رەسەيدىڭ اگرو جانە تاۋ-كەن بيزنەسى جانە باسقا سالاداعى ىسكەر توپتارى اقش پەن باتىس نازارىنان تىس قالعان ەلدەردىڭ ەكونوميكالىق ىشكى ساياساتىنا ارالاسا باستادى.

افريكانى ازىق-تۇلىكپەن قارىق قىلعان پۋتيندىك رەسەي ورىس بارلاۋى جيعان كومپروماتتاردى ىسكە قوسىپ، ءتىپتى، ءوزىن بلوكتارعا قوسىلمايمىز دەپ جاريالاعان تۇركىمەنستاننىڭ ءوزىن تاۋبەسىنە كەلتىرە الدى.

ءىرى مەملەكەتتىك لاۋازىمدى يەلەنگەن وا شەندىلەرى رەسەي ىعىنا جىعىلا باستاۋى جاقسىلىق ەمەس. جاكىشەۆ كەزىندە داۋرەنى جۇرگەن قازاق اتومى مەن ۋرانى نازارباەۆتىڭ ورىنسىز وسى سالاداعى ىستەرىنەن كەيىن «بۋدەنوۆسكوە» كەنىشىنىڭ 49 پايىزى يەلىك ەتەتىن ستەپنوگورسك تاۋ-حيميا كومبيناتىن (ستحك) ياكوۆ كلەبانوۆ پەن ۆاسيلي انيسيموۆتىڭ قانجىعاسىندا كەتكەن بولاتىن. كلەبانوۆتار كارىم ءماسىموۆتىڭ كومەگىمەن كەزىندە وسى كومبيناتتى تۇككە تۇرعىسىز باعا العان بولاتىن. ەندى 1,5 ميلليارد دوللارعا ساتىپ، حالىقتىڭ ىرىزدىعىن اۋزىنان جىرىپ وتىر.

«روساتوم» مەملەكەتتىك كورپوراتسياسىنىڭ باس ديرەكتورى الەكسەي ليحاچەۆ رەسەي پرەزيدەنتىمەن كەزدەسۋىندە وسى كاسىپورىندى ساتىپ العانىن مالىمدەدى. وسى قادامنان كەيىن رەسەي ۋران قورى بويىنشا ەكىنشى ورىنعا شىققانىن جانە يادرولىق وتىن تسيكلىندەگى قايتا ءبولۋ بويىنشا ۇشتىككە كىرە الدى. تەك ودان قازاققا ورىن جوق.

بيىل ناۋرىز ايىندا العاشقى 50 توننا ۋران وندىرگەن كەنىشتىڭ قولدى بولۋىنا پۋتين تىكەلەي ارالاستى دەگەن سىبىس تارادى. 50 پايىز اكتسياعا يە قازاتومپروم قۇنى 1,6 ميلليارد دوللار تۇراتىن كەلىسىمنەن قالايشا تىس قالعان دەگەن ويعا قالىپ وتىر قازاق قوعامى. ەل ىشىندەگى كوزى اشىق جاندار وسى ساۋالعا دەپۋتاتتار جاۋاپ بەرەدى دەگەن سەنىمدە.

رەسەي سانكتسيادان قۇتىلاتىن جولدىڭ ءبىرى ۋران ءوندىرۋ دەپ تاۋىپ، وسى قادامعا بارىپ وتىر. ولاردىڭ ارام ويلارى جۇزەگە اسسا، ولار وزدەرى جاساعان وسى ءبىر ستراتەگيالىق جۇرىستەن كەيىن، 2-3 جىل اينالاسىندا قازاق جەرىندەگى ۋران ءوندىرىسى بويىنشا رەسەي قازاتومپروممەن تەڭەسەدى، ال 5-7 جىلدا، ەگەر باسقا ويىنشىلاردىڭ ۇلەسىن استىرتىن ساتىپ الا باستاسا، ءتىپتى بىزدەن ارتىق وندىرە باستاۋى ىقتيمال.

ءابىل-سەرىك الىاكبار

Abai.kz