الماتىلىقتار قالا اكىمىنىڭ قىزمەتىنە ريزا ەمەس. تاياۋدا شاھار باسشىسى «ورنىن بوساتسىن» دەگەن پەتيتسيا جاريالاندى. Alash.online سايتىندا جارىق كورگەن پەتيتسياعا 45 336 ادام داۋىس بەرگەن، ونىڭ 32 209-ى «دوساەۆ كەتسىن» دەسە، 13 127-ءسى «قالسىن» دەپتى.

«ەربولات دوساەۆ الماتىعا اكىم بولىپ سايلانعالى تۇرعىنداردىڭ پروبلەماسى كوبەيدى. قۇرىلىسقا تىيىم سالىنعان جەرلەردە ءومىرى بىتپەيتىن قۇرىلىس جۇمىستارى، جوندەۋدى قاجەت ەتپەيتىن جولداردى قايتا جاساۋ، جيەكتاستاردى اۋىستىرۋ جۇمىستارى ءجۇرىپ جاتادى»، - دەلىنگەن پەتيتسيادا.

اۆتوردىڭ جازۋىنشا، كۇنى كەشە سەيفۋللين كوشەسىندەگى كوپىردىڭ ساپالى تاس قابىرعالارىن الىپ تاستاپ، ساپاسىز قىتايلىق تاستارعا اۋىستىرعان.

«بۇل تەك بيۋدجەتتەن كوبىرەك اقشا الۋدىڭ امالى»، - دەيدى اۆتور.

پەتيتسيادا قر پرەزيدەنتى قاسىم-جومارت توقاەۆتان الماتى قالاسىنىڭ اكىمى ەربولات دوساەۆتى ورنىنان الىپ تاستاۋ سۇرالعان.

ءبىر قىزىعى، پەتيتسيا جاريالانعاننان كەيىن 7 شىلدەدە دوساەۆتىڭ وتستاۆكاسىنا قارسىلار سانى كەنەت ءوسىپ، 12 مىڭنان ءبىر-اق شىققان. بەلسەندىلەر مۇنىڭ رەسەيلىك بوتتاردىڭ ارەكەتى ەكەنىن انىقتادى. كورشى ەلدىڭ بوتتارى الماتى قالاسىنىڭ اكىمى ورنىندا قالسىن دەپ داۋىس بەرگەن.

سونداي-اق پەتيتسيادا اكىمنىڭ بريفينگتەردە شاھار تۇرعىندارىنىڭ سۇراقتارىنا جاۋاپ بەرۋ مانەرى كوپشىلىككە ۇنامايتىنى جازىلعان.

بيىل ناۋرىزدا دوساەۆ حالىقپەن كەزدەسۋ كەزىندە پروبلەماسىن ايتىن شاعىنعان تۇرعىنعا دورەكى جاۋاپ بەرگەنى ءۇشىن سىنعا ۇشىراعان.

ايتا كەتەيىك ەربولات دوساەۆ قالاعا اكىم بولىپ تاعايىندالعان العاشقى كۇندەردەن باستاپ-اق قارسىلىققا ۇشىراعان. ول 2022 جىلى 31 قاڭتاردا قىزمەتكە كەلدى. ال 5 اقپان كۇنى الماتىلىقتار «اكىمدى سايلاۋدى وزىمىزگە قالدىرسىن» دەپ، دوساەۆتىڭ تاعايىندالعانىنا قارسى ميتينگكە شىقتى.

ەربولات دوساەۆ قاڭتار وقيعاسىنان كەيىن ورنىنان بوساتىلعان بۇرىنعى اكىم باقىتجان ساعىنتاەۆتىڭ ورنىنا كەلگەن.

ول Lancaster Holding-ءتىڭ تورتتەن بىرىنە جانە قازينۆەستبانكتىڭ ءىرى ۇلەسكەرى بولدى (مەملەكەتتىك قىزمەتكە اۋىسقاننان كەيىن اكتيۆتەر باسقارماعا بەرىلدى).

دوساەۆ Forbes-ءتىڭ 50 بايىنىڭ قاتارىنا كىرەدى، ونىڭ بايلىعى شامامەن 110 ميلليون اقش دوللارى.

Abai.kz