Senbi, 14 Jeltoqsan 2019
Sañlaq 2753 9 pikir 15 Mausım, 2019 sağat 21:45

Golovkinniñ gonorarı nege az?

Jaqında ataqtı Forbes basılımı soñğı bir jılda eñ köp tabıs tapqan sportşılardıñ tizimin jariyaladı. Bwl tizimge qazaqstandıq boksşı Gennadiy Golovkin  de endi. GGG atanğan otandasımız älemdegi eñ tabıstı sportşılardıñ işinde 95-şi orınğa jayğasqan. Jalpı tabısı 25,5 million dollar mölşerinde.

Al Golovkinniñ köne qarsılası meksikalıq Saul' Al'vares 94 million dollarğa qaltasın qalıñdatıp, 4-şi orınğa taban tiregen. Osılayşa, «Kanelo» soñğı bir jılda eñ köp tabıs tapqan boksşı atandı. Ayta keterligi, bwl tizimde bir jılda 127 mln dollar tabıs tapqan argentinalıq futbolşı Lionel' Messi köş bastap twr.

Golovkin bwl somanıñ köbin 9 mausım küni ötken Stiv Rollsqa qarsı jekpe-jegi üşin aldı. Aqparat qwraldarınıñ jazuınşa, Golovkin bwl kezdesuden 2 mln dollar gonorar alğan. Al su jaña seriktesi DAZN platformasınan alatın sıyaqını qosqanda 15 mln tabıs tapqan. Osı orayda otandasımızdıñ bwğan deyin AQŞ jerinde ötkizgen är kezdesui üşin qanşa tabıs tapqanı turalı mälimetterdiñ basın qosudı jön körip otırmız.

Orta salmaqta WBC, WBA (Super), IBF jäne IBO twjırımdarı boyınşa bwrınğı älem çempionı Gennadiy Golovkin (39-1-1, 35 KO) boks äleminde öz qoltañbasın qaldırğan boksşılardıñ biri. Bwl jaylı «Golovkinniñ boks tarihında alatın ornı qanday?» degen taqırıppen jazğan edik.

Gennadiydiñ 20 tituldı jekpe-jekte jeñilmegenin ülken jetistik retinde bağalauğa boladı. Bwnıñ işinde 18 kezdesudi nokautpen ayaqtağan. Osılayşa, çempiondıq ataq üşin ötken jekpe-jekte nokautpen jeñiske jetu körsetkişi 90%-ğa jetti. Bwl körsetkiş boyınşa orta salmaqta Marvin Haglerge (92%) ğana ese jiberip twr.

Bwğan qosa, Golovkinniñ 23 jekpe-jek qatarınan qarsılastarın merziminen bwrın jeñip, rekord ornatqanı tağı bar. Sonımen qatar, GGG maqtanatın tağı bir körsetkiş: onıñ barlıq jekpe-jekterinde nokautpen jeñiske jetu salıstırması öte joğarı - 85% (41 jekpe-jek, 39 jeñis, onıñ 35-i nokautpen). Orta salmaqta bwl eñ üzdik körsetkiş sanaladı.

Solay bola twra otandasımız wzaq jıldar boyı asa qomaqtı gonorar ala almadı. GGG-ge boks janküyerleriniñ köñilin kötergeni üşin tölenetin sıyaqı Migel' Kotto, Feliks Trinidad sındı boksşılardan äldeqayda az. Bwl jerde Floyd Meyvezer, Menni Pak'yao sekildi käsipqoy bokstıñ «akulaları» alatın gonorarmen salıstırıp jatudıñ özi artıq.

Golovkinniñ boks mäneri mıqtı, nätijesi körnekti, imidji jağımdı, qitwrqı äreketterden aulaq. Biraq Meyvezer, Pak'yaolarday qwnı nege qımbat emes? Bwl jerde GGG qazaqstandıq bolğanı üşin AQŞ-ta qoldauğa bölene almay jür deudiñ eş jöni joq. Sebebi, ukrainalıq Vasíliy Lomaçénko, biz esimin qaytalap aytıp otırğan Filippin boksşısı Pak'yaolar amerikalıqtardıñ süyiktisine aynalğalı qaşan?!

Käsipqoy bokstıñ bir atauı biznes ekenin ekiniñ biri biledi. Endeşe, boksşı bilet satıp arenanı toltıra almasa, nemese aqılı (PPV) translyaciya arqılı körermen jinay almasa, oğan tölenetin gonorar kölemi köp bolmaydı. Birinşiden, bizdiñ Golovkinniñ boks keşinde bilet qwnı arzan. Ekinşiden, ol PPV-translyaciyasınıñ nağız jwldızı sanalmaydı. Anığıraq aytsaq, Golovkinniñ jekpe-jegi HBO PPV arnasınan alğaş ret 2015 jılı 17 qaraşada ğana körsetildi (qarsılası - David Lem'e).

