باسى: مايدانداعى ۋكراينا ارۋلارى: مارگاريتا ريۆچاچەنكو

جالعاسى: مايدانداعى ۋكراينا ارۋلارى: وكسانا رۋبانياك

جالعاسى: مايدانداعى ۋكراينا ارۋلارى: الەكساندرا

ۋكرايناداعى سوعىستا جەرى ءۇشىن جان بەرىپ جۇرگەن بۇگىنگى نازىك كەيىپكەرىمىز «قارلىعاش» ەسىمدى پارامەديك قىز. ول مايدانعا اتتانعانعا دەيىن كىتاپ جازىپ، سۋرەت سالىپ، شىعارماشىلىقپەن اينالىسقان.

ءوزى 24 جاستا، كىشى سەرجانت دەگەن شەنى بار.

– 24 اقپاندا تاڭەرتەڭ كوزىڭىزدى اشقاندا ەڭ ءبىرىنشى نە ويلادىڭىز، نە ىستەدىڭىز؟

– شىنىمدى ايتسام، قاتتى قورىقتىم. سوعىستىڭ باستالعانىنا سەنگىم كەلمەدى. باستالعان كۇنى اياقتالادى دەگەن ويعا سەنگىم كەلدى.

– سوعىسقا بارۋ تۋرالى شەشىمدى قالاي قابىلدادىڭىز؟

– 24 اقپاننىڭ كەشىندە بۇل سوعىستىڭ بىرنەشە ساعاتقا، نە بىرنەشە كۇنگە، ءتىپتى بىرنەشە ايعا عانا سوزىلمايتىنىن ءتۇسىندىم. سول كەزدە ۋكراينا قارۋلى كۇشتەرىنىڭ قاتارىنا قوسىلىپ، وتانىمىزدى قورعاۋعا ءوز ۇلەسىمدى قوسۋىم كەرەك دەپ شەشتىم. وسى ويمەن كەيىن ۋكراينا قارۋلى كۇشتەرىنىڭ اسكەري بولىمىنە اينالعان شەكارانى قورعاۋ كۇشتەرىنە بارىپ قوسىلدىم.

– بۇل جەردەگى قىزمەتىڭىز قانداي، كۇنىڭىز قالاي وتەدى؟

– مۇندا مەن سوعىس دالاسىندا مەديتسينالىق كومەك كورسەتۋمەن اينالىسامىن. العى شەپتەگى اسكەريلەردىڭ قاسىندا جۇرەمىن، ەشقايدا كەتپەيمىن. مەن جارالانعانداردى ەۆاكۋاتسيالاۋ بريگاداسىنا جەتكىزەتىن اداممىن. مەنىڭ ويىمشا، مەنىڭ ميسسيام وتە ماڭىزدى. مەن جارالى جاننىڭ ءتىرى قالۋى ءۇشىن ءبارىن ىستەيمىن. ونىڭ جاقىندارى مەن دوستارىن قايتا قۇشاعىنا الىپ، ارمانى مەن ماقساتىن ىسكە اسىرۋى ءۇشىن امان قالعانىن قالايمىن، سوندىقتان قولىمنان كەلگەن كومەكتى ايامايمىن.

مەنىڭ جۇمىسىم ادەتتە تەك قانا مەديتسينالىق كومەك كورسەتۋ عانا ەمەس، بۇكىل بولىمشەنىڭ ەم-دومىن جۇرگىزۋ. ءبىر بولىمشە – 30 ەر ادام. كۇندە اۋىرىپ كەلىپ جاتادى. كەيبىرىنىڭ تاماعى اۋىرادى، كەيبىرى جوتەلەدى.

بۇگىن كۇنىم تىنىش ءوتىپ جاتىر. سەبەبى ءبىز كونتۋزيا العان ادامداردى ەمدەپ جاتىرمىز. مەن قازىر ولارعا تابلەتكالار تاراتامىن، جارالانعانداردىڭ جاعدايىن باقىلايمىن، قۇجاتتامانى تولتىرامىن.

– ءسىزدىڭ بولىمشەڭىزدە گەندەرلىك كەمسىتۋشىلىك بار ما؟

– مەنىڭ بولىمشەم تۋرالى ونداي ەشتەڭە ايتا المايمىن. بارلىعى ءوز ورنىمەن. كەيدە ءبىر-بىرىمىزبەن ازىلدەسەمىز. بىراق كوڭىلگە تيەتىن سوزدەر ايتىلمايدى. مىسالى، جىگىتتەر ماعان اۋىر زاتتاردى كوتەرتپەۋگە تىرىسادى، كومەكتەسەدى، وسىلايشا مەنىڭ مۇنداعى ءومىرىمدى جەڭىلدەتەدى. بىراق وكوپتى ەرلەرمەن بىردەي قازامىن. ول جەردە ماعان كومەكتەسپەيدى (كۇلدى). ارينە، فيزيكالىق تۇرعىدان العاندا، وڭاي جۇمىس ەمەس.

