جەكسەنبى, 21 شىلدە 2019
ساڭلاق 2174 8 پىكىر 15 ماۋسىم, 2019 ساعات 21:45

گولوۆكيننىڭ گونورارى نەگە از؟

جاقىندا اتاقتى Forbes باسىلىمى سوڭعى ءبىر جىلدا ەڭ كوپ تابىس تاپقان سپورتشىلاردىڭ ءتىزىمىن جاريالادى. بۇل تىزىمگە قازاقستاندىق بوكسشى گەننادي گولوۆكين  دە ەندى. GGG اتانعان وتانداسىمىز الەمدەگى ەڭ تابىستى سپورتشىلاردىڭ ىشىندە 95-ءشى ورىنعا جايعاسقان. جالپى تابىسى 25,5 ميلليون دوللار مولشەرىندە.

ال گولوۆكيننىڭ كونە قارسىلاسى مەكسيكالىق ساۋل الۆارەس 94 ميلليون دوللارعا قالتاسىن قالىڭداتىپ، 4-ءشى ورىنعا تابان تىرەگەن. وسىلايشا، «كانەلو» سوڭعى ءبىر جىلدا ەڭ كوپ تابىس تاپقان بوكسشى اتاندى. ايتا كەتەرلىگى، بۇل تىزىمدە ءبىر جىلدا 127 ملن دوللار تابىس تاپقان ارگەنتينالىق فۋتبولشى ليونەل مەسسي كوش باستاپ تۇر.

گولوۆكين بۇل سومانىڭ كوبىن 9 ماۋسىم كۇنى وتكەن ستيۆ روللسقا قارسى جەكپە-جەگى ءۇشىن الدى. اقپارات قۇرالدارىنىڭ جازۋىنشا، گولوۆكين بۇل كەزدەسۋدەن 2 ملن دوللار گونورار العان. ال سۋ جاڭا سەرىكتەسى DAZN پلاتفورماسىنان الاتىن سىياقىنى قوسقاندا 15 ملن تابىس تاپقان. وسى ورايدا وتانداسىمىزدىڭ بۇعان دەيىن اقش جەرىندە وتكىزگەن ءار كەزدەسۋى ءۇشىن قانشا تابىس تاپقانى تۋرالى مالىمەتتەردىڭ باسىن قوسۋدى ءجون كورىپ وتىرمىز.

ورتا سالماقتا WBC, WBA (Super), IBF جانە IBO تۇجىرىمدارى بويىنشا بۇرىنعى الەم چەمپيونى گەننادي گولوۆكين (39-1-1, 35 كو) بوكس الەمىندە ءوز قولتاڭباسىن قالدىرعان بوكسشىلاردىڭ ءبىرى. بۇل جايلى «گولوۆكيننىڭ بوكس تاريحىندا الاتىن ورنى قانداي؟» دەگەن تاقىرىپپەن جازعان ەدىك.

گەنناديدىڭ 20 تيتۋلدى جەكپە-جەكتە جەڭىلمەگەنىن ۇلكەن جەتىستىك رەتىندە باعالاۋعا بولادى. بۇنىڭ ىشىندە 18 كەزدەسۋدى نوكاۋتپەن اياقتاعان. وسىلايشا، چەمپيوندىق اتاق ءۇشىن وتكەن جەكپە-جەكتە نوكاۋتپەن جەڭىسكە جەتۋ كورسەتكىشى 90%-عا جەتتى. بۇل كورسەتكىش بويىنشا ورتا سالماقتا مارۆين حاگلەرگە (92%) عانا ەسە جىبەرىپ تۇر.

بۇعان قوسا، گولوۆكيننىڭ 23 جەكپە-جەك قاتارىنان قارسىلاستارىن مەرزىمىنەن بۇرىن جەڭىپ، رەكورد ورناتقانى تاعى بار. سونىمەن قاتار، GGG ماقتاناتىن تاعى ءبىر كورسەتكىش: ونىڭ بارلىق جەكپە-جەكتەرىندە نوكاۋتپەن جەڭىسكە جەتۋ سالىستىرماسى وتە جوعارى - 85% (41 جەكپە-جەك، 39 جەڭىس، ونىڭ 35-ءى نوكاۋتپەن). ورتا سالماقتا بۇل ەڭ ۇزدىك كورسەتكىش سانالادى.

سولاي بولا تۇرا وتانداسىمىز ۇزاق جىلدار بويى اسا قوماقتى گونورار الا المادى. GGG-گە بوكس جانكۇيەرلەرىنىڭ كوڭىلىن كوتەرگەنى ءۇشىن تولەنەتىن سىياقى ميگەل كوتتو، فەليكس ترينيداد سىندى بوكسشىلاردان الدەقايدا از. بۇل جەردە فلويد مەيۆەزەر، مەنني پاكياو سەكىلدى كاسىپقوي بوكستىڭ «اكۋلالارى» الاتىن گونورارمەن سالىستىرىپ جاتۋدىڭ ءوزى ارتىق.

