پرەزيدەنت ۇلى وتان سوعىسى ارداگەرى كەنجەباي مادەنوۆتىڭ ەرلىگىن ەرەكشە اتاپ ءوتتى. ونىڭ ايتۋىنشا، جاۋىنگەر بەرليندەگى راتۋشا عيماراتىنا جەڭىس تۋىن تىككەندەردىڭ قاتارىندا بولعان.

قاسىم-جومارت توقاەۆ كەنجەباي مادەنوۆكە ۇلى وتان سوعىسىنداعى جانقيارلىعى مەن باتىلدىعى ءۇشىن «حالىق قاھارمانى» اتاعىن بەرۋ تۋرالى جارلىققا قول قويعانىن مالىمدەدى.

وسىلايشا، ءبىز تاريحي ادىلدىكتى قالپىنا كەلتىرىپ وتىرمىز، – دەدى پرەزيدەنت.

كەنجەباي مادەنۇلى مادەنوۆ  1925 جىلى 19 اقپاندا باتىس قازاقتان وبلىسى قاراتوبە اۋدانى قاراكول اۋىلدىق وكرۋگى اقتاي-ساي اۋىلىندا تۋعان.

1950-1974 جىلدار ارالىعىندا باتىس قازاقستان جانە گۋرەۆ وبلىستارىنداعى قازكسر مقك ورگاندارىندا قىزمەت اتقارعان. ۇلتتىق قاۋىپسىزدىك كوميتەتىنىڭ ارداگەرى. 1974 جىلى 26 جەلتوقساندا دۇنيەدەن وتكەن.

ك.م. مادەنوۆ 1944 جىلى 19 جاسىندا 266-اتقىشتار ديۆيزياسى 1008-پولكى 2-باتالونى 5-روتاسىنىڭ ۆزۆود كومانديرى بولىپ تاعايىندالعان.

1945 جىلى 29 ساۋىردە ك.م. مادەنوۆ بەرلين شايقاسىندا قاھارماندىقتىڭ ۇلگىسىن كورسەتتى. اتاپ ايتقاندا، بەرلين وپەراتسياسى كەزىندە قالانىڭ رەيحستاگتان كەيىنگى ماڭىزدى اكىمشىلىك ورتالىعى – راتۋشا عيماراتىنىڭ توبەسىنە قىزىل تۋدى ورناتۋ ك.م. مادەنوۆ باسقارعان ۆزۆودقا تاپسىرىلىپ، ول بۇيرىقتى ەرلىكپەن ورىندايدى. بۇل كەڭەس اسكەرىنە رۋح بەرىپ، شابۋىلدىڭ قارقىندى جالعاسۋىنا ىقپال ەتەدى.

ك.م. مادەنوۆ باستاعان جاۋىنگەرلەردىڭ وسى ەرلىگى كەڭەس وداعىنىڭ مارشالى گ.ك. جۋكوۆتىڭ «ەستەلىكتەر مەن تولعانىستار»، 5-ەكپىندى ارميانىڭ اسكەري كەڭەسىنىڭ مۇشەسى، گەنەرال-لەيتەنانت ف.ە. بوكوۆتىڭ «جەڭىس كوكتەمى»، 1948 جىلى كسرو قارۋلى كۇشتەرى مينيسترلىگىنىڭ باسپاسى شىعارعان «بەرليندى الۋ» (شتۋرم بەرلينا) كىتاپتارىندا سۋرەتتەلگەن.

«قازاقستان كوممۋنيسى» جۋرنالىنىڭ 1970 جىلى 6 ماۋسىمداعى نومىرىندە راتۋشا ءۇشىن بولعان شايقاس جايىندا ك.م. مادەنوۆتىڭ ءوزى دە جازعان.

ونىڭ ەسىمى مەكتەپ وقۋشىلارىنا ارنالعان 1985, 1993 جانە 2004 جىلدارى جارىق كورگەن «قازاقستان تاريحى» وقۋلىقتارىنا ەندى. سونداي-اق ك.م. مادەنوۆتىڭ ەرلىگىن كلاۋس پوحە جانە گانس وليۆا اتتى گەرمانيالىق جۋرناليستەر «سوعىس اياقتالعان ءتۇن» دەگەن ەڭبەكتەرىنە ارقاۋ ەتكەن.

باتىردىڭ قۇرمەتىنە 2001 جىلدىڭ جەلتوقسانىندا اتىراۋ وبلىسى بويىنشا ۇقكد عيماراتىنا مەموريالدىق تاقتا ورناتىلدى.

ال 2005 جىلى اتىراۋ قالاسىندا كەنجەباي مادەنوۆتىڭ اتىنا كوشە بەرىلدى.

Abai.kz