جىل سايىن رەسەي باسشىسى ۆلاديمير پۋتين پەتەربور قالاسىندا تمد ەلدەرىنىڭ باسشىسىن جيناپ، جەلتوقساننىڭ سوڭىندا بەيرەسمي باسقوسۋ فورماتىندا جيىن وتكىزەدى. ادەتتە جيىن 25 جەلتوقساننان كەيىن بولادى. بيىل تمد باسشىلارى 26-27 جەلتوقساندا ەلتسين اتىنداعى پرەزيدەنتتىك كىتاپحانادا باس قوستى. 

نەگە ماسكەۋ ەمەس، نەگە پەتەربور؟ ساراپشىلار پۋتين پەتەربوردى رەسەي يمپەرياسىنىڭ استاناسى بولعانى ءۇشىن تاڭداعانىن ايتادى. "بۇل ءبىر جاعىنان رەسەيدىڭ يمپەريالىق پيعىلىن كورسەتسە، ەكىنشى جاعىنان ءپۋتيننىڭ ءوزىن پاتشا ءتارىزدى سەزىنەتىنىنىڭ كورىنىسى" دەيدى.

بەيرەسمي باسقوسۋدا تمد باسشىلارى وتكەن جىلدىڭ قورىتىندىسىن جاساپ، كەلەر جىلعا ەكونوميكالىق، ساياسي جانە اسكەري سالادا ارىپتەستىكتى جوسپارلايدى. تمد-عا مۇشە مەملەكەتتەر اراسىندا كيكىلجىڭدەر بولسا، ولاردى شەشۋگە تىرىسادى. 2022 جىلى تمد-عا مۇشە مەملەكەتتەر اراسىندا قارۋلى قاقتىعىستار ارتتى، ەسكى قاقتىعىستار ۋشىقتى.

بۇ جولى جيىندا پۋتين كەلگەن باسشىلارعا ەرەكشە سىيلىق بەردى. كرەمل باسشىسى تمد كلۋبىنا مۇشە ەل باسشىلارىنا "س نوۆىم گودوم 2023" اتتى جازۋى بار التىن ساقينا سىيلاعان. سىيلىقتىڭ بەرىلگەنى جايلى اقپارات العاش رەت بەلارۋس باسشىسى لۋكاشەنكونىڭ ساياساتىن ناسيحاتتايتىن  "پۋل پەرۆوگو" تەلەگرام ارناسىندا پايدا بولدى. سۋرەتى دە جاريالاندى.

ساقينا لۋكاشەنكو، پۋتين، قاسىم-جومارت توقاەۆ، سادىر جاپاروۆ، سەردار بەردىمۇحامەدوۆ، ەمومالي راحمون، يلحام اليەۆ، شاۆكات ميرزيوەۆ پەن نيكول پاشينيانعا ارنالىپ جاسالعان. جاريا تۇردە ساقينانى بەلارۋس باسشىسى لۋكاشەنكو عانا تاقتى، سول ارقىلى ءپۋتيندى "ناقتى ءارى سوڭىنا دەيىن قولدايمىن" دەگەن ىم-يشارا بىلدىرسە كەرەك.

پەسكوۆ ساقينالارعا قاتىستى بىلاي دەيدى: "بۇل ساقينالارعا اسا ءمان بەرۋدىڭ قاجەتى جوق. بۇل بار بولعانى جاڭا جىلدىق سىيلىق قانا". ول ساقينانى ءپۋتيننىڭ تاقپايتىنىن ايتتى.

ساقيناعا قاتىستى الەۋمەتتىك جەلى قولدانۋشىلارى ءتۇرلى جورامالدار ايتىپ، ازىلدەپ جاتىر. ءبىرى ايگىلى "ساقينالار ءامىرشىسى" فيلمىمەن سالىستىرسا، ەندى ءبىرى "بۇل بەيرەسمي بىرلەستىك نىشانى بولۋى مۇمكىن" دەپ جازۋدا.

كا مىرزا

Abai.kz