گولوۆكيننىڭ بوكس مانەرى مىقتى، ناتيجەسى كورنەكتى، ءيميدجى جاعىمدى، قيتۇرقى ارەكەتتەردەن اۋلاق. بىراق مەيۆەزەر، پاكياولارداي قۇنى نەگە قىمبات ەمەس؟ بۇل جەردە GGG قازاقستاندىق بولعانى ءۇشىن اقش-تا قولداۋعا بولەنە الماي ءجۇر دەۋدىڭ ەش ءجونى جوق. سەبەبى، ۋكراينالىق ۆاسي́لي لوماچە́نكو، ءبىز ەسىمىن قايتالاپ ايتىپ وتىرعان فيليپپين بوكسشىسى پاكياولار امەريكالىقتاردىڭ سۇيىكتىسىنە اينالعالى قاشان؟!

كاسىپقوي بوكستىڭ ءبىر اتاۋى بيزنەس ەكەنىن ەكىنىڭ ءبىرى بىلەدى. ەندەشە، بوكسشى بيلەت ساتىپ ارەنانى تولتىرا الماسا، نەمەسە اقىلى (PPV) ترانسلياتسيا ارقىلى كورەرمەن جيناي الماسا، وعان تولەنەتىن گونورار كولەمى كوپ بولمايدى. بىرىنشىدەن، ءبىزدىڭ گولوۆكيننىڭ بوكس كەشىندە بيلەت قۇنى ارزان. ەكىنشىدەن، ول PPV-ترانسلياتسياسىنىڭ ناعىز جۇلدىزى سانالمايدى. انىعىراق ايتساق، گولوۆكيننىڭ جەكپە-جەگى HBO PPV ارناسىنان العاش رەت 2015 جىلى 17 قاراشادا عانا كورسەتىلدى (قارسىلاسى - داۆيد لەمە).

گولوۆكين 18 تيتۋلدى جەكپە-جەگىن نوكاۋتپەن اياقتادى دەپ وتىرمىز. الايدا، نازار سالىپ قاراعان ادام اتالعان قارسىلاستاردىڭ ايتالىقتاي مىقتى ەمەس ەكەنىن اڭعارادى. بۇل 18 بوكسشىنىڭ 4-ىندە عانا الەم چەمپيونى نەمەسە بۇرىنعى الەم چەمپيونى اتاعى بولدى.

اتاپ ايتقاندا كاسسيم وۋما (سول كەزدەگى كورسەتكىشى 27-7-1كو) مەن دەنيەل گيل (سول كەزدە 30-2-16KO) بۇرىنىعى الەم چەمپيوندارى بولاتىن. ال كەلل برۋك (36-0) ەكى سالماق تومەن - 147 فۋنتتا چەمپيون اتانعان. IBF چەمپيونى داۆيد لەمە (34-2) - بوس تۇرعان چەمپيوندىق بەلدىككە يە بولعان ادام. دەمەك ءبىزدىڭ GGG بىردە-ءبىر بەلى مىقتى الەم چەمپيونىن تاعىنان تايدىرعان جوق دەگەن ءسوز. سول ءۇشىن دە وتانداسىمىز ءۇش بىردەي ءىرى چەمپيوندىق تيتۋلدى يەمدەنسە دە، الاتىن گونورارى ازىراق بولىپ ءجۇردى.

وسى جەردە ءسوزدى ءسال ەرتەرەكتەن باستاۋعا تۋرا كەلەدى. گولوۆكين 2006 جىلى كاسىپقوي بوكسقا اۋىسقان بەتتە اقش-قا اتتانعان جوق. قايتا گەرمانيا جەرىندە «Universum Box Promotion» پروموۋتەرلىك كومپانياسىمەن جۇمىس ىستەپ ءجۇردى. نەمىس جەرىندە العاشقى سەگىز جەكپە-جەگىن قاتارىنان مەرزىمنەن بۇرىن اياقتادى. گابور بالوگ، سەرگەي ناۆاركا، سيلۆەن گوميس، سايمون موكوەنا سەكىلدى بوكسشىلاردى قۇم تولتىرعان قاپشىقتاي تومپەشتەدى دەۋگە بولادى. تەك 9-شى كەزدەسۋىندە عانا فرانتسيالىق مەحدي بۋادلا 8 راۋند بويى گولوۆكيننىڭ سوققىلارىنا شىداپ باقتى. ودان بولەك، 11-ءشى جەكپە-جەكتە كانادالىق يان گاردنەر، 13-ءشى كەزدەسۋدە الجيرلىك امار اماري 8 راۋند بويى نوكاۋتقا تۇسپەي، ۇپاي سانىمەن جەڭىلدى.

