مارات وماروۆ،

قر ەڭبەك سىڭىرگەن ءارتىسى، ءانشى-كومپوزيتور

«سارسەنبىنىڭ ساتىنە» نازار سالىپ جۇرەتىن وقىرماندارىمىزدىڭ ءبىرى «مارات وماروۆ قايدا ءجۇر؟» دەپ حات جولداپتى. كوپتەن بەرى ءوزىمىزدىڭ دە ويدا ءجۇر ەدى، سونىمەن تەلەفونىنىڭ ءنومىرىن تەردىك. ءساتى تۇسە قالعانىن قاراساڭىزشى، استانالىق بوپ كەتكەن ءانشى الماتىعا زاۋىمەن ءبىر كەلە قالعان

ەكەن. سونىمەن كەزدەستىك، كەزدەستىك تە سويلەستىك.

- ءبىر كەزدەرى كوگىلدىر ەكراننان تۇسپەيتىن مارات مىرزانىڭ ساحنادان كورىنبەۋىنە نە سەبەپ؟ استاناعا «ءسىڭىپ»، الماتىنى مۇلدە ۇمىتقاندايسىز؟

- 1998 جىلى «ارمان قالا - استانا» دەگەن ءانىم شىققاندا، ەلباسى ارنايى شاقىردى، استانادان شاڭىراق بەرىلدى. سوندا قونىستانعانىما بيىل جەتى جىلدىڭ ءجۇزى بوپتى. ارينە، ءوز شىعارماشىلىعىممەن شۇعىلدانىپ، ءان ايتىپ قانا جۇرە بەرەم دەسەم، ماعان وسى الماتىنىڭ ءوزى جەتەر ەدى. ويتكەنى 25-30 جىلعى ءومىرىم وسى قالادا ءوتتى. دەگەنمەن، مەن وزگەگە ۇقسامايتىن جاڭا دۇنيەلەر جاساعىم كەلدى. وسى ويدىڭ جەتەگىندە جۇرگەندە استاناعا كوشتىم. وندا بارعاندا كوپتەگەن جوعارى لاۋازىمدى جۇمىستار ۇسىنىلدى. بىراق شىعارماشىلىق ادامى مادەنيەتكە، ونەرگە ەڭبەك ءسىڭىرۋى كەرەك قوي. سوندىقتان استانا قالاسىنان حالىقارالىق «تالانت» ونەر ورتالىعىن اشتىم.

مارات وماروۆ،

قر ەڭبەك سىڭىرگەن ءارتىسى، ءانشى-كومپوزيتور

«سارسەنبىنىڭ ساتىنە» نازار سالىپ جۇرەتىن وقىرماندارىمىزدىڭ ءبىرى «مارات وماروۆ قايدا ءجۇر؟» دەپ حات جولداپتى. كوپتەن بەرى ءوزىمىزدىڭ دە ويدا ءجۇر ەدى، سونىمەن تەلەفونىنىڭ ءنومىرىن تەردىك. ءساتى تۇسە قالعانىن قاراساڭىزشى، استانالىق بوپ كەتكەن ءانشى الماتىعا زاۋىمەن ءبىر كەلە قالعان

ەكەن. سونىمەن كەزدەستىك، كەزدەستىك تە سويلەستىك.

- ءبىر كەزدەرى كوگىلدىر ەكراننان تۇسپەيتىن مارات مىرزانىڭ ساحنادان كورىنبەۋىنە نە سەبەپ؟ استاناعا «ءسىڭىپ»، الماتىنى مۇلدە ۇمىتقاندايسىز؟

- 1998 جىلى «ارمان قالا - استانا» دەگەن ءانىم شىققاندا، ەلباسى ارنايى شاقىردى، استانادان شاڭىراق بەرىلدى. سوندا قونىستانعانىما بيىل جەتى جىلدىڭ ءجۇزى بوپتى. ارينە، ءوز شىعارماشىلىعىممەن شۇعىلدانىپ، ءان ايتىپ قانا جۇرە بەرەم دەسەم، ماعان وسى الماتىنىڭ ءوزى جەتەر ەدى. ويتكەنى 25-30 جىلعى ءومىرىم وسى قالادا ءوتتى. دەگەنمەن، مەن وزگەگە ۇقسامايتىن جاڭا دۇنيەلەر جاساعىم كەلدى. وسى ويدىڭ جەتەگىندە جۇرگەندە استاناعا كوشتىم. وندا بارعاندا كوپتەگەن جوعارى لاۋازىمدى جۇمىستار ۇسىنىلدى. بىراق شىعارماشىلىق ادامى مادەنيەتكە، ونەرگە ەڭبەك ءسىڭىرۋى كەرەك قوي. سوندىقتان استانا قالاسىنان حالىقارالىق «تالانت» ونەر ورتالىعىن اشتىم.

