وسى اپتاداعى ەڭ باستى وقيعا – ەۆگەني پريگوجيننىڭ يت ءولىمى بولدى. نەگە ءبىز يت ءولىم دەپ وتىرىمىز?..

بۇكىل الەم ديكتاتور، ەكىنشى گيتلەر دەپ تانىعان پۋتينگە «فرانتسۋز لەگيونى» سياقتى شەتەلدىك جالدامالى اسكەر قوسىننىن قۇرىپ بەرىپ، افريكا قۇرلىعىنا 30 جىلدان كەيىن ورىس بارلاۋىن تابان تىرەتكەن جاندايشابى يەسىن بالاعىنان قابام دەپ وسىنداي كەپكە ۇشىرادى.

ءيا، ءلاپپاي تاقسىرلاپ جۇرگەن پريگوجين اياق استىنان ءوز جۇرىسىنەن جاڭىلىپ، كوزىنە شەل ءبىتىپ، پۋتيندىك سوعىسقۇمارلىق ساياساتتى سىناپ، ورىس الەمىندە بەدەل جيناپ، رەسەيدىڭ ناعىز جاناشىرىنا اينالىپ، كرەملدىڭ اقىل-ەسىن شىعارعان-تىن.

پريگوجين ءوزىنىڭ «ادىلەتتىلىك شەرۋىمەن» جەر ءجۇزىن ءبىر ءدۇر سىلكىندىرىپ، پۋتين ءانى تاعىنان تايادى، مىنە تايادى دەگەن شاقتا اراعا ەكىجۇزدى لۋكاشەنكو ءتۇسىپ، بارشا «چۆك» بەلارۋسقا قونىس اۋدارىپ، ماسەلە ىڭ-شىڭسىز بىتكەن سياقتى كورىنگەن-ءتىن.

ءبىر ايان دۇنيە - پۋتين قوسىنىنان ونىڭ جاندايشاپتارى تەك تەمىر تابىتپەن عانا ونى تاستاپ شىعا الاتىندىعىن پريگوجيننىڭ اۋە اپاتىنان قازا تابۋى دالەلدەپ وتىر. بۇل تەك ءپۋتيننىڭ كەك الۋى عانا ەمەس، وسى سوعىس باستالعاننان بەرى ءوزىنىڭ قاسىنان تابىلداعاندارعا ىممەن جاساعان يشاراسى.

وسى يشارانىڭ العاشقى نىشانى – پريگوجيننىڭ يت ءولىمى. وسى ورايدا كەلەسى كەزەك كىمدىكى دەگەن ساۋال تۋىندايدى؟ بالكىم ول – گيركين (سترەلكوۆ) بە؟ ونى ۋاقىت كورسەتەدى.

Abai.kz