Golovkin 18 tituldı jekpe-jegin nokautpen ayaqtadı dep otırmız. Alayda, nazar salıp qarağan adam atalğan qarsılastardıñ aytalıqtay mıqtı emes ekenin añğaradı. Bwl 18 boksşınıñ 4-inde ğana älem çempionı nemese bwrınğı älem çempionı atağı boldı.

Atap aytqanda Kassim Ouma (sol kezdegi körsetkişi 27-7-1KO) men Deniel Gil (sol kezde 30-2-16KO) bwrınığı älem çempiondarı bolatın. Al Kell Bruk (36-0) eki salmaq tömen - 147 funtta çempion atanğan. IBF çempionı David Lem'e (34-2) - bos twrğan çempiondıq beldikke ie bolğan adam. Demek bizdiñ GGG birde-bir beli mıqtı älem çempionın tağınan taydırğan joq degen söz. Sol üşin de otandasımız üş birdey iri çempiondıq tituldı iemdense de, alatın gonorarı azıraq bolıp jürdi.

Osı jerde sözdi säl erterekten bastauğa tura keledi. Golovkin 2006 jılı käsipqoy boksqa auısqan bette AQŞ-qa attanğan joq. Qayta Germaniya jerinde «Universum Box Promotion» promouterlik kompaniyasımen jwmıs istep jürdi. Nemis jerinde alğaşqı segiz jekpe-jegin qatarınan merzimnen bwrın ayaqtadı. Gabor Balog, Sergey Navarka, Sil'ven Gomis, Saymon Mokoena sekildi boksşılardı qwm toltırğan qapşıqtay tömpeştedi deuge boladı. Tek 9-şı kezdesuinde ğana franciyalıq Mehdi Buadla 8 raund boyı Golovkinniñ soqqılarına şıdap baqtı. Odan bölek, 11-şi jekpe-jekte kanadalıq YAn Gardner, 13-şi kezdesude aljirlik Amar Amari 8 raund boyı nokautqa tüspey, wpay sanımen jeñildi.

Al osıdan keyin biz aytqan 23 jekpe-jekke sozılğan nokauttar legi bastaldı. Qazaqstandıq maşinanıñ nokauttar seriyasın tek 37-şi kezdesuinde Deniel Djeykobs toqtattı. Amerikalıq 12 raundqa şıdas bergenimen, bäribir jeñilis taptı. Al 38 jäne 39-şı jekpe-jek Golovkin üşin sätti ayaqtalğan joq. Birinde teñ tüsip, birinde jeñilis taptı. Bwl eki nätije de Saul' Al'vareske qarsı kezdesulerde tirkeldi.

Alğaşqı on segiz kezdesuiniñ bireuin Daniyada, qalğanın Germaniyada ötkizgen Golovkin qarıq qıp gonorar alğan joq. Osıdan keyin, 2010 jılı ğana mwhit asıp, käsipqoy bokstıñ otanına taban tiredi. Sol eldiñ «K2 Promotions» promouterlik kompaniyasımen kelisimşart jasastı. Äri dañqtı mansabın da osında jasadı.

Biraq otandasımız AQŞ-qa bara sala maylı şelpekten däm tata alğan joq. Amerika narığın aşu oñayğa soqpadı. Alğaşqı jıldarı jüz mıñdıqtardıñ özin ülken tabıs sanap jürdi. Tek WBA nwsqası boyınşa twraqtı çempion, IBO twjırımı boyınşa çempion atanğannan keyin ğana birneşe jüz mıñ dollarmen jüzdese bastadı.

Mäselen, 2013 jılı amerikalıq Gabriel' Rosadoğa (25-jekpe-jegi) qarsı ötken kezdesude 350 mıñ dollar tabıs tapqan. Sol jılı ötken GGG - Mat'yu Maklin kezdesuinde tabıs 350/300 mıñ bolsa, Kertis Stivenspen ötken jekpe-jekte Golovkin 400 mıñ, qarsılası 290 mıñ dollar aldı.

Arada bir jıl ötken soñ otandasımızdıñ tabısı körnekti türde joğarladı. Atap aytar bolsaq, 2014 jıldıñ şildesinde australiyalıq Daniel' Gilmen jwdırıqtasqanı üşin 750 mıñ dollar aldı. Däl osı Gil wzaq uaqıt boyı Golovkinmen kezdesuden qaşqaqtap jürgen bolatın. Tipti, çempiondıq beldiginen de bas tartqan. Bwl kezdesu üşin Gil 600 mıñ aldı.