اباي اتامىزدىڭ «اسەمپاز بولما ارنەگە، ونەرپاز بولساڭ، ارقالان، سەن دە ءبىر كىرپىش دۇنيەگە، كەتىگىن تاپ تا، بار قالان» دەگەنىندەي، ونەردىڭ دارا دا سارا شاڭىراعىنىڭ كىرپىشىن قالادىم. بالاپانداردىڭ ونەرىنە قانات بىتىرۋگە كۇش سالىپ جاتىرمىن. جاقىندا قازاقستاننىڭ 20 جىلدىعىنا بايلانىستى بايقاۋ وتكىزبەكشىمىز. وعان، 15 پەن 30 جاس ارالىعىنداعى بارلىق ۇلتتىڭ وكىلدەرىنىڭ جاستارى قاتىسا الادى. بايقاۋ ەكى بولىمنەن، ياعني پاتريوتتىق جانە ەركىن تاقىرىپتا بولماق. جەڭىمپازداردى شەتەلگە جىبەرەمىز.

- ۇلكەن ورتالىق سالۋ كەز كەلگەن ونەر ادامىنىڭ باسىنا بىتە بەرمەيتىن باق. ەندەشە ارىپتەستەرىڭىزدەن وق بويى وزىپ، وسىنداي شاڭىراق سالۋىڭىزعا نە تۇرتكى بولدى؟

- وڭتۇستىك قازاقستاننىڭ سوزاق اۋدانىندا شولاققورعان دەگەن اۋىل بولاتىن. سوندا ەكىنشى سىنىپتا وقىپ جۇرگەنىمدە، ءشامشى اعامىز كەلدى. مەن «انا تۋرالى جىر» ءانىن ورىندادىم. ءاندى ورىنداپ بىتكەندە ءشامشى اعا ماڭدايىمنان ءسۇيىپ: «وسىنداي شالعايدا تۇراتىن، اۋىلدان شىعاتىن بالالار ءۇشىن، شىركىن-اي، ونەر مەكتەبى اشىلسا عوي» دەدى. سول ءسوز ساناما قاتتى اسەر ەتكەن بولۋى كەرەك. ونى كەيىن ۇعىندىم عوي، ارينە. ءۇمىتىم اقتالدى دا! بۇگىندە بەس قاباتتان تۇراتىن ورتالىعىمىزدا 300 ورىندىق زالىمىز بار. بالەت، حورەوگرافيا، بي ونەرى، ۇلتتىق اسپاپتارعا باۋلۋ بولىمدەرىندە جاس تالانتتار دارىنىن ۇشتايدى. سونداي-اق ءوزىمىز كونتسەرت بەرەمىز، ءدامحانامىز دا بار. جالپى، بۇل كەشەندە ادامعا كەرەك نارسەنىڭ ءبارى تابىلادى.

- بۇگىنگىدەي قىمباتشىلىق زاماندا جەكە ادامعا ۇلكەن ونەر شاڭىراعىن سالۋ وڭاي ەمەس شىعار. جوعارى جاقتان دەمەۋشىلىك تانىتقاندار بولدى ما؟

- مەملەكەتتەن قارجى بولىنگەن جوق. قۇدايعا شۇكىر، ءوز ماڭداي تەرىممەن سالدىم. جەتپەگەنىنە نەسيە بار، ودان قالدى ونەرگە جاناشىر جولداستار كومەكتەستى دەگەندەي...

- ورتالىقتارىڭىزدان اۋىل بالالارىنا ورىن تابىلا ما؟ استانا سياقتى قىمبات قالاعا كەلۋ الىس شالعايداعى جەتكىنشەكتەر ءۇشىن ارمان عوي. ايتىڭىزشى، ءوزىڭىز ايتقان ءشامشى اعانىڭ تىلەگىن قانشالىقتى ورىنداي الدىڭىز؟

