ورتا ازيا ەلدەرى ءوز ەگەمەندىگىن العان سوڭ، ورىس ءتىلىنىڭ ۇستەمدىگى جۇرگەن قوس ەل – قازاقستان مەن قىرعىزستان ەدى. قالعان رەسپۋبليكالار انا تىلدەرىنىڭ ەسىكتەگى باستارىن تورگە سۇيرەگەندە، قازاق پەن قىرعىز ءتىلى ءالى كۇنگە بوساعادان سىعالاپ كەلە جاتقانى جاسىرىن ەمەس.

ەندى مىنە قىرعىزستان پرەزيدەنتى سادىر جاپاروۆ مەملەكەتتىك قىزمەتكەرلەردى قىرعىز ءتىلىن بىلۋگە مىندەتتەيتىن زاڭعا قول قويىپ، ءوز ەگەمەندىگىن انا ءتىلى ارقىلى تاستاي شەگەلەدى.

باق زەر سالار بولساق، قىرعىزستان پارلامەنتىنىڭ دەپۋتاتتارى بيىل مامىردا ماقۇلداعان زاڭ بويىنشا، مۇنان بىلاي مەملەكەتتىك جانە جەرگىلىكتى ءوزىن-ءوزى باسقارۋ ورگاندارىندا، مەنشىك تۇرىنە قاراماستان بارلىق كاسىپورىندار مەن مەكەمەلەردە قىرعىز ءتىلىن قولدانۋ مىندەتتى سانالادى دەپ مالىمدەدى.

سونداي-اق، وسى ەلدەگى بارلىق مەملەكەتتىك قىزمەتكەرلەر، دەپۋتاتتار، ۇلتتىق بانك قىزمەتكەرلەرى، كۇش قۇرىلىمدارى، سوت، پروكۋراتۋرا، ادۆوكاتتار، نوتاريۋستار، وقۋ ورىندارىنىڭ قىزمەتكەرلەرى، مەديتسينا قىزمەتكەرلەرى مەملەكەتتىك ءتىل - قىرعىز ءتىلىن بىلۋگە جانە قىزمەت مىندەتىن ورىنداۋ كەزىندە پايدالانۋعا ءتيىس دەگەن ماسەلە اقىر اياعى ءوز تاريحي شەشىمىن تاۋىپ وتىر.

وسى ارادا تاعى ءبىر اتاپ وتەرلىگى اتالعان زاڭ مەنشىك تۇرىنە قاراماستان تەلەراديوكومپانيالاردى باعدارلامانىڭ كەمى 60 پايىزىن قىرعىز تىلىندە جۇرگىزۋگە جانە بىرلەسكەن كومپانيالار مەن شەتەلدىك كومپانيالار اتاۋى قىرعىز تىلىندەگى ترانسليتەراتسيامەن جازىلۋعا ءتيىس دەپ مويىندارىنا مىندەتتەيدى.

بىراق ءبىر اتەگەن-ايى وسى زاڭدا ورىس ءتىلى قىرعىزستاندا رەسمي ءتىل رەتىندە قولدانىلاتىنى كورسەتىلگەنى دەر ەدىك.

ءبىزدىڭ دەپۋتاتتار تاپ وسىنداي قادامعا بارىپ، مەملەكەت باسشىسىنا قىرعىزستان پرەزيدەنتى سادىر جاپاروۆ سياقتى قول قويعىزا الار ما ەكەن؟ نەمەسە قىرعىزداردان دا اسىپ، ورىس ءتىلىن ۇلتارالىق قاتىناس ءتىلى مارتەبەسىنەن ايىرا الا ما ەكەن؟

دەپۋتات مىرزالار، سايلاۋشىلارىڭىزدى ۇكىلەگەن ءۇمىتىن اقتاپ، تاريحي سىن سايااتتا ءتىلىمىزدى تورگە شىعارۋعا دايىنسىزدار ما، الدە قۇمعا باسىن تىققان تۇيەقۇس بولىپ وتىرا بەرەسىزدەر مە؟ حالىق سىزدەرگەن باتىل دا، تاريحي شەشىم قابىلداۋدى تالاپ ەتەدى.

ءابىل-سەرىك الىاكبار

Abai.kz