حان كەنەنىڭ باسىنا قاتىستى پروبلەما ۇنەمى كوتەرىلىپ، باق تاراپىنان سان-ساققا جۇگىرتىلىپ كەلەدى.

2016 جىلى قۇرىلعان انايى كوميسسيا مۇشەلەرىنە سانكت-پەتەربۋرگتەگى ءى پەتر اتىنداعى انتروپولوگيا جانە ەتنوگرافيا مۋزەيى  ديرەكتورىنىڭ ورىنباسارى ەفيم رەزۆاننىڭ:  «بىزدە كەنەسارى حاننىڭ باس سۇيەگى ساقتالماعان»، - دەي كەلە، كۋنستكامەرادا كەيكى باتىردىڭ باس سۇيەگى بار ەكەنىن، ەگەردە جوعارى باسشىلىق تاراپىنان جارلىق شىعارىلىپ، نۇسقاۋ بەرىلەتىن بولسا، قايتارىلاتىنىن مالىمدەگەنى، كەيىن كەيكى باتىردىڭ باسىنىڭ ەلگە ورالىپ جەرلەنگەنىن بىلەمىز.

جىل باسىندا وسى ماسەلە دەپۋتاتتار تاراپىنان تاعى ءبىر مارتە كوتەرىلدى. ايتىلدى. الايدا ونىڭ ءبارى ءسوز كۇيىندە قالىپ وتىر. بۇگىن باق-تا بەلگىلى بولعانداي، قازاقستاننىڭ مادەنيەت ءمينيسترى اسحات ورالوۆ مىرزا حان كەنەنىڭ باس سۇيەگىنە قاتىستى پىكىر ءبىلدىرىپتى. سونىمەن مينيستر نە دەيدى؟

«ەڭ الدىمەن عالىمدارمەن جۇمىس ىستەۋ كەرەك شىعار. ودان كەيىن ماسەلەنى سىرتقى ىستەر مينيسترلىگى شەشۋى كەرەك. ءبىز شەت مەملەكەتتەرمەن قارىم-قاتىناستى سىرتقى ىستەر مينيسترلىگى ارقىلى ۇيىمداستىرامىز. بۇل –  زاڭدا بەلگىلەنگەن ءتارتىپ. مادەنيەت سالاسى بولسىن، مەيلى سپورت سالاسى بولسىن، ءبىز وزگە ەلدەرمەن وسى ۆەدومستۆو ارقىلى بايلانىسامىز»، – دەدى مادەنيەت ءمينيسترى.

2014 جىلعى قازاندا استاناداعى ل. گۋميلەۆ اتىنداعى ەۋرازيا ۋنيۆەرسيتەتى «الاش» عىلىمي-زەرتتەۋ ينستيتۋتىنىڭ ديرەكتورى سۇلتانحان اققۇلۇلى كسرو عا مۋزەي قورىن ۇزاق جىل باسقارعان اكادەميك يۋري حوروشيلوۆ 2003 جىلى ءبىر باسىلىمعا بەرگەن سۇحباتىن وزەك ەتە وتىرىپ، «مەگاپوليس» اپتالىعىنا كولەمدى ماقالا جازىپ، وندا بىرقاتار تىڭ دەرەكتەر مەن مالىمەتتەردى كەلتىردى.

ونىڭ ومبىلىق ولكەتانۋشى اندرەي پالاشەنكوۆ پەن جازۋشى سەرگەي ماركوۆتىڭ جازبالارىنا سۇيەنىپ ايتۋىنا قاراعاندا، كەنەسارى حاننىڭ باس سۇيەگى 40-جىلدارعا دەيىن ومبىنىڭ ولكەتانۋ مۋزەيى قورىندا ساقتالىپ، كەيىننەن كۋنستكامەراعا جىبەرىلگەن. ودان ەتنوستار مەن ادامنىڭ پايدا بولۋى عىلىمي-زەرتەتۋ ينسيتيتۋتىنا ءوتىپ، ءارى قاراي رەسەيدىڭ گوحراناسىنا تاپسىرىلعان.

وندا تاپسىرىلعان دۇنيە ەش جوعالمايدى. تەك رەسەي جاعى حان يەمىزدىڭ باسىن قايتارۋعا قۇلىقسىز. تەك رەسەي سوعىستا جەڭىلگەنىن تىلەپ، سول كەزدە كەنەسارى ءوز ۇلىتىمەن قاۋىشادى دەگەنگە سەنەيىك.

Abai.kz