عابيت مۇسىرەپوۆ اتىنداعى قازاق مەملەكەتتىك اكادەميالىق بالالار مەن جاسوسپىرىمدەر تەاترى ەلىمىزدىڭ مادەنيەتىنىڭ دامۋ جولىندا قارقىندى جۇمىس جاساپ جاتىر. 

تەاتردىڭ 77 ماۋسىمى باستاۋ العالى بەرى تەاترىمىزدا 7 جاڭا قويىلىمنىڭ تۇساۋكەسەرى ءوتتى. مامىر ايىندا الەمگە ايگىلى انتۋان دە سەنت-ەكزيۋپەريدىڭ «كىشكەنتاي حانزادا» شىعارماسىنىڭ جەلىسى بويىنشا دميتري كۋروچكيننىڭ رەجيسسەرلىگىمەن «كىشكەنتاي حانزادانىڭ ورالۋى» سپەكتاكلىمەن كىشكەنتاي كورەرمەندەرىمىزدى قۋانتتىق. بۇگىنگى تاڭدا تەاترىمىزدا تىنىمىز ەڭبەك پەن ۇزدىكسىز پروتسەسس ءجۇرىپ جاتىر. ولاردىڭ دالەلى تەاترىمىزدىڭ قورجىنىن تولتىرىپ جاتقان جۇلدەلەر دەپ ايتسام قاتەلەسپەيمىن. ماسەلەن، قازاقستان رەسپۋبليكاسى مادەنيەت جانە سپورت مينيسترلىگى ۇيىمداستىرۋىمەن UMAI ۇلتتىق سىيلىعىن تەاترىمىزدىڭ ماقتانىشى فارحاد مولداعالي «سپەكتاكلدىڭ ۇزدىك رەجيسسۋراسى ءۇشىن» نوميناتسياسىندى يەلەندى. پرەزيدەنتىمىز قاسىم-جومارت توقاەۆتىڭ جارلىعىنا سايكەس 2022 جىلى مادەنيەت سالاسىنداعى مەملەكەتتىك ستيپەندياسىنا تەاترىمىزدىڭ تالانتتى دا دارا اكتريساسى  گۇلجامال قازاقباەۆا جانە كوركەمدىك جەتەكشىسى ءارى ىزدەنىمپاز رەجيسسەرىمىز فارحاد مولداعالي يە بولدى. قازاقستاننىڭ مادەنيەت، ونەر، سپورت سالالارى بويىنشا تاڭداۋلىلاردى انىقتايتىن «تيكەتون 2023»  بايقاۋىندا تەاترىمىز سايىسقا ءتۇسىپ، ناتيجەسىندە، 300-گە جۋىق كانديدات قاتىسقان بايگەدە دارحان سۇلەيمەنوۆ «جىل تەاتر اكتەرى» جانە «ماحاببات، قىزىق مول جىلدار» قويىلىمى «جىل سپەكتاكلى» اتالىمى بويىنشا جەڭىمپاز اتاندى. تاعى ءبىر مەرەيىمىزدى اسقاقتاتقان ماراپات حالىقارالىق تۇركسوي ۇيىمى تاراپىنان تاعايىنداعان «تۇركى الەمىنىڭ ەڭ ۇزدىك رەجيسسەرى» جۇلدەسىنە تەاترىمىزدىڭ كوركەمدىك جەتەكشىسى فارحاد مولداعالي يە بولدى.

ۇلتتىق مادەنيەتكە، تەاترعا ءومىرىن ارناعان ۇلىلىرادى ۇلىقتاۋ ءاردايىم ءبىزدىڭ قاعيدامىز بولىپ قالا بەرمەك. ونەر ساڭلاعى، قر ەڭبەك سىڭىرگەن ءارتىسى اتاگەلدى ىسمايىلوۆتىڭ 100 جىلدىق مەرەيتويى 25 قاڭتار كۇنى تەاترىمىزدا اتالىپ ءوتىلدى. اتالمىش مەرەكەگە وراي، تالانت يەسىنىڭ ءوزى تۇرعان ءۇيدىڭ قابىرعاسىنا مەموريالدىق تاقتا ورناتىلدى. قازاق ونەرى الەمىندە ءوز ورنىن وشپەستەي ەتىپ قالدىرعان، ع.مۇسىرەپوۆ اتىنداعى بالالار مەن جاسوسپىرىمدەر تەاترىنىڭ ءارتيسى بولعان اتاگەلدى ىسمايىلوۆتىڭ قۇرمەتىنە ارنالعان بۇل كۇن تاريحتا قالارى ءسوزسىز.