- مەنىڭ باستى ماقساتىم دا - اۋىلدان شىققان تالانتتى بالالاردى كوپكە تانىتۋ بولاتىن. ال ناعىز تالانتتار، مەنىڭشە، اۋىلدان عانا شىعادى. بيىل ەلىمىزدىڭ تۇكپىر-تۇكپىرىنەن وقۋشىلار كەلدى. بىراق ولاردى مەن قابىلداعانىممەن، جاتار جاي، ينتەرنات جوق بولسا، ولار قايدا بارادى؟ وسى جاعىنان ءبىراز كەدەرگىلەر بولىپ تۇر. ايتپەسە بىزگە كەلەم دەگەندەرگە ەسىگىمىز ءاردايىم اشىق. ماسەلەن، وسى ورتالىقتان شىققان ەڭ العاشقى قارلىعاشىمىز ەركەش حاسەنوۆ ماسكەۋدە وتكەن «مينۋتا سلاۆا» بايقاۋىندا فينالعا شىعىپ، ۇلكەن ابىرويمەن ورالعانىن بىلەسىزدەر. ول - اۋىلدا اجەسىنىڭ قولىندا وسكەن جەتىم بالا. ياعني، دوپ ويناپ جۇرگەن جەرىنەن بايقاۋعا قاتىستىردىم. انەكي، جۇلدە اكەلدى. ەندى ونى فيليپپ كيركوروۆ «نوۆايا ۆولناعا» شاقىرىپ جاتىر.

- بايقاۋ دەگەن بىزدە دە از ەمەس. دەگەنمەن، ايتىڭىزشى، بىزدەگى بايقاۋلار قانشالىقتى ءادىل وتەدى دەپ ويلايسىز؟

- ادىلەتسىزدىك بار. ونى مويىندايمىن. ال ونىڭ الدىن قالاي الۋعا بولاتىنىن بىلمەيمىن. بىلەتىنىم، انشىلەر بايقاۋعا باراردىڭ الدىندا ويلانسىن! قاتىسۋ كەرەك پە، جوق پا دەپ! ماسەلەن، مەنى دە كوپتەگەن بايقاۋلارعا شاقىرىپ جاتادى. بىراق مەن بارمايمىن. ويتكەنى ۇلكەن كونكۋرستاردا كىمنىڭ ءانى وتەتىنىن، كەم جەڭەتىنىن الدىن الا بىلەمىن. ال ول ءان كەيىن ايتىلا ما، ايتىلماي ما، ەشكىمنىڭ وندا جۇمىسى جوق. سونى بىلە تۇرىپ قالاي بارامىن؟ ونىڭ ۇستىنە كەيبىر بايقاۋلارعا مەملەكەتتەن اقشا بولىنەدى. بىراق ول قاراجات ەشكىمنىڭ قالتاسىنان شىقپاعان سوڭ، اركىم تالان-تاراجعا سالادى.

- ونەر ادامدارىنىڭ قاي-قايسىمەن سويلەسسەڭىز دە، «ۇكىمەت كومەكتەسپەيدى»، «قامقورلىققا ءزارۋمىز» دەپ جاتادى...

- ءوز باسىم مەملەكەت قاشان قارجى بەرەدى دەپ كۇتكەن جوقپىن. ادام ومىرگە كەلگەن سوڭ، تىرشىلىگىن ىستەۋ كەرەك. مازمۇندى ءومىر ءسۇرۋ ءۇشىن، ول سوعان ساي ءىس ارەكەت جاساۋى ءتيىس. ويتكەنى ارەكەت جاساعانعا - بەرەكەت بار. بىزگە قازىرگىدەي روبوتتىڭ زامانى كەرەك ەمەس. اركىم ءوزى ءۇشىن تالپىنۋى كەرەك، ءورىسىن كەڭەيتۋى كەرەك. ناتيجەسىندە ەل - ەردىڭ اتىن شىعارادى، ەر - ەلدىڭ اتىن شىعارادى.

اللاعا شۇكىر، بۇگىندە قازاقستاننىڭ ەڭبەك سىڭىرگەن ءارتىسى، قازاقستاننىڭ جاستار وداعىنىڭ لاۋرەاتىمىن. كايرگە بارىپ «سۇلتان-بەيبارىس» انىمەن بىرنەشە حالىقارالىق كونكۋرستاردا لاۋرەات اتاندىم، باسقا دا ماراپاتتارىم جەتەرلىك. «اناشىم»، «اكە ارمانى» اتتى اندەرىممەن نۇرلان ونەرباەۆ ءان ونەرىنە شارىقتادى دەپ ويلايمىن. «قىز سىنى»، «العاشقى ماحاببات»، «ءانشى بالاپان»، «ستامبۋل مەن الماتى» سياقتى اندەرىمدى حالىق ءوز بيىگىنە كوتەردى. بۇگىندە بۇكىل الەمدىك كومپوزيتورلار اسسوتسياسىنا مۇشە بولدىم. مەن باقىتتى اداممىن. ماعان اللا اۋەن بەردى، ءان بەردى. ونەردىڭ ارقاسىندا مەن بايىپ تا جاتىرمىن، شاكىرتتەرىم جەتىستىككە جەتىپ تە جاتىر. ماعان ودان باسقا نە كەرەك؟

