Солтүстік Қазақстан облысының экономикасын трансформациялауда инвестиция тарту, оның ішінде шетелдік капиталды жұмылдыру негізгі факторлардың біріне айналып отырғаны туралы өңір әкімі Ғауез Нұрмұхамбетов Орталық коммуникациялар қызметіндегі брифингте мәлімдеді.

«Өңірде жалпы құны 894 миллиард теңгені құрайтын 51 инвестициялық жоба жүзеге асырылуда, нәтижесінде 7,8 мыңнан астам жұмыс орны ашылады. Жалпы, бірінші жартыжылдық қорытындысы бойынша тартылған тікелей инвестициялар көлемі жылдық жоспардан 2 еседен астам артты. Соңғы 2 жылда 300 млрд теңгеден астам сомаға 19 меморандумға қол қойылды», – деді әкім.

Капитал тартудың негізгі орталығы ретінде «Қызылжар» арнайы экономикалық аймағы қалып отыр. Мұнда қазірдің өзінде 22 қатысушы тіркелген. Олардың қатарында инвестиция көлемі 90 млрд теңгеден асатын ДСП және ЛДСП өндіретін зауыт салып жатқан катарлық «Ультрадекор» компаниясы, 37,3 млрд теңгеге кондитерлік өндіріс іске асырып, жүздеген жұмыс орнын ашатын ресейлік «Бейкертон», тракторлар мен ауыл шаруашылығы техникасын шығару жобасын жүзеге асырып жатқан қытайлық «QILU Agro», сондай-ақ кран жабдықтары зауыты – «Уралкран» бар.

«Өңірге инвестиция тартудың орталығы болып «Қызылжар» арнайы экономикалық аймағы қала береді. Бүгінгі таңда 22 қатысушы тіркелді, инвестициялардың жалпы көлемі 317 миллиард теңгеден асады, шамамен 4 мың жаңа тұрақты жұмыс орны құрылады. Бұл – Түркия, Италия, Қытай, Германия, Катар, Ресей және Қазақстан инвесторлары қатысатын жобалар», – деп атап өтті Ғауез Нұрмұхамбетов.

Жергілікті кәсіпкерлер де шет қалмай отыр: облыста ірі саңырауқұлақ фермасы мен компост зауыты іске қосылуда, инвестиция көлемі шамамен 11,3 млрд теңгені құрайды. Сонымен қатар «Техноэкопарк» экологиялық жобасы қоқыс сұрыптау кешенін және қағаздан бастап металлопластикке дейінгі қайталама шикізатты қайта өңдеуді біріктірмек.

Abai.kz