ال وسىدان كەيىن ءبىز ايتقان 23 جەكپە-جەككە سوزىلعان نوكاۋتتار لەگى باستالدى. قازاقستاندىق ماشينانىڭ نوكاۋتتار سەرياسىن تەك 37-ءشى كەزدەسۋىندە دەنيەل دجەيكوبس توقتاتتى. امەريكالىق 12 راۋندقا شىداس بەرگەنىمەن، ءبارىبىر جەڭىلىس تاپتى. ال 38 جانە 39-شى جەكپە-جەك گولوۆكين ءۇشىن ءساتتى اياقتالعان جوق. بىرىندە تەڭ ءتۇسىپ، بىرىندە جەڭىلىس تاپتى. بۇل ەكى ناتيجە دە ساۋل الۆارەسكە قارسى كەزدەسۋلەردە تىركەلدى.

العاشقى ون سەگىز كەزدەسۋىنىڭ بىرەۋىن دانيادا، قالعانىن گەرمانيادا وتكىزگەن گولوۆكين قارىق قىپ گونورار العان جوق. وسىدان كەيىن، 2010 جىلى عانا مۇحيت اسىپ، كاسىپقوي بوكستىڭ وتانىنا تابان تىرەدى. سول ەلدىڭ «K2 Promotions» پروموۋتەرلىك كومپانياسىمەن كەلىسىمشارت جاساستى. ءارى داڭقتى مانسابىن دا وسىندا جاسادى.

بىراق وتانداسىمىز اقش-قا بارا سالا مايلى شەلپەكتەن ءدام تاتا العان جوق. امەريكا نارىعىن اشۋ وڭايعا سوقپادى. العاشقى جىلدارى ءجۇز مىڭدىقتاردىڭ ءوزىن ۇلكەن تابىس ساناپ ءجۇردى. تەك WBA نۇسقاسى بويىنشا تۇراقتى چەمپيون، IBO تۇجىرىمى بويىنشا چەمپيون اتانعاننان كەيىن عانا بىرنەشە ءجۇز مىڭ دوللارمەن جۇزدەسە باستادى.

ماسەلەن، 2013 جىلى امەريكالىق گابريەل روسادوعا (25-جەكپە-جەگى) قارسى وتكەن كەزدەسۋدە 350 مىڭ دوللار تابىس تاپقان. سول جىلى وتكەن GGG - ماتيۋ ماكلين كەزدەسۋىندە تابىس 350/300 مىڭ بولسا، كيورتيس ستيۆەنسپەن وتكەن جەكپە-جەكتە گولوۆكين 400 مىڭ، قارسىلاسى 290 مىڭ دوللار الدى.

ارادا ءبىر جىل وتكەن سوڭ وتانداسىمىزدىڭ تابىسى كورنەكتى تۇردە جوعارلادى. اتاپ ايتار بولساق، 2014 جىلدىڭ شىلدەسىندە اۋستراليالىق دانيەل گيلمەن جۇدىرىقتاسقانى ءۇشىن 750 مىڭ دوللار الدى. ءدال وسى گيل ۇزاق ۋاقىت بويى گولوۆكينمەن كەزدەسۋدەن قاشقاقتاپ جۇرگەن بولاتىن. ءتىپتى، چەمپيوندىق بەلدىگىنەن دە باس تارتقان. بۇل كەزدەسۋ ءۇشىن گيل 600 مىڭ الدى.

سول جىلى قازان ايىندا مەكسيكالىق ماركو انتونيو رۋبيومەن رينگكە شىققانى ءۇشىن 900 مىڭ دوللار تابىس تاپتى. بۇل جەكپە-جەكتە WBC تۇجىرىمى بويىنشا ۋاقىتشا چەمپيوندىق اتاق ساراپقا سالىنعان بولاتىن. سوعان قاراماستان مەكسيكالىققا بۇل جەكپە-جەكتەن بار بولعانى 350 مىڭ دوللار بۇيىردى.

گولوۆكيننىڭ العاش رەت اقىلى نەگىزدەگى (ppv) ترانسلياتسياعا يە بولعان جەكپە-جەگى — داۆيد لەمەگە قارسى كەزدەسۋدە وتانداسىمىز 1,5 ملن دوللار تابىس تاپتى. ءارى IBF تۇجىرىمى بويىنشا چەمپيوندىق بەلدىكتى جەڭىپ الدى. ال كانادالىق بوكسشى ءبىر ميلليون دوللار الدى. بۇل كەزدە 14-ءشى مارتە چەمپيوندىق جەكپە-جەگىن وتكىزگىن GGG ءوز بەتىنشە بوكس كەشىنىڭ بيلەتىن ساتا الاتىن ءبىرىنشى دەڭگەيلى بوكسشىعا اينالعان. سوعان ساي تابىسى دا ارتا تۇسكەنىن بايقاۋعا بولادى.