- كەزىندە «ءانشى بالاپان» اتتى ءانىڭىز ارقىلى قانشاما ونەر تارلاندارى ساحناعا جولداما الدى. الماتىدان فيليال اشۋ ويىڭىزدا بار ما؟

- ارينە، ول دا قارجىعا كەلىپ تىرەلەدى. قالتالى ازاماتتاردان كومەك بولسا، نەگە فيليال اشپاسقا؟ نۇر ۇستىنە نۇر بولار ەدى. قازاقستاننىڭ وركەنيەتتى ەل قاتارىنا ەنۋىنە بولاشاق شاكىرتتەر ۇلەس قوسادى. ال ءبىز بالاپانداردى قولداۋعا ارقاشان دايىنبىز! بىزگە ءارتۇرلى ەلدەردەن بىرىگىپ جۇمىس ىستەۋگە، بايقاۋلارعا شاقىرتۋلار ءتۇسىپ جاتىر. سونىڭ ىشىندە يالتا، «ەۆروۆيدەنيە»، «تۇركوۆيدەنيە» بار. لوس-اندجەلەستەن، ينديادان شاقىرتۋلار الدىق.

- الماتىعا جولىڭىز ءتۇسىپتى، نە بايقادىڭىز؟ ارىپتەستەرىڭىزدىڭ جاعدايى قالاي ەكەن؟

- بايقاعانىم، الماتىداعى ونەر ادامدارى ءار نارسەگە ءبىر ۇرىنادى ەكەن. بىرەسە انا جەردە، ەندى بىردە مىنا جەردە جۇرەدى. كوزقاراستارى جالتاق. بەلگىلى ءبىر ۇستانىم دا جوق سياقتى. ال جەڭىل-جەلپى دۇنيەدەن ۇلكەن ناتيجە شىعادى دەپ ويلامايمىن. مەنىڭشە، ناعىز ونەر ادامىندا دارىنىمەن قوسا وزىندىك كوزقاراس، ازاماتتىق، پارتيوتتىق سەزىم بولۋ كەرەك. ماسەلەن، ماعان «اعا، ءاندى بىلاي ايتۋ قيىن ەكەن، بىلايشا ايتا سالايىنشى» دەيتىندەرگە، ايتپاساڭ - ايتپا، راحمەت، بىراق وزگەرتپەيمىن دەيمىن. سوندىقتان دا مەنىڭ اندەرىم باسقالاردىكىنە ۇقسامايدى! بۇگىندە ءبىر-بىرىنەن، بولماسا ءشامشى اعادان ءان ۇرلايتىندار كوبەيىپ جاتىر. حالىق اندەرىنە «ۇقساپ تۋعان» اندەر قانشاما! سونداي-اق شەتەلدىك اندەردى قازاقشاعا اۋدارىپ ايتىپ جۇرگەندەردەن اياق الىپ جۇرە المايسىڭ.

ال جاستارعا قالاي بولعاندا دا، دۇرىس باعىت بەرەتىن ۇستاز كەرەك. بولاشاقتا كومپوزيتورلار كونكۋرسىن وتكىزسەم بە دەگەن ويىم بار. ويتكەنى بىزگە وزىندىك ءۇنى بار كومپوزيتورلار كەرەك. ايتپەسە، ارتىمىزداعى جاستار تاقىلداق پەن توقىلداقتى ەستىپ، ەۋروپالانىپ كەتۋى ابدەن مۇمكىن.