شىعارماشىلىق ورداسى بولعاننان كەيىن ءاردايىم دامىپ، تىڭ جوبالار جاساپ وتىرۋ ءبىزدىڭ مىندەتىمىز بولىپ سانالادى. تەاتردىڭ شىعارماشىلىق تىنىسىن كەڭەيتكەن، قازاقستاننىڭ حالىق جازۋشىسى ءازىلحان نۇرشايىقوۆتىڭ «ماحاببات، قىزىق مول جىلدار» (رەج.: ف.مولداعالي) سپەكتاكلى بۇگىندە كورەرمەندەردىڭ جۇرەگىنەن ورىن الىپ، ءسات سايىن سۇرانىس ارتۋدا. ۇلتتىڭ ۇلى تۇلعاسى ءازىلحان نۇرشايىقوۆتىڭ 100 جىلدىعىن بىلتىر جەلتوقسان ايىندا جوعارى دەڭگەيدە دارىپتەپ، اتاپ وتكەن ەدىك. مەرەيتوي اياسىندا،  2023 جىلدان باستاپ «ماحاببات، قىزىق مول جىلدار» سپەكتاكلىمەن «سەزىم ساپارى» اتتى سپەكتاكل-تۋرىن باستادىق. سەزىم ساپارى – تالدىقورعان، تاراز، شىمكەنت، تۇركىستان، قاراعاندى، استانا قالالارىنا ساپار شەگىپ، ىستىق ىقىلاسقا بولەندى. كورەرمەندەردىڭ سانسىز سۇرانىسى بويىنشا ەلىمىزدىڭ بارلىق وبلىس ورتالىقتارىنا بارۋ جوسپارلانۋدا. جىل سوڭىندا باتىس پەن شىعىس ولكەسىنىڭ كورەرمەندەرىن قۋانتىپ، ءا.نۇرشايىقوۆتىڭ تۋعان جەرىندە تۋردى قورىتىندىلايمىز.

فەستيۆالدەر تەاتردىڭ ءورىسىن كەڭەيتىپ، تىنىسىن ودان ءارى اشاتىن، كاسىبي بىلىكتىلىگىمىزدى ارتتىراتىن بىردەن-ءبىر مۇمكىندىك بولىپ تابىلادى. ونىڭ ىشىندە، تەاترىشىلىكتەن باستاپ رەسپۋبليكالىق، حالىقارالىق فەستيۆالدەرگە شاقىرتۋلار الىپ، جىل باستالعالى بىرنەشە ونەر دوداسىنا قاتىسىپ ۇلگەردىك. الدا ءالى دە كۇتىپ تۇرعان بىرنەشە فەستيۆال بار. ولاردىڭ بىرقاتارىن اتاپ وتپەستەن بۇرىن ءبىز ءۇشىن ەرەكشە ىستىق تەاترىشىلىك فەستيۆالدى كەڭىنەن ايتىپ وتكەنىم ءجون بولار. تەاترىمىزداعى «ALTYN SAQA» تەاترىشىلىك فەستيۆالى جىل سايىن ءداستۇرلى تۇردە ۇيىمداستىرىلاتىن جاڭا قويىلىمدار فەستيۆالى.  پاندەميا كەزەڭىندەگى شەكتەۋلەرگە بايلانىستى ءۇزىلىپ، توقتاعان بولاتىن. بيىل، ونەر دوداسى ايتۋلى مەرەكەگە قارساڭىندا قايتا جاڭعىرىپ، جالعاسىن تاپتى. فەستيۆالدە تەاترىمىزدا 2022-2023 جىلدارى تۇساۋى كەسىلگەن قويىلىمدار قازاقستاننىڭ حالىق ءارتيسى، رەجيسسەر ەسمۇحان وباەۆ باستاعان قازىلار القاسى مەن كورەرمەندەر الدىندا باق سىنادى. ۇزدىكتەردى انىقتاۋ ناتيجەسىندە جەڭىمپاز اتانعان شىعارماشىلىق يەلەرىنە ماراپاتتار تەاترىمىزدىڭ تاريحىندا التىن ءارىپپىن جازىلعان ءبىرتۋار تۇلعالارىمىزدىڭ اتىندا بەرىلدى. «ALTYN SAQA - 2023» تەاترىشىلىك فەستيۆالى ناتيجەسى بويىنشا تەاتر ارتيستەرى اققاعاز مامبەتوۆا اتىنداعى «جىل اكتريساسى»، كەنەنباي قوجابەكوۆ اتىنداعى «جىل اكتەرى» نوميناتسياسى، اتاگەلدى ىسمايىلوۆ اتىنداعى «ۇزدىك ەر ادام بەينەسى»، جامال بەكتاسوۆا اتىنداعى «ۇزدىك ايەل ادام بەينەسى» سىندى نوميناتسيالارىمەن ماراپاتتالدى. تەاترىمىزدىڭ ارتيستەرىنىڭ شىن تالاپتارىن باعالاپ، شابىتتاندىرۋ ماقساتىندا تاعايىندالعان بۇل ماراپاتتار ولاردىڭ مەرەيىن اسقاقتاتىپ، ودان ءارى تىنباي ەڭبەكتەنۋگە تۇرتكى بولدى دەگەن ۇمىتتەمىز. تەاترىشىلىك فەستيۆال بىزگە قالاي ماڭىزدى بولسا رەسپۋبليكالىق فەستيۆالدەر دە ءبىز ءۇشىن ورنى بولەك بايگە الاڭى بولىپ تابىلادى. وتاندىق ونەر دودالارىنان بولەك، حالىقارالىق فەستيۆالدەر دە ءبىزدىڭ تەاترىمىزدىڭ ارتيستەرىنىڭ بىلىكتىلىگىن وسىرمەسە وشىرگەن جوق دەگەن پىكىردەمىن. ولاردىڭ كوشىن باستايتىن بيىلعى جىلعى جۇلدەلەر لەگى اقتوبە قالاسىندا 20-24 ءساۋىر كۇندەرى ت.احتانوۆ اتىنداعى اقتوبە وبلىستىق دراما تەاترىنىڭ ۇيىمداستىرۋىمەن وتكىزىلگەن VI حالىقارالىق «BALAUSA» ەكسپەريمەنتالدى سپەكتاكلدەر فەستيۆالىندە «ويان، قالىڭدىق» قويىلىمى ءۇشىن دينا جۇماباەۆا «ۇزدىك رەجيسسەرلىك جۇمىس» جۇلدەسىنىڭ يەگەرى اتاندى.  تەاتر رەپەرتۋارىنداعى «قاراگوز» (رەج.: ف.مولداعالي) قويىلىمى تۇركيا ەلىنىڭ انتاليا قالاسىندا 15-19 مامىر ارالىعىندا وتكەن XIII حالىقارالىق «انتاليا» تەاتر فەستيۆالىندە،  وزبەكستان مەملەكەتىنىڭ، تاشكەنت قالاسىندا وتكەن «ەۋرازيا» تەاتر فەستيۆالىندە ۇزدىكتەر قاتارىنان كورىنسە، رەسەي مەملەكەتىنىڭ ماسكەۋ قالاسىندا وتەتىن ا.پ.چەحوۆ اتىنداعى حالىقارالىق تەاتر فەستيۆالىندە «قۇلاگەر» قويىلىمى ەلىمىزدىڭ نامىسىن قورعاپ، ساراپشىلاردى تاڭداي قاقتىردى. الەمنىڭ نەبىر مىقتى مەملەكەتتەرىنىڭ وزىق تۋىندىلارى تاڭدالىنىپ قاتىساتىن ايگىلى دودادا قازاقستان مەملەكەتى تۇڭعىش رەت ونەر كورسەتتى. ياعني، بۇل تەك تەاترىمىز ءۇشىن عانا ەمەس، ەلىمىز ءۇشىن دە ەڭ ءبىر تولقۋلى ساتتەردىڭ ءبىرى بولدى دەپ ايتسام بولادى. سونىمەن قاتار،  ەۋروپالىق البانيا مەملەكەتىنىڭ كورچا قالاسىندا 20-26 ماۋسىم ارالىعىندا وتكەن حالىقارالىق «ALBAMONO – 2023» فەستيۆالىندە «قاھار» مونوسپەكتاكلى گران-پري جانە سپەكتاكل رەجيسسەرى دينا جۇماباەۆا «ۇزدىك رەجيسسەر» جۇلدەسىن يەلەندى. مۇنىڭ ءبارى قازاق ونەرى مەن مادەنيەتىن الەمدىك ارەنادا تانىتۋ ءارى دارىپتەۋ دەپ بىلەمىز. سەبەبى، ءبىزدىڭ ماقساتىمىز – الەمگە ۇلتتىق قۇندىلىقتارىمىزدى تانىتۋ.