وسىدان كەيىن امەريكالىق دومينيك ۋەيدپەن كەزدەسۋدە 2 ملن دوللار تابىس تاپتى. قارسىلاسىنا 500 مىڭ بۇيىردى. ال گولوۆكينگە دەيىن ەشكىمنەن جەڭىلمەگەن كەلل برۋكپەن (36-0) كەزدەسۋدە وتانداسىمىز، ءتىپتى، 5 ملن الاتىن دەڭگەيگە دە جەتىپ قالعان ەدى.

گولوۆكين/دەنيەل دجەيكوبس جەكپە-جەگىندە گونورار 2,5/1,75 ملن مولشەرىندە ءبولىندى. بۇعان PPV-ترانسلياتسياسىنان تۇسەتىن تابىستى قوسساق، وتانداسىمىزدىڭ سىياقىسى تاعى 30-40%-عا وسكەن بولۋى مۇمكىن.

ال گولوۆكين - الۆارەس جەكپە-جەگى جايلى اڭگىمە بولەك. بۇل مۇلدە وزگە دەڭگەيدەگى كەزدەسۋ بولدى. GGG بۇل كەشتەن مانسابىندا تاپقان جالپى تابىسىنان دا كوپ سىياقى الدى. 2017 جىلى قىركۇيەك ايىندا وتكەن كەزدەسۋ ءۇشىن قازاقستاندىققا 25 ملن دوللار تولەندى. ال ساۋل «كانەلو» الۆارەستىڭ تابىسى بۇدان كەم دەگەندە ەكى ەسە كوپ بولدى.

گولوۆكين «كانەلومەن» رەۆانش الدىنداعى «دەنە قىزدىرۋ» جەكپە-جەگىندە ۆانەس مارتيروسياندى ەكىنشى راۋندتا ۇرىپ جىعىپ، 2 ميلليون دوللار كولەمىندە تابىس تاپتى.

ال 2018 جىلدىڭ قىركۇيەك ايىندا وتكەن الۆارەسپەن ەكىنشى جەكپە-جەك گەننادي ءۇشىن ەڭ تابىستى كەزدەسۋ سانالادى. ءبىر جىل بۇرىن الۆارەستىڭ ايتقانىنا كونگەن وتانداسىمىز بۇل جولى تابىستى تەڭدەي بولەمىز دەپ تالاپ قويدى. چەمپيوندىق بەلدىكتىڭ ءبارى وزىندە بولعاندىقتان بۇل تالابى ورىندى دا ەدى. بىراق تابىس ءبارىبىر تەڭ بولىنگەن جوق. تاعى دا ساۋل ءسال كوپ الدى. سونىڭ وزىندە وتانداسىمىز 40 ملن دوللار شاماسىندا تابىسقا كەنەلگەن كورىنەدى. گولوۆكين - الۆارەس رەۆانشىنىڭ HBO ppv ارناسى ارقىلى كورىلىمى 1,1 ملن-عا جەتكەن ەكەن.

گولوۆكيننىڭ سوڭعى جەكپە-جەگى جايلى جوعارىدا ايتتىق. وتانداسىمىز بۇل كەزدەسۋدەن 2 ملن دوللار گونورارعا رەسمي سەرىكتەسى DAZN پلاتفورماسىنان الاتىن سومانى قوسقاندا 15 ملن تابىس تاپتى. قارسىلاسى ستيۆ روللستىڭ گونورارى 300 مىڭ دوللار بولدى.

كاسىپقوي بوكس الەمىنە اياق باسقان جىلداردان بەرى گولوۆكيننىڭ قول جەتكىزگەن تابىسى جايلى مالىمەت وسىنداي. وسى مالىمەتتەرگە قاراپ GGG-ءدىڭ قۇنى تومەن دەۋ ورىنسىز ەكەنىن بايقاۋعا بولادى. اقش-تا ات-اتاعى جوق العاشقى جىلدارى بىرنەشە ءجۇز مىڭ، ال اتاعى شىعا باستاعاندا 500 مىڭنان 1 ملن شاماسىندا الىپ ءجۇردى. ال كەيىن P4P رەيتينگىسىندە ءوز ورنى بار بوكسشىلارمەن وتكەن كەزدەسۋلەرىندە بىرنەشە ميلليون تابىس تاۋىپ وتىردى. سول ءۇشىن گولوۆكين ءوزىنىڭ دەڭگەينە ساي جانە قارىلاستارىنىڭ قارىمىنا قاراي گونورار الىپ ءجۇر دەۋگە بولادى.

قۋانىش قاپپاس 

Abai.kz

8 پىكىر