«سوعىستا رەسەي جەڭىلمەيدى»، وسىلاي دەپ مالىمدەدى ەلورداعا قوناق بولىپ كەلگەن رەسەيلىكتەر. اrasha.kz سايتى استاناداعى رەسەيلىكتەردەن رەسەي-ۋكراينا سوعىسى تۋرالى سۇراپ، پىكىر الىپتى.

باسىلىمنىڭ جازۋىنشا، سوعىستى قولداۋشى دا، داتتاۋشى دا بار. بىراق ولار ءبىراۋىزدان «رەسەيگە جەڭىس تىلەيدى» ەكەن. بۇنىڭ سەبەبى، ەلگە قايتىپ بارعاندا «قۋعىنعا ۇشىرايمىن» دەپ قورقۋدان بولۋى دا مۇمكىن.

«ءوزىن سەرگەي دەپ تانىستىرعان رەسەيلىك ازامات ەكى ەلدىڭ اراسىنداعى سوعىستى ارنايى وپەراتسيا دەپ اتادى. وسى كوزقاراسىنان-اق ونىڭ ۋكرايناعا قارسى سوعىستى قولدايتىنىن اڭعاردىق»، دەپ جازىلعان ماقالادا.

رەسەي پروپوگانداسىنا ۋلانعان سەرگەي سوعىستى باستاعان ۋكراينا ەكەنىنە سەنىمدى.

«ۋكراينا 2014 جىلى كيەۆتىك رەجيم دونباستى اتقىلاۋدان كەيىن سوعىس باستالدى. ءسىز وقيعانىڭ حرونيكاسىنا نازار اۋدارىڭىز. وتكەن كەزەڭگە كوز جۇگىرتسەڭىز جاعدايدىڭ قالاي بولعانىن بايقايسىز. اقىلدى بولۋ كەرەك»، - دەدى ول.

رەسەيلىك ازامات باتىس پەن اقش-تىڭ سانكتسيالارىنان كرەملدىڭ مۇرتى دا قيسايمايدى، كەرىسىنشە كۇشەيە تۇسەدى دەيدى.

«سانكتسيانى كۇشەيتكەن سايىن رەسەي ودان دا مىقتى بولا تۇسەدى. سانكتسيا كۇشەيگەن سايىن بىزگە جاقسى بولادى. مۇنى كەز-كەلگەن رەسەيلىك ايتىپ بەرەدى»، - دەدى سەرگەي.

ونىڭ ويىنشا، ءار 4-8 جىل سايىن پرەزيدەنتىن وزدەرى سايلاپ الاتىن ۋكراين حالقىنان گورى، بيلىكتە 20 جىل وتىرعان ءپۋتينى بار رەسەيلىكتەر دەموكراتيا ۇعىمىن جاقسىراق تۇسىنەدى.

«كەرىسىنشە رەسەيدە دەموكراتيا بار. پۋتين نەگە بيلىكتە 20 جىل بويى وتىر. سەبەبى وعان حالىق سەنىم ارتىپ وتىر. سوندىقتان دا سايلاۋدا سونى تاڭدايدى. ءبىز پۋتينگە سەنەمىز. ونىڭ ەلدە نە ىستەپ جاتقانىن كورىپ وتىرمىز. ول بيلىككە كەلگەننەن كەيىن ەلدە جەمقورلىقپەن كۇرەس باستالدى، كەدەيشىلىك جانە جۇمىسسىزدىقپەن كۇرەستى. ءبىز مۇنىڭ ءبارىن كورىپ وتىرمىز. سوندىقتان دا ءبىز ونى سايلاپ وتىرمىز. مىنە دەموكراتيا»، - دەيدى ەلوردا قوناعى.

ال، الەكسەي اتتى رەسەيلىك سوعىسقا ءوز ەلىن كىنالادى. ول «ۋكراينا رەسەيگە شابۋىل جاساعان جوق، بىراق رەسەي بۇل سوعىستا جەڭىلمەيدى»، دەيدى.

ايتا كەتەيىك، 2022 جىلى 25 اقپاندا رەسەي ۋكرايناعا باسىپ كىرگەننەن كەيىن، رەسەيلىكتەر ەلدەن كەتە باستادى. بىلتىر ءىىم 2022 جىلعى قاڭتار-اقپانىندا 10,3 مىڭ رەسەي ازاماتى قازاقستاندا ۋاقىتشا تۇرۋعا رۇقسات العانىن، بۇل كورسەتكىشتىڭ 2021 جىلدىڭ سايكەس كەزەڭىمەن سالىستىرعاندا 11,8%-عا ارتىق ەكەنىن مالىمدەگەن.

ودان كەيىن، بىلتىر 21 قىركۇيەكتە ۆلاديمير پۋتين ەلدە جارتىلاي موبيليزاتسيا جاريالاپ، سوعىسقا جارامدى ەر ازاماتتاردى سوعىسقا اتتاندىرا باستاعان كەزدە رەسەيلىكتەردىڭ شەتەلدەرگە اعىنى كۇشەيدى.

قاراشانىڭ اياعىندا ەڭبەك جانە حالىقتى الەۋمەتتىك قورعاۋ مينيسترلىگى موبيليزاتسيادان كەيىن قازاقستانعا 400 مىڭ رەسەيلىكتىڭ كەلىپ، 320 مىڭى شىققانىن، 100 مىڭ رەسەيلىكتىڭ جۇرگەنىن ءمالىم ەتكەن ەدى.

بيىل ناۋرىز ايىندا ءىىم كوشى-قون كوميتەتى توراعاسىنىڭ مىندەتىن اتقارۋشى اسلان اتالىقوۆ جىل باسىنان بەرى ەلىمىزگە 1 ملن 700 مىڭ (39%) رەسەيلىك كەلىپ،1 ملن 666 مىڭى شىققانىن ايتقان.

Abai.kz