Beysenbi, 17 Qazan 2019
Aymaq 1155 0 pikir 16 Qırküyek, 2019 sağat 14:17

Qızılorda oblısında jılu tarifi köterilmeydi

Qızılorda oblısında jılu beru mausımına dayındıq şaraları qarqındı jürgizilude. Sala mamandarı arnayı nısandardağı jöndeu jwmısı ayaqtaluğa jaqın ekendegin jetkizdi, - dep habarlaydı Abay-aqparat.

Qazirgi küni aymaqtağı kommunaldıq käsiporındar men äleumettik nısandarda jılu mausımına dayındıq jwmıstarı josparğa säykes atqarıluda.

– Onıñ işinde «Qızılorda jılu elektr ortalığında» – 99, Qızılorda elektr taratu toraptarı kompaniyasında – 95, «Qızılorda su jüyesi» mekemesinde 100 procentke orındaldı, - dep atap ötti oblıs äkiminiñ orınbasarı Marat Delmwhanov.

Al oblıstıq energetika jäne twrğın üy-kommunaldıq şaruaşılığı basqarmasınıñ basşısı Medet Usain:

– Qızılorda qalası, Belköl kentindegi kazandıqtı tabiği gazğa auıstıru maqsatında 183 mln teñge bölinip, qwrılıs-montaj jwmıstarı jürude, - dep atap ötti.

Qızılorda oblısındağı äleumettik nısandarına 37 mıñ tonna kömir, 22 mıñ tonna dizel' otını qajet. Qazirgi küni belgilengen mekemeler jetkizip beru jwmıstarı jürude.

Basqarma basşısı öz sözinde:

– Qoymada qajetti kömirdiñ äzirge – 92, swyıq otınnıñ 90 procenti bar. Oblıstağı 31 qabıldau punktinde kömir 13-16 mıñ teñge aralığında saudalanıp jatır. Şwbarköl kömiri – 14900 teñge, Qarajıra kömiri – 15625 teñge, Mayköben kömiri – 16000 teñge, Bogatır', Jalın kömiri 13125 teñgeden satıluda. Alayda, halıq onı satıp aluğa asığar emes. Jıldağı ädetpen kün suığan kezde ğana qimıldağan jağdayda kezek köbeyip, qiındıq tuındauı mümkin. Sondıqtan qıstıñ qamına osı bastan kirisken jön, - dedi.

Al Tabiği monopoliyalardı retteu jäne bäsekelestikti qorğau komitetiniñ Qızılorda oblısı boyınşa departamentiniñ basşısı Gülmira Ötegenova Qızılorda oblısında jılu bağası jıl ayağına deyin özgermeytinin habarladı.

Abai.kz

0 pikir