قازاقستاندىقتار الەۋمەتتىك جەلىدە سوعىستى قولدايتىن رەسەيلىك ازىلكەشتەر «كامىزياكي» توبىنىڭ ەلگە كەلىپ، ونەر كورسەتۋىنە نارازىلىق ءبىلدىرىپ جاتىر. رەسەيلىكتەر 5 قازاندا الماتىعا، 7 قازاندا استاناعا كەلۋدى جوسپارلاعان.

Alash.online پورتالىندا: «ازامات مۇساعاليەۆ ازىلكەش نۇرلان سابۋروۆپەن بىرگە قازاقستاندىقتاردىڭ نارازىلىعىن تۋدىرىپ، تنت فەدەرالدى كانالىندا قازاق ءتىلىن مازاق ەتىپ قانا قويماي، دەنيس دوروحوۆپەن جانە ءوزىنىڭ «كامىزياكي» كومانداسىمەن بىرگە جاقىندا وككۋپاتسيالانعان دونەتسكتە ونەر كورسەتتى. قازاقستان رەسپۋبليكاسىنىڭ پرەزيدەنتى قاسىم-جومارت كەمەلۇلى توقاەۆ سانكت-پەتەربۋرگ حالىقارالىق ەكونوميكالىق فورۋمىندا رەسەي فەدەراتسياسىنىڭ پرەزيدەنتى پۋتينمەن كەزدەسۋدە قازاقستان «لۋگانسك جانە دونەتسك حالىق رەسپۋبليكالارىن»  مويىندامايتىنىن مالىمدەدى. ءبىز، قازاقستاندىقتار، ەگەمەن ەل ۋكرايناعا اگرەسسيانى قولدايتىن ادامداردى ءوز ەلىمىزدە كورگىمىز كەلمەيدى. ءبىز بەيبىت ەلمىز جانە بەيبىت حالىقپىز»، – دەگەن پەتيتسيا جارىق كوردى.

تاياۋدا مۇساعاليەۆ رەسەي وككۋپاتسيالاعان دونەتسك وبلىسىنا بارىپ، كونتسەرتكە قاتىستى. ال بىلتىر كرەملشىل ولگا بۋزوۆامەن قوسىلىپ، موبيليزاتسيا كەزىندە ەلدەن قاشقان رەسەيلىكتەردى كەلەمەجدەگەن.

ايتا كەتسەك، بۇعان دەيىن ۋكرايناعا باسقىنشىلىقتى قولدايتىن گريگوري لەپس تە، يرينا دۋبتسوۆا، نيكيتا دجيگۋردا سەكىلدى بىرنەشە ءارتىستىڭ قازاقستانداعى كونتسەرتتەرى حالىق قارسىلىعىنان سوڭ وتپەي قالعان. ولار قازاقستاننىڭ «رۋسوفوبيا جايلاعان جەر» ەكەنىن دە ايتقان.

ساياساتتانۋشى دوسىم ساتپاەۆ وسىنداي ىرىتكى سالۋشى «ونەر يەلەرىن» قىلمىستىق جاۋاپكەرشىلىككە تارتۋ كەرەك دەپ سانايدى.

Abai.kz