- بۇگىندە ءان اۆتورىن انىقتاۋدىڭ ءوزى قيىنعا تۇسكەنىن انگە تالاسقان ارىپتەستەرىڭىزگە قاراپ، ءبىلىپ جاتىرمىز. ەندەشە وسىنداي كيكىلجىڭدەردىڭ الدىن الۋ ءۇشىن نە ىستەۋ كەرەك دەپ ويلايسىز؟

- ءبىر-بىرىنەن ءان ۇرلادى دەگەن ءسوزدىڭ شىعىپ جاتقانى، ارينە، ۇيات نارسە. مۇنىڭ سەبەبى 90-جىلدارداعىداي كوركەمدىك كەڭەس جوق. سول كەزدە اندەرىمىزگە توعىز جەردەن سۇزگى جاسالاتىن. وعان قازاقكونتسەرت، مادەنيەت مينيسترلىگى، كومپوزيتورلار وداعى، راديولارداعى كوركەمدىك كەڭەس ۇجىمدارى اتسالىستى. ولار تۋىندىلاردى تەكسەرىپ، سۇرىپتاپ بارىپ قول قويۋى كەرەك. ال سودان سوڭ ءسىز تەلەديدارعا جىبەرۋگە مۇمكىندىك الاسىز. بۇگىن سونىڭ ءبىرى بار ما؟ ارينە، جوق. ەندەشە ءبىر-بىرىنەن ۇرلاۋ، كوشىرۋ كوبەيمەگەندە قايتەدى!؟

- كەيبىر اندەردىڭ حالىق اندەرىنە ۇقساۋى زاڭدىلىق دەگەندى دە ەستىپ ءجۇرمىز. بىراق بۇل ەشكىمگە ۇقسامايتىن اندەر جازۋ مۇمكىن ەمەس دەگەندى بىلدىرمەيتىن شىعار؟

- مەنىڭ اندەرىم ەشكىمگە ۇقسامايدى! ەشكىمنەن كوشىرمەيمىن. ويتكەنى ماعان اللا بەرەدى. مەن سىزگە ايتايىن، قازاقستان كومپوزيتورلار وداعى - كومپوزيتورلاردى ەكىگە بولەدى. ءبىرى - اسفالتتىق، ەكىنشىسى - توپىراقتىڭ كومپوزيتورلار. ال مەن سولاردىڭ ەكىنشىسىنە جاتامىن.

كەيبىر ارىپتەستەرىم سۇيسىنە، بالكىم، قىزعانا: «مارات، سەن ءبىر ءان شىعارساڭ بولدى، نەگە حالىق ايتىپ كەتەدى» دەيدى. سوندا مەن «سەن دە شىعاراسىڭ. ول ءۇشىن اۋىل جاققا بارىپ قايت. شاڭىنا اۋناپ، ساماۋرىننان شاي ءىش. ساف اۋاسىن جۇتىپ، تابيعاتپەن سىرلاس» دەيمىن. بۇگىنگى اندەردىڭ جۇتاڭدىعى، جالاڭاشتىعى، تەز جاتتالىپ، تەز ۇمىتىلاتىنى - تابيعاتپەن تىلدەسە الماۋدا جاتىر!

- ەرىنبەگەننىڭ ءبارى ءان جازاتىن زامان تۋدى. بۇل قازاق اۋەنىنىڭ باعاسىن تۇسىرەدى دەپ ويلامايسىز با؟

- جىگىتكە جەتى ونەر دە از دەگەن عوي، جاستار ىزدەنە بەرسىن. ىشىمدىككە، ناشاقورلىققا ەلتىگەنشە، ونەر تانىسىن، ءبىلسىن. جاقسىدان ۇيرەنسىن دە، جاماننان جيرەنسىن. ءان دە جازسىن! تەك قانا پلاگيات بولماسىن! ەگەر وزگەشە ستيل تاپسا، حالىق ونى تانيدى. ال ەگەر ەۋروپادان ەستىپ الىپ، ۇلتتىق ناقىشى جوق ءان شىعارسا، ول قاشان دا ارزانقول دۇنيە بولىپ شىعادى. ويتكەنى مايكل دجەكسوندى قازاقشاعا اۋدارىپ ايتساڭ دا، ەشكىمدى تاڭداندىرا المايسىڭ عوي. بۇل دا سول سياقتى.

- ەلىمىز تاۋەلسىزدىك العانىنا 20 جىل بولدى. وسى ۋاقىت ىشىندە ۇلتىمىز نەدەن ۇتىپ، نەدەن ۇتىلدى؟

- قازاق ەلى نايزانىڭ ۇشىمەن، بىلەكتىڭ كۇشىمەن بەكەر قان توكپەگەن ەكەن. بابالار ارمانىنىڭ ورىندالعانىنا كۋامىز. ءوسىپ كەلەمىز، وركەندەپ كەلەمىز. كەڭ دالامىز اناۋ، بايلىعىمىز جەتەدى. بىراق اۋىزبىرشىلىگىمىز جوق...

