تمد-عا مۇشە مەملەكەتتەر باسشىلارى كەڭەسىنىڭ وتىرىسىندا قازاقستان پرەزيدەنتى قاسىم-جومارت كەمەلۇلى توقاەۆتىڭ ۇسىنىسىن قولداپ، رف پرەزيدەنتى ۆلاديمير پۋتين تمد-دا 2023 جىلدى «ۇلتارالىق قاتىناس ءتىلى رەتىندە ورىس ءتىلى جىلى» دەپ جاريالاۋ تۋرالى شەشىم قابىلدانعانىن ايتتى.

«...تمد اياسىندا ورىس ءتىلىن ناسيحاتتاۋ جونىندەگى حالىقارالىق ۇيىم قۇرۋ. ارينە، ءبىز بۇل باستامانى جۇزەگە اسىرۋعا بارىنشا كومەك كورسەتەمىز. بۇل – قازاقستان پرەزيدەنتىنىڭ يدەياسى. بۇل ۇسىنىستى ول مەنىمەن ءسال ەرتەرەك ءبولىستى. رەسەي بۇل باستامانى قولداماي تۇرا المايدى»، – دەدى ول.

تمد اياسىندا ورىس ءتىلىن ناسيحاتتاۋ جونىندە پرەزيدەنتتەردىڭ ويلاستىرعان شارۋاسى بار شىعار. دەگەنمەن، مەن دە ءوز تاراپىمنان مىناداي ويلارىممەن بولىسكىم كەلەدى.

تاۋەلسىز مەملەكەتتەر دوستاستىعى مەملەكەت بولىپ تابىلمايدى جانە ول ءوزىنىڭ بارلىق مۇشەلەرىنىڭ تاۋەلسىزدىگى مەن تەڭدىگىنە نەگىزدەلگەن. سوندىقتان تاۋەلسىز مەملەكەتتەر دوستاستىعىنا مۇشە ازەربايجان، ارمەنيا، بەلارۋس، قازاقستان، قىرعىزستان، مولدوۆا، رەسەي، تاجىكستان، وزبەكستان ەلدەرىنىڭ مەملەكەتتىك تىلدەرى دە ءبىر-بىرىنە تاۋەلدى ەمەس. دەگەنمەن كوركەم ادەبيەت ۇلت پەن ۇلتتى، ءار الۋان حالىقتى رۋحاني جاعىنان جاقىنداستىرا تۇسەدى. سوندىقتان ادەبيەتتىڭ ءبىر سالاسى كوركەم اۋدارمانى كەڭىنەن ورىستەتۋ كەرەك.

ءبىزدىڭ كلاسسيكالىق ادەبيەتىمىز ورىس تىلىنە ءبىرشاما اۋدارىلعان. بىراق، ازەربايجاننىڭ، ارمياننىڭ، بەلورۋستىڭ، قازاقتىڭ، قىرعىزدىڭ، مولدوۆاننىڭ، ورىستىڭ، تاجىكتىڭ، وزبەكتىڭ تاۋەلسىزدىك العاننان كەيىنگى ءوزارا ادەبي قارىم-قاتىناسى بۇرىنعى دەڭگەيمەن سالىستىرعاندا تومەندەپ كەتتى. بۇل تىلدەردە جازىلعان كوركەم شىعارمالار قازىر بىرىككەن ۇلتتار ۇيىمىنىڭ تىلدەرىندە ەركىن سويلەپ تانىلۋعا ءزارۋ. ورىس ءتىلى – بىرىككەن ۇلتتار ۇيىمىنىڭ ءتىلى. سول سەبەپتى 2023 جىلى ازەربايجاننىڭ، ارمياننىڭ، بەلورۋستىڭ، قازاقتىڭ، قىرعىزدىڭ، مولدوۆاننىڭ، تاجىكتىڭ، وزبەكتىڭ سوڭعى شيرەك عاسىردا جاسالعان جاڭا كوركەم ادەبيەتى ورىس تىلىنە ساپالى تارجىمەلەنىپ، تمد ەلدەرىنە كەڭىنەن تاراتىلۋى كەرەك. بىرىككەن ۇلتتار ۇيىمىنىڭ ءتىلى – ورىس تىلىنە اۋدارىلعان كوركەم ادەبيەت، ول مەيلى قاي تىلدەن جاسالسا دا ءبارىبىر، ورىس ادەبيەتىن بايىتادى.

ءارى بۇل تاۋەلسىز مەملەكەتتەر دوستاستىعى شەڭبەرىندە ورىس ءتىلىنىڭ ابىرويىن اسىراتىن يگى شارۋا بولىپ تابىلادى. البەتتە رف پرەزيدەنتى ۆلاديمير ءپۋتيننىڭ «ءبىز بۇل باستامانى جۇزەگە اسىرۋعا بارىنشا كومەك كورسەتەمىز» دەگەن ءسوزى ءبىزدى ۇمىتتەندىرەدى...

بايبوتا قوشىم-نوعاي

Abai.kz