ءۇش جىلدان بەرى قىتاي جۇرتىن قاتاڭ قۇرساۋدا ۇستاپ كەلگەن كوممۋنيستىك بيلىك جەلتوقساننىڭ جەتىسىندە كارانتين شارالارىن الىپ تاستايتىنىن مالىمدەدى. ميللياردتار ەلىن اشسا الاقانىندا، جۇمسا جۇدىرىعىندا ۇستاپ كەلگەن وكتەم بيلىكتىڭ اياق استىنان جۇمسارۋىنا ەل ءىشى-سىرتىنداعى ساراپشىلاردىڭ جاۋابى ءار الۋان.

بىرەۋلەر «ورشىگەن پاندەميانى اۋىزدىقتاۋعا الدەرى كەلمەدى» دەسە، ەندى بىرەۋى «دۇنيەجۇزىلىك دەنساۋلىق ساقتاۋ ۇيىمى بيىل ءۇش جىل ادامزاتتى الەككە سالعان ءتاج تاجالدىڭ السىرەگەنىن، ادامزاتتىڭ بۇل سىناقتان دا امان وتكەنىن جاريالاۋى كەرەك ەدى، قىتاي بيلىگى ەلدەن ەرەك وقشاۋ قالماۋ ءۇشىن كارانتيندى جەدەل الىپ تاستاۋعا ءماجبۇر بولدى»، - دەيدى.

قازان ايىنداعى ەكونوميكالىق كورسەتكىشتەر الەمنىڭ ماڭداي الدى فابريكاسى سانالاتىن قىتايدىڭ تاۋار ەكسپورتى قىرىق جىلدان بەرگى ەڭ تومەنگى دەڭگەيدى كورسەتكەن. قاتاڭ كارانتين شارالارى ساۋدا اينالىمىنا اسەر ەتكەندىكتەن جەرگىلىكتى بيلىك ورگاندىرىنىڭ قارجىلىق الەۋەتىن قيىنداتقان.

ۇرىمجىدە شىققان قايعىلى ورتتەن كەيىن قىتايدىڭ ءىرى قالالارى مەن جوعارى وقۋ ورىندارىندا «اق پاراق» ەرەۋىلىنىڭ كەڭ اۋقىمدا جۇرگەنى بەلگىلى. جوعارداعى ەكى فاكتوردى العا تارتقان ساياسي ساراپشىلار «كوممۋنيتىك بيلىكتى كارانتيندى الۋعا يتەرمەلەگەن: كارانتين كەسىرىنەن تۇرالاعان ەكونوميكا مەن ەل ىشىندەگى بيلىككە دەگەن نارازىلىقتىڭ كۇشەيۋى»، - دەپ پايىمدايدى.

جەلتوقساننىڭ 24-كۇنى قىتاي بيلىگى كوروناۆيرۋستى قاتارداعى تۇماۋ ساناتىنا جاتقىزىپ، ناۋقاستاردى ارنايى تىركەۋ وتىرۋدى ەندىگارى قاجەتسىز دەپ جاريالادى. سونداي-اق، شەتەلگە شىعۋعا نيەتى بارلارعا پاسپورت جاساۋ جۇمىسىن قاۋىرت قولعا الاتىنىن مالىمدەدى. 26-كۇنى يتاليانىڭ ميلان قالاسىنا ۇشىپ بارعان ەكى ۇشاق قىتايلىق تۋريستەردىڭ تەڭ جارتىسىنان پاندەميا انىقتالعانى الەم اقپاراتىن شۋلاتتى. يتاليانىڭ ۆيرۋسولوگتارى ەۋروپالىق ارىپتەستەرىمەن بىرلەسىپ، ميلليارد حالىقتى باۋداي ءتۇسىرىپ جاتقان ۆيرۋسقا تالداۋ جاسايتىنىن مالىمدەدى. ارتىنان ساراپتاما قورتىندىسىن جاريالاپ، ەشقانداي وزگەرگەن ءتۇرى ەمەس، كادىمگى وميكرون ۆيرۋسى ەكەنىن جەتكىزدى. يتاليادا بولعان جاعداي جاپونيادا دا قايتالاندى. ولارعا قوسىلىپ كورەيا، تايۋان، ينپانيا، فرانتسيا، اقش قىتايلىق تۋريستەردەن پتر تەستىن تالاپ ەتەتىن بولدى. سولتۇستىك كورەيا مەن ماراككو ەسىگىن تارس جاپتى.

وتكەن سارسەنبى كۇنى قىتاي تاراپىن «توسەك تارتىپ اۋىرعان ناۋقاستاردىڭ ناقتى سانىن، ءولىم كورسەتكىشىنىڭ ناقتى تسيفرىن بەرمەدى» دەپ ايىپتاپ كەلگەن دۇنيەجۇزىلىك دەنساۋلىق ۇيىمى قىتاي دا ءورشىپ تۇرعان ۆيرۋستىڭ وميكرون ۆيرۋسىنىڭ ەڭ جىلدام تارايتىن XBB ءتۇرى ەكەنىن جاريالادى. بۇل ۆيرۋستىڭ جۇعۋى وتە جىلدام بولعانىمەن، زاردابى العاشقى كەزدەگىدەي اۋىر ەمەس ەكەن. دەسە دە قىتايداعى جاعدايدىڭ قانشالىق اۋىر ەكەنىن، الەم ەلدەرىن قاي ۋاقتا دەيىن ابىر-سابىر ەتەتىنىن ەشكىم بىلمەيدى.

ءۇش جىلدان بەرى الەمدەگى پاندەميا جاعدايىنا ساراپتاما جاساپ كەلە جاتقان انگليانىڭ اتاقتى ساندىق تەحنلوگياعا سۇيەنگەن ساراپتاما ورتالىعى Airfinity: «قاڭتاردىڭ ون ۇشىندە قىتايداعى پاندەميا العاشقى شارىقتاۋ شەگىنە جەتەدى. كۇنىنە 3 ميليون 700 مىڭ ادام ۆيرۋس جۇقتىرادى» دەيدى. قىتاي تارابى بۇگىننەن باستاپ شەتەلدىكتەرگە قاراتقان بارلىق شەكتەۋدى الىپ تاستايدى.

ەسبول ۇسەنۇلى

Abai.kz