ۇلتتىق سپورتتى وليگارحاتتىڭ قولىنان قايتارىپ الىپ، ناعىز كاسىبي، وتانشىل سپورتشىلار مەن باپكەرلەرگە بەرۋ كەرەك!

تيمۋر اسقارۇلى قۇلىباەۆ مىرزا!

سىزگە، دانيار ابۋلعازين ەكەۋىڭىزگە وليمپيادالىق كوميتەتتى باسقارۋ نە كەرەك؟ مەنىڭ بىلۋىمشە، سىزدە بارلىعى بار. بانكتەر مەن جەرلەر، زاۋىتتار مەن كەمەلەر... ەندەشە، ۇلتتىق سپورت ءۇشىن حالىق الدىندا جاۋاپكەرشىلىك ارقالاۋ نە كەرەك؟

ۇلتتىق وليمپيادا كوميتەتىنىڭ تىزگىنىن ەل ىشىندە ابىرويى بار سپورتشىلارعا، تۇرلىحانوۆ، ىبىرايىموۆ، رىپاكوۆا جانە باسقالارعا تابىستاپ بەرگەنىڭىز دۇرىس! سپورتقا ماڭداي تەرى سىڭگەن ناعىز ماماندارعا، سپورتتاعى ءاربىر جەڭىستىڭ ءتاتتى ءدامى مەن جەڭىلىستىڭ اششى وكىنىشى نە ەكەنىن شىن مانىندە بىلەتىن ادامدارعا بەرىڭىز!

سپورت فەدەراتسيالارىنىڭ باسشىلىعىنان وزىڭىزدەن كىشى وليگارحتاردى دا الىڭىز. ورىندارىڭىزدى كاسىبي سپورتشىلارعا بەرىڭىزدەر. سپورت سالاسىمەن - وليمپيادا ويىندارى ءومىرىنىڭ مانىنە اينالعان ادامدار اينالىسسىن. ويتكەنى، سىزدەر ءۇشىن بۇل – جاي عانا كەزەكتى ءبىر كوڭىل كوتەرۋگە سەبەپ بولاتىن باسقوسۋ سەكىلدى عانا.

مەن ءوزىمىزدى كورشىلەرىمىزبەن سالىستىرمايمىن. قىرعىز، وزبەك، تۇركىمەن باۋىرلارىمىز ءۇشىن شىن قۋانىشتىمىن. ويتكەنى، ولار ءادىل جەڭدى. ال ءبىز ويسىراي ۇتىلدىق. ءبىز ءوز-ءوزىمىزدى سالىستىرۋىمىز كەرەك. راس، ءبىز الەمنىڭ ەڭ ۇزدىك دەگەن وتىزدىعىنا 3-4 التىن جۇلدەمەن سەنىمدى تۇردە ەنىپ جۇرگەن ەدىك. ال بۇل جولى 97 سپورتشىنىڭ تەك سەگىزى عانا مەدالعا قول جەتكىزدى. ءسويتىپ، مۇمكىن بولعان 93 ورىننان 83-ءشى ورىندى الدىق. بۇل ۇلتتىق دەڭگەيدەگى قورلاۋ. اسىرىپ نە كەمىتىپ ايتقاندىق ەمەس...

بوكس تۋرالى... بۇرىن كسرو قۇرامىندا 10 سپورتشى بولسا، سونىڭ التاۋى قازاقستاننان ەدى. ءبىز قازاقستان-كۋبا بولىپ، جەكەلەگەن جارىستار وتكىزەتىن ەدىك. ال ەندى قازىر، باپكەرلەر قازاقستاننان كەتىپ، وزگە ەلدەر ءۇشىن وليمپيادا چەمپيوندارىن دايارلاپ جاتىر. بۇل ناعىز ماسقارا!

ءبىز مەملەكەت رەتىندە ماسساج ءۇشىن 1 ملرد تەڭگە تولەيدى ەكەنبىز. بۇل شامامەن 2,5 ملن دوللار. بۇنداي جاعدايدا، وليمپيادا چەمپيونى (250 مىڭ دوللار) بولعاننان، ماسساجيست بولعان ارتىق قوي... تاعى دا ۇرلىق پا؟

وليگارحاتقا مەملەكەتتىك ءىستى سەنىپ تاپسىرۋعا بولمايتىنىنا ەلدىڭ تاعى ءبىر مارتە كوزى جەتتى. تەمىر جول سالاسىن تالقان ەتتى. اۋىل شارۋاشىلىعىندا لاتيفۋنديا ورناتتى. ناقتى بانكتىك جۇيەنى جويدى. ەندى مىنە، مەملەكەتتىڭ (سالىق تولەۋشىلەردىڭ اقشاسى) ۇلتتىق سپورتقا دەپ بولگەن اقشاسىن دا تالان-تاراجعا سالا باستادى. بۇل دا ءوز كەزەگىندە وليگارحاتتىڭ قانداي دا ءبىر ىسكە قولىنىڭ ۇشى تيەسە، سول ءىستىڭ كۇل-تالقانى شىعاتىنىن دالەلدەپ وتىر. دەمەك، ۇلتتىق سپورتتى وليگارحاتتىڭ قولىنان قايتارىپ الىپ، ناعىز كاسىبي، وتانشىل سپورتشىلار مەن باپكەرلەرگە بەرۋ كەرەك!

ءتۇيىن. دەسە دە، ءبىزدىڭ 97 سپورتشىمىز ءۇشىن، اسىرەسە، 8 قولا جۇلدەگەر ءۇشىن شىن قۋانىشتىمىن.

مۇحتار تايجان،

قوعام قايراتكەرى

Abai.kz