رەسەيدىڭ باس پروكۋرورى قازاقستاننىڭ ىشكى ىسىنە ارالاستى

ءيا، ءدال سولاي. رەسەيدىڭ باس پروكۋرورى يگور كراسنوۆ دەگەن دوڭشەكە: «قازاقستاندا ۇلتشىلداردىڭ رۋسوفوبتىق كوزقاراسى كۇش الىپ كەلەدى. ولارعا ۋكراينانىڭ ۇكىمەتتىك ەمەس ۇيىمدارى سەپتەسىپ جاتىر»، - دەپ سوققان.

وتكەن جۇمادا بەلارۋس استاناسىندا تمد ەلدەرى باس پروكۋرورلارى باس قوسقان. اتالعان جيىندا رەسەي مەن قازاقستاننىڭ باس پروكۋرورلارى جولىققان. سول جولىعۋدا يگور كراسنوۆ دەگەن ادام:

«ماعان مۇنى ايتۋ ىڭعايسىز، دەسە دە ماعان ۋكراينانىڭ ۇكىمەتتىك ەمەس ۇيىمدارىنىڭ قولداۋىمەن، قازاقستاندا رۋسوفوبتىق كوزقاراس كۇشەيىپ كەلە جاتقانىن حابارلاپ جاتىر. قازىرگىدەي جاعدايدا، وندايلارمەن بىرلەسىپ كۇرەسۋىمىز كەرەك. ۇلتشىلدىقتىڭ پايدا بولۋىنا، ەكسترەميستىك اڭگىمەلەردىڭ شىعۋىنا قارسى كۇش بىرىكتىرۋىمىز كەرەك. مەن بۇل ماسەلەدە ءسىزدىڭ (بەرىك اسىلوۆقا قاراتا) قولداۋىڭىزعا قاتتى سەنەمىن. ال ءبىزدىڭ ماماندار شىلدە ايىندا نۇر-سۇلتانعا بارىپ، ەكسترەميزم مەن تەرروريزمگە قارسى تاجىربيە الماسادى»، - دەپتى.

بۇل ايتىلعان سوزگە قازاقستاننىڭ باس پروكۋرورى بەرىك اسىلوۆتىڭ نە دەپ جاۋاپ قايتارعانى ەلىشىلىك ءھام رەسەيلىك باق-تاردا جاريالانباعان. تەك قانا باس پروكۋراتۋرانىڭ رەسمي سايتىندا اتالعان جيىن تۋرالى رەسمي اقپارات جاريالانعان. وندا:

«اتالعان ءىس-شارا بارىسىندا ادام قۇقىعى مەن بوستاندىعىن قامتاماسىز ەتۋ ماقساتىندا قازاقستان مەن رەسەي باس پروكۋراتۋرالارى اراسىنداعى «بايقوڭىر» كەشەنى اۋماعىنداعى ىنتىماقتاستىق تۋرالى كەلىسىمگە قول قويىلدى»، - دەپ جازىلعان.

قازاقستاننىڭ باس پروكۋرورى ءوز بايانداماسىندا قىلمىستىق پروتسەستە بيزنەستى قورعاۋ جانە ەكونوميكالىق رەسۋرستاردىڭ زاڭسىز شوعىرلانۋىنا جانە زاڭسىز شىعارىلعان كاپيتالدى قايتارۋ  ماسەلەلەرى بويىنشا سوز سويلەگەن.

بۇل سوزتالقىنىڭ ەڭ قىزىق جەرى - سەرگەي ۆاسيلەۆ ەسىمدى ادام كراسنوۆتىڭ سوزدەرىن ءھام رەسەي مەن قازاقستان باس پروكۋرورلارىنىڭ جولىققانى تۋرالى اقپاراتتى: «قازاقستان ۇلتشىلدارى – دايىندالىڭدار!»، - دەگەن تاقىرىپپەن Facebook جەلىسىنە بولىسكەن.

«قازاقستانداعى ۇلتشىلدار دايىن بولىڭدار! رەسەيدىڭ باس پروكۋرورى يگور كراسنوۆ قازاقستاننىڭ باس پروكۋرورى بەرىك اسىلوۆپەن كەزدەستى. "مۇنىڭ ايتۋ جاعىمسىز، بىراق ۋكراينالىق ۇكىمەتتىك ەمەس ۇيىمداردىڭ قولداۋىمەن قازاقستاندا رۋسوفوبتىق ارەكەت ورىن الۋدا دەپ ماعان حابارلاۋدا. ءبىزدىڭ ماماندار ەكسترەميزم مەن تەرروريزمگە قارسى ءىس-قيمىل تاجىربيەسىمەن الماسۋ ءۇشىن شىلدە ايىندا نۇر-سۇلتاندا قالاسىنا بارادى»، - دەدى كراسنوۆ.

كوپ ۇزاماي تۇراندىقتار، ءتۇرلى ۇلتشىلار سازايىن الادى دەگەن ءۇمىت بار. قازاق ءتىلدى ساياساتكەرلەرگە لەنتالارىن تازالاپ، ەندى اقىماقتىق ءسوز جازباۋعا كەڭەس بەرەمىن»، - دەپ جازعان الگى سەرگەي ۆاسيلەۆ.

ال ۆاسيلەۆتىڭ بۇل جازباسىن باسقا-باسقا ەمەس، بۇرىن توتەنشە جاعدايلار ءمينيسترى بولعان، پارلامەنتتە دەپۋتات بولعان، جاسى جەتپىستەن اسىپ جىعىلعان، ۇقك-ءنىڭ زەينەتتەگى گەنەرالى ۆلاديمير بوجكو بولىسكەن.

الايدا اراعا كوپ ۋاقىت سالماي جاتىپ، بوجكو دا، ۆاسيلەۆ تە الگى جازبانى ءوشىرىپ ۇلگەرگەن.

Orda.kz ءتىلشىسى «قازاقستاننىڭ ورىس، سلاۆيان جانە قازاق ۇيىمدارى قاۋىمداستىعىنىڭ» توراعاسى ۆلاديمير بوجكوعا حابارلاسىپتى. سويتسە بوجكو بۇيدەپتى: «مەن ەكى باس پروكۋروردىڭ كەزدەسكەنىن حابارلادىم، ال سىزدەر بولساڭىزدار مەنى ساتقىندىق جاساعان سياقتى كورسەتىپ، اسىرا سىلتەپ وتىرسىزدار. سىزدەر باسپاسوزدە تىپتەن قىزىپ كەتكەنسىزدەر مە؟ ەكى باس پروكۋرور كەزدەسىپ، شەتەلدىك ارنايى قىزمەتتەرگە قارسى تۇرۋ ماسەلەسىن قاراستىرىپ جاتقانىن جانە وسىنىڭ ءبارىن قايتا قاراعانىن ءبولىستىم، باسقا ەشتەڭە جوق».

بۇل ماسەلەگە قاتىستى كوپ ءسوزدى كوبىگى شىققانشا ساپىرماي، وسى اقپاراتپەن توقتايىق. كراسنوۆ، بوجكو، ۆاسيلەۆتەردىڭ ارەكەتتەرىنە باعا بەرۋ وقىرماننىڭ ەنشىسىندە بولسىن...

نۇرگەلدى ابدىعانيۇلى

Abai.kz