بۇگىن استاناعا البانيا پرەزيدەنتى بايرام بەگاي رەسمي ساپارمەن كەلدى. مەملەكەت باسشىسى قاسىم جومارت توقاەۆ شاقىرۋىن قابىل الىپ، ەلورداعا كەلگەنى ءۇشىن البانيا پرەزيدەنتىنە العىس ايتتى.

– بۇل – تاريحتاعى البانيا پرەزيدەنتىنىڭ قازاقستانعا جاساعان العاشقى ساپارى. ءسىزدىڭ رەسمي ساپارىڭىز ءوزارا ىنتىماقتاستىقتى دامىتۋ تۇرعىسىنان وتە ماڭىزدى. قازاقستان ءسىزدىڭ ەلىڭىزبەن تىعىز قارىم-قاتىناس جاساۋعا نيەتتى. ءبىز ەكى تاراپتىڭ مۇددەسىنە ساي كەلەتىن كوپتەگەن سالادا ءوزارا ءتيىمدى ىنتىماقتاستىقتى دامىتۋعا مۇمكىندىك مول دەپ سانايمىز. ەكى اپتادان سوڭ ەلدەرىمىز اراسىنداعى ديپلوماتيالىق قارىم-قاتىناستىڭ ورناعانىنا 30 جىل تولادى. ءسىزدىڭ ساپارىڭىزدىڭ وسى ايتۋلى داتامەن تۇسپا-تۇس كەلۋىنىڭ سيمۆولدىق ءمانى بار، – دەدى پرەزيدەنت.

البانيا پرەزيدەنتى بايرام بەگاي قاسىم-جومارت توقاەۆقا استاناعا شاقىرعانى جانە قوناقجايلىق كورسەتكەنى ءۇشىن ريزاشىلىعىن ءبىلدىرىپ، مەملەكەت باسشىسىن البانياعا ساپارمەن كەلۋگە شاقىردى.

 – قازاقستانعا ساپارمەن كەلگەنىم ءۇشىن وتە قۋانىشتىمىن. ارنايى شاقىرعانىڭىز ءۇشىن سىزگە ريزاشىلىعىمدى بىلدىرەمىن. ءوزىڭىز ايتقانداي، بۇل ساپار ديپلوماتيالىق بايلانىستارىمىزدىڭ 30 جىلدىق مەرەيتويىمەن تۇسپا-تۇس كەلىپ وتىر. بۇل ءبىزدىڭ ساياسي قارىم-قاتىناسىمىزدىڭ جوعارى دەڭگەيدە ەكەنىن كورسەتەدى. ەندى ەكونوميكالىق ىنتىماقتاستىعىمىزدى ودان ءارى نىعايتۋ ءۇشىن جاڭا مۇمكىندىكتەر تاۋىپ، بىرلەسە جۇمىس ىستەۋىمىز كەرەك. ءسىزدى البانياعا ساپارمەن كەلۋگە شاقىرامىن، – دەدى بايرام بەگاي.

جيىندا ەكى ەلدىڭ ساۋدا-ەكونوميكالىق، كولىكتىك-لوگيستيكالىق، ينۆەستيتسيالىق جانە گۋمانيتارلىق ىنتىماقتاستىعى ءسوز بولىپ، قازاقستان مەن البانيا اراسىنداعى سەرىكتەستىكتىڭ باستى ماسەلەلەرى تالقىلاندى.

پرەزيدەنت توقاەۆ استانا مەن تيرانا اراسىندا تىكەلەي اۋە قاتىناستارىن ورناتۋ قاجەت ەكەنىن ايتتى.

– تۋريزم، كولىك، ەنەرگەتيكا جانە باسقا دا سالالارداعى مۇمكىندىكتەر تۋرالى ايتا كەلە، استانالارىمىز اراسىندا تىكەلەي اۋە قاتىناسىن اشۋ مۇمكىندىگىن قاراستىرۋ قاجەت. قازاقستان ءوزارا ىنتىماقتاستىقتى دامىتۋعا نيەتتى ەكەنىن تاعى دا اتاپ وتكىم كەلەدى. ءبىز ناقتى ناتيجەلەرگە قول جەتكىزۋ ءۇشىن قولدان كەلگەننىڭ ءبارىن جاسايمىز، – دەدى قاسىم-جومارت توقاەۆ.

بايرام بەگاي ەكىجاقتى ىنتىماقتاستىقتىڭ قازىرگى جاي-كۇيىن جوعارى باعالادى

– ءبىزدىڭ العاشقى كەزدەسۋىمىز ەكى ەل اراسىندا سىندارلى ديالوگ باستالعانىن كورسەتەدى. البانيا مەن قازاقستان اراسىنداعى قارىم-قاتىناستى كەڭەيتۋ، سونداي-اق ىنتىماقتاستىعىمىز بەن گۋمانيتارلىق بايلانىستارىمىزدى نىعايتۋ جونىندەگى ورتاق ماقساتقا ساي ءىس-ارەكەتتەرىمىز جالعاسادى دەپ ۇمىتتەنەمىن. سونىمەن قاتار ەكونوميكالىق ىنتىماقتاستىقتى نىعايتۋ ءۇشىن الەۋەتىمىز مول. ءبىز وسى مۇمكىندىكتى پايدالانا الامىز. تاۋ-كەن، ەنەرگەتيكا، اۋىل شارۋاشىلىعى، تۋريزم جانە ينفراقۇرىلىمدىق دامۋ سالالارىنداعى ءوزارا ىنتىماقتاستىعىمىزدى نىعايتقىمىز كەلەدى، – دەدى البانيا پرەزيدەنتى.

جيىن سوڭىندا قاسىم-جومارت توقاەۆ پەن بايرام بەگاي بىرلەسكەن مالىمدەمەگە قول قويدى.

Abai.kz