– قانداي قيىندىقتاردى باستان كەشتىڭىز؟

– ماعان فيزيكالىق تۇرعىدان قيىن بولدى. شامامەن 20 كگ-نان استام جۇكتى كوتەرىپ جۇرەمىن. ونىڭ ىشىندە برونەجيلەت، كاسكا، اۆتومات، اسكەري جابدىق، جولدوربا، مەدبيكە دورباسى كىرەدى. ءوز سالماعىمنىڭ جارتىسىنداي جۇكتى ۇنەمى كوتەرىپ جۇرۋگە، كەيدە جۇگىرۋگە تۋرا كەلەدى.

– تولىققاندى سوعىس كەزىندە ءسىزدى نە تاڭعالدىردى؟

– مەنى تاععالدىرعان نارسە كوپ. اسىرەسە، رەسەيلىكتەردىڭ ۋكرايندارعا دەگەن قانپەزەر قارىم-قاتىناسى. ولار باسىپ العان جەرلەردىڭ تۇرعىندارىنا مالعا قاراعانداي قارايدى. بۇل وتە سۇمدىق جاعداي.

– قازىر ءسىزدىڭ رۋحىڭىزدى تۇسىرمەي تۇرعان نە؟

– رۋحىمدى سىندىرماي تۇرعان نارسە – وسى ءىسىمنىڭ بەكەر ەمەستىگى. مەنىڭ وتباسىم بار. جارىم ەكەۋمىز ءبىر بولىمشەدەمىز. مەنىڭ بولاشاققا قۇرعان جوسپارلارىم بار. بىرنەشە كىتاپ باسىپ شىعارعىم كەلەدى. باسىپ الىنعان مەليتوپولدە اجەم ءومىر سۇرەدى. سول ءۇشىن ءومىر سۇرۋگە قۇلشىنامىن، كۇرەسەمىن.

– ۋكراينانىڭ بولاشاعىنان قانداي پەرسپەكتيۆالاردى كورەسىز؟

– مەن بۇل سۇراققا قالاي جاۋاپ بەرەرىمدى بىلمەيمىن، ويتكەنى بۇعان دەيىن كوپتەگەن سالادان الىس بولدىم. كىتاپ جازىپ، سۋرەت سالاتىنمىن. مەن بەيبىتشىلىك ورناعانىن قالايمىن، سوعىستان كەيىن ءبارىمىز ۋكراينانى قالپىنا كەلتىرىپ، ەكونوميكاسىن كوتەرەمىز. ءتۋريزمنىڭ دامىعانىن قالايمىن. مەنىڭ ويىمشا، كوپتەگەن شەتەلدىكتەر سوعىستان كەيىن ۋكرايناعا كوپ ساپارلايدى.

– سوعىستان كەيىن ومىرىڭىزدەگى نە نارسەنى ماڭگىلىككە وزگەرتەسىز؟

– شىن مانىندە، سوعىس مەنى الدەقاشان وزگەرتتى. تانكتىڭ نىساناسىندا تۇرعانىڭدا، ۇستىڭە سنارياد قۇلاپ كەلە جاتقاندا، ەكى سەكۋندتا بۇكىل ءومىرىڭ كوز الدىڭنان وتەدى. مۇندايدا مەن وزگەرمەدىم دەپ ايتا المايسىڭ. وتە قورقىنىشتى ءسات. دەمىڭ تارتىلىپ، دەنەڭ بۇرىسە باستايدى. ەكى سەكۋند سايىن بۇكىل عۇمىرىڭدى ساراپقا سالىپ شىعاسىڭ. مەنىڭ تۇيىق مىنەزىم تانك وعىنىڭ استىندا قالعانىمدا ۇشتى-كۇيلى جوعالدى. سوعىستان كەيىن اشىق-جارقىن مىنەزدى بولاتىن شىعارمىن. ءبىز قورشاۋدان شىققان كەز – مەنىڭ ومىرىمدەگى ەڭ قۋانىشتى ءسات بولدى. ەكى ساعاتتان كەيىن ءبىز جاققا جاۋدىڭ تانكى اتقىلاي باستادى. مۇندايدا وزگەرمەدىم دەۋ مۇمكىن ەمەس.

– ۋكراينالىقتار مەن الەمگە نە ايتاسىز؟

– مەن ۋكراينالىقتارعا بۇل ومىردە مۇمكىن ەمەس نارسە جوق دەگىم كەلەدى. مەديتسينالىق كولىك الۋ ءۇشىن 100 مىڭ گريۆەندى جيناۋ مۇمكىن ەمەس دەپ ويلايتىن ەدىم. بىراق ءبىز سۇراعانىمىزدان دا ەكى ەسە كوپ جينادىق. بۇل شىنىمەن كەرەمەت جاعداي. مەن ونى كۇتكەن جوقپىن.

ۋكراينالىقتاردىڭ كۇشى – بىرلىكتە. ۋكراينالىقتاردىڭ كۇشى – الاپات. ءبىز ءبىر-ءبىرىمىزدى قولداۋىمىز كەرەك. وزىمىزگە سەنۋىمىز كەرەك، جەڭەتىنىمىزگە سەنۋىمىز كەرەك.

دايىنداعان ايجان تەمىرحان

Abai.kz