2022 جىل – قازاقستان ءۇشىن پارتيا جاۋعان جىل بولدى. ارينە وعان «قاسىرەتتى قاڭتار وقيعاسى» قوزعاۋشى بولعانى انىق. بيىل 30 جىلدان بەرى ساياسي ۇيقىدا جۇرگەن بەلسەندىلەر تەگىس ساياسات الاڭىنا ءبىر كىسىدەي بىلەك سىبانا كىرىستى دەسەك ارتىق ايتقاندىق بولا قويماس. «بالاپاندى كۇزدە سانا» دەمەكشى پرەزيدەنت سايلاۋىنىڭ الدى-ارتىندا ولاردىڭ كوبىنىڭ اۋسەلەسى بەلگىلى بولىپ، جاڭا تۇلعالار الدىن وراپ كەتىپ جاتقان ءجايى بار.

توقاەۆتى 7 جىلعا قايتا سايلاپ العان جۇرتتىڭ ەندىگى نازارى كەلەر جىلى كوكتەمدە وتەتىن پارلامەنت سايلاۋىندا. قانداي پارتيالاردىڭ تىركەۋدەن ءوتىپ، ۇكىمەتتى تاۋبەسىنە تۇسىرەتىن جاڭا پارلامەتتىڭ قۇرامىندا كىمدەر بولاتىنى كوپتىڭ ساياسي بەلسەندىلىگىن وياتىپ وتىر.

انە-مىنە دەگەنشە رەسمي تىركەۋدەن وتكەن پارتيالار دا بەلگىلى بولا باستادى. جاقىندا عانا «بايتاق» جاسىلدار پارتياسىنىڭ جەتەكشىسى ازاماتحان ءامىرتاي مىرزا ەكولوگيالىق ماسەلەنى قاۋزايتىن پارتياسىنىڭ بىرنەشە جىلدان بەرگى تالپىنىس ناتيجەسىندە بارلىق وتكەلدەن وتكەنىن جاريالادى.

«بايتاق» پارتياسى مەملەكەتتىك تىركەۋدەن ءوتتى. بۇل مەنىڭ جانە مەنىڭ مۇددەلەستەرىمنىڭ جەڭىسى. دۇنيەگە زاڭدى تۇردە جاسىلدار پارتياسى كەلدى. بۇل حالىق ءۇشىن ورتاق جەڭىس، ورتاق قۋانىش بولۋى ءتيىس!

ءبىز «بايتاقتىقتار» 2015 جىلى ەكولوگيالىق قوزعالىس قۇرىپ، سونىڭ نەگىزىندە پارتيا قۇرىپ وتىرمىز. پارتيا قۇرۋ جونىندەگى العاشقى ۇيىمداستىرۋ كوميتەتى 2019 جىلى شاقىرىلعان. سول ۋاقىتتان بەرى پارتيامىزدى تىركەتۋگە قۇجات تاپسىرىپ كەلدىك. جالپى، 18 رەت تىركەلۋگە تالپىنىس جاساپپىز.

سوڭعى رەت 23 تامىزدا قۇجات تاپسىرىپ، 24 قىركۇيەكتە قۇرىلتايشىلىق سەزىن وتكىزۋگە رۇقسات الدىق. ەندى مىنە، مەملەكەتتىك تىركەۋدەن وتتىك»، - دەپ اعىنان جارىلدى.

بۇقارالىق اقپارات قۇرالدارى دا «قازاقستانجا اراعا جيىرما جىل سالىپ، تاعى ءبىر پارتيا تىركەلدى» دەپ شۇيىنشىلەدى. تاعى تىركەلۋدى كۇتىپ تۇرعان 10-12 پارتيا بار ەكەن.

ازاماتحاننىڭ العا وزۋى كوپ ۋاقىتتان بەرى پارتياسىن تىركەتە الماي جۇرگەن ەسكى وپپوزيتسيونەرلەر مەن جاڭا وپپوزيتسيونەرلەردىڭ وكپەسىن تۋدىرعانى انىق. وزدەرىنىڭ «بيلىكتىڭ جوباسى» دەپ ءبىر شىبىقپەن ايدايتىن ەسكى اۋەندەرىنە باسىپ، تۋلاپ جاتىر ەكەن. ولار تانىمال كاسىپكەرلەر سىرىمبەك تاۋ، قۋانىش شومباي قاتارلىلار قۇرعان، كۇنى كەشە العاشقى سيەزىن وتكىزگەن «رەسپۋبليكا» پارتياسىنا دا سونداي قالپاقتى كيگىزۋدە.

سايلاۋ كەزىندە عانا ساياسي بەلسەندىلىگى وياناتىن ساناۋلى پارتيالاردىڭ جاڭا قازاقستاننىڭ ساياسي ومىرىنە جان كىرگىزە الماسىن بيلىك ستراتەگتەرى جاقسى ءبىلىپ وتىر. جاڭا پارتيالاردىڭ 2009 جىلدان بەرگى قالاپتاسقان قاساڭ قالىپتى بۇزىپ، رەسمي تىركەۋدەن وتە باستاۋى سونى اڭعارتادى. جالاڭ، ءبىر جاقتى ساياسي تالاپ قويۋدىڭ ەشتەڭە بەرمەگەنىن حالىق تا تۇسىنگەنى دۇرىس. ناقتى ماسەلەمەن اينالىساتىن «بايتاق» سياقتى پارتيالاردىڭ ساياسي ومىرگە ارالاسقانى قۇبا-قۇپ. جاڭا قازاقستاندا ولليگارحتاردىڭ قولىنان سۋ ىشەتىن پارتيالارعا ورىن جوق. ينتەرنەت داۋىرىندە تانىمال بولعان بيزنەسمەندەردىڭ دە ساياسي الەۋەتىنە باعا بەرەتىن دە، ساياسي ساحنادا بيزنەستەگىدەي تابىسقا جەتەتىنىن بەلگىلەيتىن دە سايلاۋشى حالىق. تىركەۋلەن وتكەن پارتيالار قاتارى كوبەيە بەرسىن دەپ تىلەيىك.

Abai.kz