باس پروكۋراتۋرا اباي وبلىسىنداعى ورمان ورتىنە قاتىستى قوزعالعان قىلمىستىق ءىس بويىنشا قر تجم ەكس-ءمينيسترى يۋري يليننەن، اباي وبلىسىنىڭ اكىمى نۇرلان ۇرانحاەۆتان، شقو اكىمى دانيال احمەتوۆ پەن قر ەكولوگيا ءمينيسترى ءزۇلفيا سۇلەيمەنوۆادان جاۋاپ الىناتىنىن مالىمدەدى.

بۇل تۋرالى قر باس پروكۋرورىنىڭ ورىنباسارى جاندوس ومىراليەۆ ايتتى. ومىراليەۆتىڭ ايتۋىنشا، اباي وبلىسىنداعى ورمان ورتىنە بايلانىستى قىلمىستىق ءىس قوزعالعان. ول ءىس بويىنشا قىزمەتىنە سالعىرت قاراعان لاۋازىمدى تۇلعالاردان جاۋاپ الىنادى.

«تەرگەۋ ەندى عانا باستالدى. قىزمەتتەرىنە سالعىرت قاراعاندار تۇگەل جاۋاپقا تارتىلادى. قازىرگى باستى ماقسات – ءورتتى ءسوندىرۋ. سوندىقتان لاۋازىمدى تۇلعالاردى ارتىق مازالاپ جاتقان جوقپىز. بىراق، ءوز مىندەتىنە سالعىرت قاراعان، ناتيجەسىندە ولاردىڭ سالعىرتتىعى قايعىلى وقيعاعا سەبەپ بولعان لاۋازىمدى تۇلعالاردىڭ بارلىعى انىقتالادى. ءورت تولىق سوندىرىلگەننەن كەيىن ولاردىڭ بارلىعىنان جاۋاپ الىنادى. لاۋازىمدى تۇلعالاردىڭ ارەكەتىنە ازىرگە باعا بەرىلگەن جوق»، - دەيدى ومىراليەۆ.

ومىراليەۆتىڭ ايتۋىنشا، اباي وبلىسىنداعى ورتكە قاتىستى ەكى قىلمىستىق ءىس قوزعالعان. ولار: «ەكى نەمەسە ودان دا كوپ ادامنىڭ ولىمىنە اكەلگەن ءورت قاۋىپسىزدىگى ەرەجەلەرىن ساقتاماۋ» جانە «سالعىرتتىق».

8 ماۋسىمدا باستالعان اباي وبلىسىنداعى ورمان ءورتى ءالى تولىق اۋىزدىقتالعان جوق. قر توتەنشە جاعدايلار ءمينيسترىنىڭ سوڭعى مالىمدەمەسىندە ءورتتىڭ اۋماعى ازايعانى، ەلدىمەكەندەرگە قاۋىپ جوق ەكەنى ايتىلعان.

Abai.kz