 myng bolsa, Kyortis Stiyvenspen ótken jekpe-jekte Golovkin 400 myn, qarsylasy 290 myng dollar aldy.

Arada bir jyl ótken song otandasymyzdyng tabysy kórnekti týrde jogharlady. Atap aitar bolsaq, 2014 jyldyng shildesinde australiyalyq Daniyeli Gilmen júdyryqtasqany ýshin 750 myng dollar aldy. Dәl osy Gil úzaq uaqyt boyy Golovkinmen kezdesuden qashqaqtap jýrgen bolatyn. Tipti, chempiondyq beldiginen de bas tartqan. Búl kezdesu ýshin Gil 600 myng aldy.

Sol jyly qazan aiynda meksikalyq Marko Antonio Rubiomen ringke shyqqany ýshin 900 myng dollar tabys tapty. Búl jekpe-jekte WBC tújyrymy boyynsha uaqytsha chempiondyq ataq sarapqa salynghan bolatyn. Soghan qaramastan meksikalyqqa búl jekpe-jekten bar bolghany 350 myng dollar búiyrdy.

Golovkinning alghash ret aqyly negizdegi (ppv) translyasiyagha ie bolghan jekpe-jegi — David Lemiege qarsy kezdesude otandasymyz 1,5 mln dollar tabys tapty. Ári IBF tújyrymy boyynsha chempiondyq beldikti jenip aldy. Al kanadalyq boksshy bir million dollar aldy. Búl kezde 14-shi mәrte chempiondyq jekpe-jegin ótkizgin GGG óz betinshe boks keshining biyletin sata alatyn birinshi dengeyli boksshygha ainalghan. Soghan say tabysy da arta týskenin bayqaugha bolady.

Osydan keyin amerikalyq Dominik Ueydpen kezdesude 2 mln dollar tabys tapty. Qarsylasyna 500 myng búiyrdy. Al Golovkinge deyin eshkimnen jenilmegen Kell Brukpen (36-0) kezdesude otandasymyz, tipti, 5 mln alatyn dengeyge de jetip qalghan edi.

Golovkiyn/Deniyel Djeykobs jekpe-jeginde gonorar 2,5/1,75 mln mólsherinde bólindi. Búghan PPV-translyasiyasynan týsetin tabysty qossaq, otandasymyzdyng syiaqysy taghy 30-40%-gha ósken boluy mýmkin.

Al Golovkin - Alivares jekpe-jegi jayly әngime bólek. Búl mýlde ózge dengeydegi kezdesu boldy. GGG búl keshten mansabynda tapqan jalpy tabysynan da kóp syiaqy aldy. 2017 jyly qyrkýiek aiynda ótken kezdesu ýshin qazaqstandyqqa 25 mln dollar tólendi. Al Sauli «Kanelo» Alivaresting tabysy búdan kem degende eki ese kóp boldy.

Golovkin «Kanelomen» revansh aldyndaghy «dene qyzdyru» jekpe-jeginde Vanes Martirosyandy ekinshi raundta úryp jyghyp, 2 million dollar kóleminde tabys tapty.

Al 2018 jyldyng qyrkýiek aiynda ótken Alivarespen ekinshi jekpe-jek Gennadiy ýshin eng tabysty kezdesu sanalady. Bir jyl búryn Alivaresting aitqanyna kóngen otandasymyz búl joly tabysty tendey bólemiz dep talap qoydy. Chempiondyq beldikting bәri ózinde bolghandyqtan búl talaby oryndy da edi. Biraq tabys bәribir teng bólingen joq. Taghy da Sauli sәl kóp aldy. Sonyng ózinde otandasymyz 40 mln dollar shamasynda tabysqa kenelgen kórinedi. Golovkin - Alivares revanshynyng HBO ppv arnasy arqyly kórilimi 1,1 mln-gha jetken eken.

Golovkinning songhy jekpe-jegi jayly jogharyda aittyq. Otandasymyz búl kezdesuden 2 mln dollar gonorargha resmy seriktesi DAZN platformasynan alatyn somany qosqanda 15 mln tabys tapty. Qarsylasy Stiv Rollstyng gonorary 300 myng dollar boldy.

Kәsipqoy boks әlemine ayaq basqan jyldardan beri Golovkinning qol jetkizgen tabysy jayly mәlimet osynday. Osy mәlimetterge qarap GGG-ding qúny tómen deu orynsyz ekenin bayqaugha bolady. AQSh-ta at-ataghy joq alghashqy jyldary birneshe jýz myn, al ataghy shygha bastaghanda 500 mynnan 1 mln shamasynda alyp jýrdi. Al keyin P4P reytingisinde óz orny bar boksshylarmen ótken kezdesulerinde birneshe million tabys tauyp otyrdy. Sol ýshin Golovkin ózining dengeyne say jәne qarylastarynyng qarymyna qaray gonorar alyp jýr deuge bolady.

Quanysh Qappas 

Abai.kz