15 تامىزىدا الماتىدا «Sana Business Forum» ءوتتى. فورۋمنىڭ باستى ماقساتى ۇكىمەت، بيزنەس جانە عىلىم اراسىندا بايلانىس ورناتىپ، ەل ەكونوميكاسىنىڭ دامۋ ماسەلەلەرى، سىن-قاتەرلەرى جانە مۇمكىندىكتەرىن تالقىلاۋ بولدى.

فورۋمدا بىلىكتى دە بەلسەندى قارجىگەرلەر، ەكونوميستەر جانە كاسىپكەرلەردىڭ باسى بىرىگىپ، ەكونوميكا، بيزنەس جانە قارجى سالالارىندا تاجىريبە الماسۋعا جانە وزەكتى ماسەلەلەردىڭ شەشىمىن تابۋعا سەپتىگىن تيگىزەتىن كاسىبي پلاتفورما قۇرىلدى.

«Sana Business Forum» 50-دەن اسا ساراپشى مەن قوناق شاقىرىلىپ، 300-دەن استام قاتىسۋشى كەلدى. قاتىسۋشىلار اراسىندا ءىرى كومپانيا يەلەرى، شاعىن جانە ورتا بيزنەس وكىلدەرى، بيزنەس كلۋب توراعالارى مەن مۇشەلەرى بولدى.

فورۋمدا ۇلتتىق ەكونوميكانىڭ جاڭا مودەلى قانداي بولۋ كەرەك، حالىقتىڭ ءال-اۋقاتىن قالاي كوتەرۋگە بولادى دەگەن سۇراقتارى كوتەرىلىپ، ەلىمىزدەگى وندىرىستىك ساياساتتى قالىپتاستىرۋدىڭ جولدارى ۇسىنىلدى. سونىمەن قاتار، شاعىن جانە ورتا بيزنەستىڭ نەگىزگى ماسەلەلەرى قاراستىرىلىپ، شەشۋ جولدارى ايتىلدى.

«Sana Business Forum» سپيكەرلەرىنىڭ قاتارىندا ەكونوميكالىق ساياسات ينستيتۋتىنىڭ ديرەكتورى، ۇلتتىق قۇرىلتاي مۇشەسى، ە.ع.د. قايىربەك ارىستانبەكوۆ, قازاقستان رەسپۋبليكاسىنىڭ اۋىل شارۋاشىلىعى مينيسترلىگى قارجىلىق قۇرالدار جانە ميكروكرەديت بەرۋ دەپارتامەنتىنىڭ ديرەكتورى مۇحامەدجانوۆ تۇرار, امەريكالىق AES كورپوراتسياسىنىڭ ارلينگتونداعى باس كەڭسەسىندە روبوتوتەحنيكا مەن دروندار جونىندەگى باعدارلامانىڭ جاھاندىق جەتەكشىسى اسەل اياپوۆا, Trade Help بيزنەس كونسۋلتانتى، حالىقارالىق HR كلۋبىنىڭ مۇشەسى ەگەمبەرديەۆا ايدا, سەنتراس ينشۋرانس ساقتاندىرۋ كومپانياسىنىڭ پەرسونال جونىندەگى ديرەكتورى، پەرسونال جونىندەگى مەنەدجەرلەر قاۋىمداستىعىنىڭ مۇشەسى ايگۇل قۋاتقىزى, بيزنەس كەڭەسشى، MBA باعدارلاماسىنىڭ اعا وقىتۋشىسى، Phd كانديدات جاسۇلان كۇشەباەۆ, كاسىپكەرلەردەن «TasGroup» قارجى كومپانيالار توبىنىڭ نەگىزىن قالاۋشى ءارى باسشىسى دۋلات تاستەكەي, Golden Bridge Partners سەرىكتەسىنىڭ نەگىزىن قالاۋشى جانە ديرەكتورى Jańa Post كومپانياسىنىڭ نەگىزىن قالاۋشى بولاتبەك دالەلحانۇلىن, Lanzhou رەستوراندار جەلىسىنىڭ نەگىزىن قالاۋشى مايگارينا گۋلبانۋ, SONA lab, Med Progress, Nomad Goldman Logistics, Acvee Finance كومپانيالارىنىڭ نەگىزىن قالاۋشى اسلان نازاراليەۆ, «يالان ءسىزدىڭ قالاڭىزدا» جوباسىنىڭ اۆتورى باحتيار وسەربەكۇلى, «Lactomarin»، «Lamifaren» كومپانيالارىنىڭ يەسى ادىلبەك تۇرعىنبايۇلى, EASYTAP جوباسىنىڭ نەگىزىن قالاۋشىسى ماعزۇم تولەش جانە باسقا دا كاسىپكەرلەر بولدى.

فورۋمنىڭ باعدارلاماسىنا سايكەس III پانەلدىك سەسسيا وتكىزىلدى. پانەلدىك سەسسيا مودەراتورلارى: تەلەجۇرگىزۋشى، Maqsut Narikbayev University باسقارما توراعاسىنىڭ ورىنباسارى ەربولات مۇحامەدجان, كاسىپكەر، پەداگوگ-تالىمگەر ەسكەندىر بەستاي, كوممۋنيكاتسيا بويىنشا وبسە ۇلتتىق كونسۋلتانتى، «قازاقستاننىڭ ورنىقتىلىق قورى» اق PR مەنەدجەرى، «PR-شى» كلۋبىنىڭ مۇشەسى، قارجى سالاسىنىڭ شولۋشىسى ايبار ولجاي.

پانەلدىك سەسسيالاردا شاعىن جانە ورتا بيزنەستى ماسشتابتاۋ، مىقتى كوماندا قۇرۋ جانە كاسىپتەگى ينوۆاتسيالار تاقىرىپتارى اياسىندا پىكىرلەر تالقىعا سالىندى.

فورۋمعا ەلىمىزدىڭ بەلگىلى باق وكىلدەرى قاتىسىپ، Youtube جەلىسى ارقىلى تىكەلەي ەفير جۇرگىزىلدى. وففلاين قاتىسا الماعان قاتىسۋشىلار ونلاين قاتىستى.

ءىس-شارا تولىقتاي مەملەكەتتىك تىلدە ءوتتى.

Abai.kz