ۋكراين مەن ورىس حالقىنىڭ ءتۇر ءپىشىنى ءبىر. سىرتتان قاراعان ادام، ونىڭ قايسى ۋكراين، قايسى ورىس ەكەنىن ايىرمايدى.

ءتىپتى قازىرگى ەلىنەن قاشقان ورەكەڭ وزگە ەلدەردە ءوزىن باسقاعا ءبىز ۋكراينبىز دەپ تانىستىرىپ ءجۇر دەگەن دە اڭگىمە شىعىپ جاتىر.

ەكەۋىنىڭ ءدىنى دە ءبىر، ءبىر قۇدايعا شوقىنادى. ءتىپتى گەنەتيكاسى دا ۇقساس، ياعني قانى دا جاقىن ەكەن. ونى عىلىم دا دالەلدەدى. گەنەتيكاسى — جاقىن كلاسستەرلەردەن تۇرادى.

تاريحى دا استاسىپ جاتىر. كەزىندە سوۆەت وداعىن ءۇش ۋكراين شاتىس، ۋكراين تەكتى ازاماتتار باسقارعان ەكەن. حرۋششەۆ، برەجنەۆ، چەرنەنكو.
ول كەزدە قازاقتار بۇندايدان تىم الىس، اۋلاق بولدى، ولار كرەمل ماڭىنا جولاي المايتىن.

كەزىندە، سوۆەت زامانىندا اتاقتى مارشال - گەنەرالدار، عالىمدار، كوسموناۆتار دا وسى ۋكرايننان كوپ شىقتى.

قازىر — "مەنىڭ اتام ۋكراين ەدى" نەمەسە "اجەم ۋكراين ەدى", يا "مەنىڭ ايەلىم تاعى بىردەمەم ۋكراين ەدى" دەمەيتىن الەمدە ورىس جوق. ارالارىندا ارالاس نەكە وتە كوپ.

ءالى كۇنگە شەيىن ءپۋتيننىڭ جاقىن اينالاسى تولعان ۋكراين تەكتى، ۋكراين شاتىس ادامدار — كوۆالچۋك، تيمچەنكو، ماتۆيەنكو، كيريەنكو دەگەندەي..
ءبىر قاراعاندا ءپۋتيننىڭ ء"بىز ءبىر حالىقپىز" دەگەن ءسوزىنىڭ جانى بار سياقتى.
ايتكەنمەن، بۇل ەكەۋى ەكى بولەك حالىق. بۇلاردىڭ ەكى بولەك حالىق ەكەندىگىن ايشىقتاپ تۇرعان ەڭ ماڭىزدى فاكتور نە دەيسىز عوي.

ول — ءتىلى.

بىرەۋى ونى يازىك دەيدى، ەكىنشىسى موۆا دەيدى.

ەكى حالىق ەكى بولەك تىلدە سويلەيدى جانە قازىر كورىپ وتىرعانىمىزداي ول ەكى ءتىل ەكى ساناعا ەكى بولەك كوزقاراس قالىپتاستىرىپ، ولاردىڭ دۇنيەتانىمىنا قاتتى اسەر ەتەدى ەكەن.

بىرەۋى ازاتتىق دەيدى، وزىق وركەنيەتكە جاقىن بولعىسى كەلەدى، ەكىنشىسى مەشەۋلىككە، ەسكىلىككە، قۇلدىققا سۇيرەپ الەك. ەكى ءتىل — ەكى مادەنيەت قالىپتاستىرعان.

ءتىلدىڭ قۇدىرەتىن ەندى وزدەرىڭىز بايقاي بەرىڭىزدەر.

بۇ جەردە ءتىل دەگەن شىركىن ەكەۋىنىڭ اراسىنداعى باسقا جاقىندىقتىڭ ءبارىن تاس — تالقان عىپ جوققا شىعارىپ، "ەي سەندەر شاتاسپاڭدار، سەن اسانسىڭ، ال سەن ۇسەنسىڭ" دەپ ءبارىن ورىن - ورىندارىنا قويىپ ەكى دارا ۇلت بوپ

قالىپتاستىرىپ، ءتىپتى دۇرىس باعىت كورسەتىپ وتىرعان ءبىر قۇدىرەت كۇش بوپ وتىر. ءپۋتينشىل يمپەرشىلدەر وسى جەردە توسىلىپ وتىر.

ودان سوڭ تانىمى ءارتۇرلى، مادەنيەتى، ءتىلى بولەك حالىقتار ءبىر ءبىرىنىڭ قولىنا قارۋ الىپ كۇن استىندا ۇلت بولىپ، مەملەكەت بوپ ساقتالىپ قالۋى ءۇشىن قازىر جان الىسىپ جان بەرىسىپ جاتىر.

اناۋ جەڭىلسە ۇلت رەتىندە قۇريدى، مىناۋ جەڭىلسە يمپەريا رەتىندە قۇريدى.
بۇل ءتىل دەگەن سۇمدىق نارسە دەيمىن، سۇمدىق.

جالپى، ۇلتتى ۇلت قىپ قالىپتاستىراتىن جانە ساقتايتىن ءتىپتى باعىتىن نۇسقايتىن تەك قانا ونىڭ وسى ءتىلى ەكەن، تىلمەن ويناپسىزدار...

ءتىل — قۇدىرەت.

ولجاس ءابىل

Abai.kz