جوعارىدا ايتقانىمداي، تەاترىمىز كورەرمەننىڭ كوڭىلىنەن شىعىپ قانا قويماي، ەلىمىزدىڭ مادەنيەتىنە ايتۋلى ۇلەس قوسۋدى ماقسات ەتەدى. سول ءۇشىن دە ءبىز تىنباي ەڭبەكتەنۋدەن، ىزدەنۋدەن، العا قاراي ۇمتىلۋدان ەش تالمايمىز. كورەرمەن سۇرانىسى مەن تالعامىن ەسكەرە وتىرىپ، مەرەكە كۇندەرىندە جانە جاز ايلارىندا ماۋسىمدى جالعاستىرىپ، الماتىلىقتار مەن قالا قوناقتارىنا قويىلىم ۇسىنامىز. بىلتىر العاش رەت ماۋسىم ءبىر ايعا ۇزارتىلعان بولاتىن. بيىل دا جالعاسىن تاۋىپ، شىلدە ايىندا دا جۇمىس جاسايمىز. كوركەم ونەرگە قىزمەت ەتۋدە ايانبايتىن تەاتر ۇجىمىنىڭ تەك الماتىلىقتار ءۇشىن عانا ەمەس، بارلىق قالالارداعى كورەرمەندەرىمىز ءۇشىن دايىنداعان سىيلارى كوپ. الداعى ۋاقىتتا جاڭا، تىڭ دۇنيەلەرمەن قۋانتا بەرمەكپىز.

تالعات ەسەناليەۆ

قر مادەنيەت قايراتكەرى، ع.مۇسىرەپوۆ اتىنداعى قازاق مەملەكەتتىك اكادەميالىق بالالار مەن جاسوسپىرىمدەر تەاترىنىڭ ديرەكتورى

Abai.kz