تاۋەلسىزدىك العان سوڭ جىنىس ازاتتىعى قاتارلى باتىستىڭ مادەني ەكسپانتسياسىنا تاپ بولعان ءبىز سياقتى ەمەس، ءۇندى ەلىنىڭ ۇزاق جىلدار بويى اعىلشىنداردىڭ بوداۋىندا بولعانى بەلگىلى. جىل سايىن اقپاننىڭ ون تورتىندە تويلاناتىن عاشىقتار كۇنى، انىعىندا، «اۋليە ۆالەنتين كۇنى» ءبىزدى عانا ەمەس، حالىق سانى ميللياردتان اسقان ءۇندىستان بيلىگىن دە الاڭداتىپ وتىر ەكەن.

باتىستان كەلگەن بۇل مەرەكەنىڭ ىقپالىن ازايتىپ، ورىنىن ۇلتتىق قۇندىلىقتارعا اۋىستىرۋ ءۇشىن ءۇندىستاننىڭ «حايۋاناتتاردى قورعاۋ ۇيىمى» اقپاننىڭ 6-كۇنى «عاشىقتار كۇنىن» «سيىرمەن قۇشاقتاسۋ كۇنى» ەتىپ وزگەرتۋ تۋرالى قاۋلى شىعارىپتى.

ۇندىلىكتەردىڭ سيىردى ءپىر تۇتاتىنى، كيەلى سانايتىنى، بايلىق پەن باقىتتىڭ نىشانى سانايتىنى بەلگىلى. ءبىز سياقتى «جەردى كوتەرىپ تۇرعان كوك وگىزدىڭ ءمۇيىزى تالىپ، ەكىنشىسىنە اۋىستىرعاندا جەر سىلكىنەدى» دەپ ەمەس، «سيىردىڭ قانى كوپ اقسا جەر سىلكىنەدى» دەپ سەنەدى ەكەن. وكىنىشكە وراي «اۋليە ۆالەنتين» كۇنىنە دەگەن كوپتىڭ ىقىلاسىن – كيەلى پىرلەرىنە دەگەن سۇيىسپەنشىلىككە اۋىستىرۋعا تالپىنعان اتالمىش ۇيىمنىڭ باستاماسى قولداۋ تاپپاپتى.

ساياساتتانۋشىلارى ونى «ءدىن مەن ساياساتتى جاقىنداتۋدىڭ تاعى ءبىر كورىنىسى» دەپ باعالاسا، الەۋمەتتىك جەلى پايدالانۋشىلارى سيىردىڭ قۇشاقتاۋعا كونبەي، ءۇي اينالا قاشقان بەينە جازبالاردى سالىپ، «سيىر قۇشاقتاعاندى ەمەس، سيپاعاندى دا بىلمەيدى ەكەن»، «سيىردىڭ رۇقساتىن الۋ قيىننىڭ قيىنى ەكەن» دەپ سان-ساققا جۇگىرتىپتى.

«اۋليە ۆالەنتين» كۇنىن وزگەرتۋگە تالپىنعان ءۇندى تارابىنىڭ تالپىنىسى سولشىلدىق يدەيانى جىمسىما جولمەن تىقپالاپ وتىرعان باتىستىڭ الپاۋىت اقپارات قۇرالدارىنىڭ نازارىن اۋدارىپتى. عاشىقتار كۇنىمەن كۇرەسۋدىڭ جاڭا ۇلگىسىن ويلاپ تاپقان اتالمىش ۇيىم قارشا بوراعان اقپاراتتىق شابۋىلعا قارسى تۇرا الماي، امالسىزدان، شەشىمدەرىن وزگەرتۋگە ءماجبۇر بولىپ، 10-اقپان كۇنى اتالمىش قاۋلىنىڭ كۇشىن جويىپتى.

ۇندىلەردىڭ مەملەكەت اتاسى گانديدەن تارتىپ، قازىرگى باسشىسى مودي دە سيىرعا تابىناتىن، ەسكى نانىمنىڭ ادامى ەكەن. ساياسي باياندامالارىن الدىمەن زەڭگى بابا تۇقىمىنا ماداق ايتۋدان باستايدى ەكەن. ءۇندى بيلىگىنىڭ جاستارعا باتىستىڭ عاشىقتار كۇنىن تويلاتپاي، ۇلتتىق قۇندىلىقتاردى جاڭعىرتۋ ارەكەتىنىڭ ناتيجەسىز اياقتالۋى –ينتەرنەت، الەۋمەتتىك جەلىنىڭ ادامداردىڭ ساناسىنا، تانىمىنا قانشالىق اسەر ەتىپ جاتقانىن، جاستاردى ءداستۇرلى قۇندىلىقتان ايىرىپ مۇلدە باسقا جولعا ءتۇسىرىپ جاتقانىن كورسەتەدى.

ەسبول ۇسەنۇلى

Abai.kz