- قارا حالىقتىڭ ءتۇرلى ادىلەتسىزدىكتەرگە تاپ كەلۋى سول اۋىزبىرشىلىكتىڭ جوقتىعىنان دەيسىز بە؟

- ول جاعىن بىلمەدىم. جالپى، استانادا مەن ونداي نارسەلەردى بايقامادىم.

- ءسىز جۇرگەن استانادا ءبارى جاقسى شىعار. دەگەنمەن، ماڭعىستاۋداعى ەرەۋىلدەرگە، شاكىرتىڭىز ەركەش حاسەنوۆتىڭ تۋعان ءوڭىرى اقتوبەدەگى جاعدايلارعا الاڭدامايسىز با؟

- ساياساتپەن بايلانىسقىم كەلمەيدى. قازىر ۋاقىتىمنىڭ دەنىن جاستاردى تاربيەلەۋگە ارنايمىن. ونىڭ ۇستىنە 20 جىلدىققا وراي ۇلكەن باعدارلاماعا دايىندىق ۇستىندەمىن. ءبىزدىڭ ماقساتىمىز اۋەنىمىزبەن، انىمىزبەن كوك جالاۋىمىزدى جەلبىرەتۋ جولىندا جۇمىس ىستەۋ. ارينە، مەن دە ەل ەرتەڭىنىڭ جارقىن بولۋىنا، تىنىشتىعىمىزدىڭ باياندىلىعىنا ۇلەس قوسقىم كەلەدى. كونتسەرت قويۋعا ۇسىنىس جاساپ جاتسا، نەگە بارمايمىز؟ بارامىز. وعان مۇمكىندىگىمىز دە بار. تۇپتەپ كەلگەندە، مەنىڭ قۇرعان ونەر شاڭىراعىمنىڭ ءوزى وسى قايىرىمدىلىق پەن مەيىرىمدىلىككە ۇشتاسىپ جاتىر. جەتىمدەر ۇيىمەن، قارتتار ۇيىمەن تىعىز بايلانىستامىز.

- ايتپاقشى، ءسىزدىڭ «العاشقى ماحاببات» دەيتىن انىڭىزگە ۇندىلىكتەر قۇدا ءتۇسىپتى دەگەندى ەستىپ ەدىك...

- ءيا، ءيا، ميتحۋن چاكرابورتيدىڭ بالاسى «العاشقى ماحاببات» اتتى انىمە قۇدا تۇسكەن. بىراق كىشكەنە قارجىلاي داعدارىس بولىپ توقتاڭقىراپ تۇرعان جايى بار. ايتپەسە جوسپار دايىن. ال قازىر مارك داكاسكاس ورتالىققا كەلىپ، كينو ءتۇسىرۋدى قولعا الىپ جاتىرمىز.

- ونەر الەمىندە ءبىراز تانىمال بولعان قىزىڭىز زارينا وماروۆا تۇرمىسقا شىققالى بەرى ساحنادان كورىنبەي كەتتى. وسى كەتكەنى - كەتكەن بە سوندا؟

- زارينا بۇگىندە جولداسىمەن ۇلكەن شاڭىراق رەتىندە قالىپتاسۋدا. كەيدە «حالىق كۇتىپ قالدى، ساحناعا قاشان شىعاسىڭ؟» دەپ تە قويامىن. بىراق زارينا قاتتى بالاجان ەكەن. بۇگىندە دۇنيەگە ەكىنشى پەرزەنتىن اكەلەيىن دەپ وتىر. ارينە، ءبارى ءبىر اللانىڭ قولىنداعى دۇنيە عوي. ەگەر ماعان سالسا، ءوز پەرزەنتىمدى نەگە دەمەپ، قولپاشتاماسقا؟ زارينانىڭ داۋىسى ەشكىمنەن كەم ەمەس. ەشكىمگە ۇقسامايتىن ءوز ىرعاعى بار. تىڭدارمانى قالىپتاسقاندىقتان، ءالى كۇنگە دەيىن ونى ىزدەپ جاتادى. ءبىر قۋاناتىنىم، حالىق سۇراپ جاتىر. ال حالىق سۇراعاننان كەيىن سەن تالانتتى وشىرمەۋىڭ كەرەك.

اڭگىمەلەسكەن -

ارداق يمانبەكقىزى،

«D»

«وبششەستۆەننايا پوزيتسيا»

(پروەكت «DAT» № 31 (114) وت 21 قىركۇيەك 2011 جىل