1 قىركۇيەك كۇنگى جولداۋىندا، پرەزيدەنت ق.توقاەۆ كەزەكتەن تىس پرەزيدەنت سايلاۋىن جاريالادى. سايلاۋ قاراشا ايىندا ءوتۋى مۇمكىن دەيدى ماماندار. ال قانشا قارجى كەتەتىنى بەلگىسىز. 2019 جىلعى پرەزيدەنت سايلاۋىنا 9.4 ملرد تەڭگە كەتكەن. 

سايلاۋ دەسە پارتيانىڭ قۇلاعى ەلەڭ ەتۋى كەرەك. ساياساتتىڭ زاڭدىلىعى سول. سەبەبى سايلاۋ ول بيلىككە تالاسۋ جولى، ال پارتيا بيلىككە تالاسۋشى ينستيتۋت. سونىمەن قاي پارتيالار سايلاۋعا تۇسپەك.

پرەزيدەنت توقاەۆ سايلاۋعا تۇسەتىنىن مالىمدەدى. "امانات" پارتياسىنان پرەزيدەنت شىعىپ كەتسە دە، سول پارتيادان كانديدات بولىپ تىركەلۋ ىقتيمالدىعى جوعارى. سەنات توراعاسى ماۋلەن اشىمباەۆ سايلاۋعا تۇسپەيتىنىن ايتتى، الايدا ول توقاەۆتى "امانات" پارتياسى قولدايدى دەگەن پىكىر ءبىلدىردى.

پارتيالاردىڭ ىشىندە ءبىرىنشى بولىپ قازاقستان حالىق پارتياسى مالىمدەمە جاسادى.

"قازاقستان حالىق پارتياسى مەملەكەت باسشىسىنىڭ قازاقستان حالقىنا بۇگىنگى جولداۋىندا جاريالاعان ساياسي قايتا قۇرۋلاردى تولىعىمەن قولدايدى. كەزەكتەن تىس پرەزيدەنتتىك سايلاۋدا، ءبىز بۇرىن ايتقانىمىزداي، قازىرگى مەملەكەت باسشىسى قاسىم-جومارت توقاەۆتىڭ كانديداتۋراسىن قولدايمىز", - دەلىنگەن پارتيانىڭ مالىمدەمەسىندە. وسى ارقىلى پارتيا سايلاۋعا قاتىسپايتىنىن ءبىلدىردى.

«اق جول» پارتياسىنىڭ تورعاعاسى، ءماجىلىس دەپۋتاتى ازات پەرۋاشەۆتىڭ ايتۋىنشا، مەملەكەت باسشىسىنا لايىقتى قارسىلاستار بار.

"مەنىڭ ويىمشا، بولادى. سەبەبى ءبىز ەركىن ەلدە تۇرامىز. دامۋدىڭ دەموكراتيالىق جولىن تاڭداپ الدىق. سايلاۋ بالامالى تۇردە وتەدى. سايلاۋدا لايىقتى كانديتاتتار بولادى", - دەدى پەرۋاشەۆ.

ول سونىمەن قاتار "اق جول" پارتياسىنىڭ سايلاۋعا تۇسۋگە دايىن ەكەنىن جەتكىزدى. "اق جول" پارتياسى سايلاۋعا قاشان دا دايىن.

ء"بىز سايلاۋشىلاردىڭ الدىندا مىنتەتىمىزدى تولىق ورىنداپ وتىرمىز. بۇل وڭاي ەمەس. سەبەبى پارتيانىڭ مۇشەلەرى پارلامەنتتە از. بۇگىندە تەك 12 دەپۋتاتىمىز بار. وسىعان قاراماستان ءبىز جۇمىس ىستەپ جاتىرمىز… پرەزيدەنت سايلاۋىنا قاتىسۋ ماسەلەسىن تەك پارتيانىڭ قۇرىلتايى شەشەدى. ارينە، ونى تالقىلاۋعا مىندەتتىمىز", - دەدى دەپۋتات پارلامەنت پالاتالارىنىڭ بىرلەسكەن وتىرىسىنان سوڭ.

ال وزگە پارتيالار ازىرگە ءۇنسىز.

Abai.kz