Sol jılı qazan ayında meksikalıq Marko Antonio Rubiomen ringke şıqqanı üşin 900 mıñ dollar tabıs taptı. Bwl jekpe-jekte WBC twjırımı boyınşa uaqıtşa çempiondıq ataq sarapqa salınğan bolatın. Soğan qaramastan meksikalıqqa bwl jekpe-jekten bar bolğanı 350 mıñ dollar bwyırdı.

Golovkinniñ alğaş ret aqılı negizdegi (ppv) translyaciyağa ie bolğan jekpe-jegi — David Lem'ege qarsı kezdesude otandasımız 1,5 mln dollar tabıs taptı. Äri IBF twjırımı boyınşa çempiondıq beldikti jeñip aldı. Al kanadalıq boksşı bir million dollar aldı. Bwl kezde 14-şi märte çempiondıq jekpe-jegin ötkizgin GGG öz betinşe boks keşiniñ biletin sata alatın birinşi deñgeyli boksşığa aynalğan. Soğan say tabısı da arta tüskenin bayqauğa boladı.

Osıdan keyin amerikalıq Dominik Ueydpen kezdesude 2 mln dollar tabıs taptı. Qarsılasına 500 mıñ bwyırdı. Al Golovkinge deyin eşkimnen jeñilmegen Kell Brukpen (36-0) kezdesude otandasımız, tipti, 5 mln alatın deñgeyge de jetip qalğan edi.

Golovkin/Deniel Djeykobs jekpe-jeginde gonorar 2,5/1,75 mln mölşerinde bölindi. Bwğan PPV-translyaciyasınan tüsetin tabıstı qossaq, otandasımızdıñ sıyaqısı tağı 30-40%-ğa ösken boluı mümkin.

Al Golovkin - Al'vares jekpe-jegi jaylı äñgime bölek. Bwl mülde özge deñgeydegi kezdesu boldı. GGG bwl keşten mansabında tapqan jalpı tabısınan da köp sıyaqı aldı. 2017 jılı qırküyek ayında ötken kezdesu üşin qazaqstandıqqa 25 mln dollar tölendi. Al Saul' «Kanelo» Al'varestiñ tabısı bwdan kem degende eki ese köp boldı.

Golovkin «Kanelomen» revanş aldındağı «dene qızdıru» jekpe-jeginde Vanes Martirosyandı ekinşi raundta wrıp jığıp, 2 million dollar köleminde tabıs taptı.

Al 2018 jıldıñ qırküyek ayında ötken Al'varespen ekinşi jekpe-jek Gennadiy üşin eñ tabıstı kezdesu sanaladı. Bir jıl bwrın Al'varestiñ aytqanına köngen otandasımız bwl jolı tabıstı teñdey bölemiz dep talap qoydı. Çempiondıq beldiktiñ bäri özinde bolğandıqtan bwl talabı orındı da edi. Biraq tabıs bäribir teñ bölingen joq. Tağı da Saul' säl köp aldı. Sonıñ özinde otandasımız 40 mln dollar şamasında tabısqa kenelgen körinedi. Golovkin - Al'vares revanşınıñ HBO ppv arnası arqılı körilimi 1,1 mln-ğa jetken eken.

Golovkinniñ soñğı jekpe-jegi jaylı joğarıda ayttıq. Otandasımız bwl kezdesuden 2 mln dollar gonorarğa resmi seriktesi DAZN platformasınan alatın somanı qosqanda 15 mln tabıs taptı. Qarsılası Stiv Rollstıñ gonorarı 300 mıñ dollar boldı.

Käsipqoy boks älemine ayaq basqan jıldardan beri Golovkinniñ qol jetkizgen tabısı jaylı mälimet osınday. Osı mälimetterge qarap GGG-diñ qwnı tömen deu orınsız ekenin bayqauğa boladı. AQŞ-ta at-atağı joq alğaşqı jıldarı birneşe jüz mıñ, al atağı şığa bastağanda 500 mıñnan 1 mln şamasında alıp jürdi. Al keyin P4P reytingisinde öz ornı bar boksşılarmen ötken kezdesulerinde birneşe million tabıs tauıp otırdı. Sol üşin Golovkin öziniñ deñgeyne say jäne qarılastarınıñ qarımına qaray gonorar alıp jür deuge boladı.

Quanış Qappas 

Abai.kz

9 pikir