قىركۇيەك ايىنىڭ 17-ءسى كۇنى مەملەكەت باسشىسى قاسىم-جومارت توقاەۆ اقش-تىڭ نيۋ-يورك قالاسىنا جۇمىس ساپارىمەن بارعان ەدى. ساپار بارىسىندا پرەزيدەنتتىڭ بۇۇ باس اسسامبلەياسى 78-سەسسياسىنىڭ جالپى دەباتىندا ءسوي سويلەيتىنىن جانە «ورتالىق ازيا – اقش» سامميتىنىنە قاتىساتىنىن، بۇدان بولەك، بىرقاتار مەملەكەتتىڭ باسشىلارىمەن، حالىقارالىق ۇيىمداردىڭ، ترانسۇلتتىق كومپانيالاردىڭ جەتەكشىلەرىمەن كەزدەسۋ وتكىزەتىنىن اقوردا رەسمي حابارلاعان.  پرەزيدەنت قايدا باردى، كىممەن كەزدەستى، وندا نە تالقىلاندى – اشىق دەرەككوزدەرگە سۇيەنىپ شولۋ جاساپ كورەلىك.

اقوردانىڭ حابارلاۋىنشا، مەملەكەت باسشىسى قىركۇيەكتىڭ 17-ءسى كۇنى Wabtec كومپانياسىنىڭ پرەزيدەنتى جانە باس اتقارۋشى ديرەكتورى رافاەل سانتانانى قابىلدادى. Wabtec (Westinghouse Air Brake Technologies Corporation) Fortune 500 تىزىمىنە كىرەدى، سونداي-اق ول كولىك-لوگيستيكا سالاسىنداعى جاھاندىق كوشباسشىلاردىڭ ءبىرى سانالادى.

پرەزيدەنت كومپانيانىڭ كولىك-لوگيستيكا سالاسىنا شامامەن 1 ميلليارد دوللار ينۆەستيتسيا قۇيۋ جوسپارىن قۇپتاپ، مۇنىڭ ترانسكاسپي حالىقارالىق كولىك باعدارىن دامىتۋعا ىقپال ەتەتىنىن جانە باسقا دا ينفراقۇرىلىمدىق جوبالار ءۇشىن نەگىز بولاتىنىن اتاپ ءوتتى.

قاسىم-جومارت كەمەلۇلىنىڭ اقش-قا ساپارى اياسىندا «قازاقستان تەمىر جولى» «ۇك» اكتسيونەرلىك قوعامى مەن Wabtec اراسىندا ستراتەگيالىق ىنتىماقتاستىق تۋرالى نەگىزدەمەلىك كەلىسىمگە قول قويىلدى.

پرەزيدەنت سول كۇنى Citigroup كومپانياسىنىڭ باس اتقارۋشى ديرەكتورى دجەين فرەيزەرمەن كەزدەستى. ەلىمىزدەگى بىردەن-ءبىر امەريكالىق بانك سانالاتىن Citibank Kazakhstan – حالىقارالىق ينۆەستورلار، مەملەكەتتىك سەكتور جانە ءىرى كاسىپورىندار ءۇشىن جەتەكشى سەرىكتەستەردىڭ ءبىرى.

كەزدەسۋ بارىسىندا ماكروەكونوميكالىق بولجامدار مەن الەمدىك قارجى نارىعىنداعى نەگىزگى ۇردىستەر، امەريكالىق قارجى حولدينگىنىڭ ەلىمىزدەگى قىزمەت اياسىن كەڭەيتۋ پەرسپەكتيۆالارى تالقىلانىپ، مەملەكەت باسشىسى قازاقستاننىڭ كولىك-لوگيستيكالىق الەۋەتىن ارتتىرۋعا باعىتتالعان بىرقاتار جوبانى قارجىلاندىرۋعا نيەت ءبىلدىرىپ وتىرعان Citigroup حولدينگىنىڭ الداعى جوسپارىن قولدايتىنىن ايتتى.  سونداي-اق، «قازاقستان تەمىر جولى» ۇك» اق مەن Citibank اراسىندا Wabtec لوكوموتيۆتەرىن ساتىپ الۋ ءۇشىن قارجىلاندىرۋدى ۇيىمداستىرۋدىڭ نەگىزگى شارتتارى تۋرالى كەلىسىمگە قول قويىلدى.

مەملەكەت باسشىسى اقش-قا جۇمىس ساپارىنىڭ ەكىنشى كۇنىندە Mastercard كومپانياسىنىڭ اتقارۋشى ۆيتسە-پرەزيدەنتى نيكولا ۆيللانى قابىلدادى. Mastercard – الەمنىڭ 210 ەلىندەگى 2,3 ميللياردتان استام تۇتىنۋشىنى بىرىڭعاي تولەم جۇيەسىنە قوسقان جاھاندىق جەتەكشى تەحنولوگيالىق كومپانيا. نارىقتاعى قۇنى 390 ميلليارد دوللاردان اساتىن Mastercard الەمدەگى ەڭ قىمبات 10 برەندتىڭ قاتارىنا كىرەدى.

پرەزيدەنت Mastercard كومپانياسىنىڭ تمد-داعى، ورتالىق جانە شىعىس ەۋروپاداعى كونسالتينگتىك باعىتتى دامىتۋ ءۇشىن الماتى قالاسىن وڭىرلىك حاب رەتىندە تاڭداۋ شەشىمىن قولدادى. مەملەكەت باسشىسىنا Mastercard كومپانياسىنىڭ ينكليۋزيۆتى ءوسىم قورى قازاقستاندا Strive باعدارلاماسىن ىسكە قوساتىنى جونىندە مالىمەت بەرىلدى. اتالعان باعدارلاما ەلىمىزدە بيزنەستى تسيفرلاندىرۋعا، 300 مىڭنان استام شاعىن جانە ورتا بيزنەستىڭ بىلىكتىلىگىن ارتتىرۋعا كومەك كورسەتەدى.

ەل پرەزيدەنتىنىڭ نيۋ-يورك قالاسىنا جۇمىس ساپارى اياسىندا تسيفرلىق دامۋ جانە اەروعارىش ونەركاسىبى مينيسترلىگى مەن Mastercard كومپانياسى اراسىندا وسى جانە وزگە دە باستامالار قامتىلعان Digital Country Partnership (DCP) نەگىزدەمەلىك كەلىسىمىنە قول قويىلدى.

مەملەكەت باسشىسى سول كۇنى Rio Tinto كومپانياسىنىڭ باس اتقارۋشى ديرەكتورى ياكوب ءشتاۋسحولمدى قابىلدادى. Rio Tinto –  نارىقتاعى قۇنى 99 ميلليارد دوللاردى قۇرايتىن، تاۋ-كەن ءوندىرىسى جانە مەتاللۋرگيا سالاسىنداعى ءىرى اعىلشىندىق-اۆستراليالىق كومپانيا.

كەزدەسۋ بارىسىندا گەولوگيالىق بارلاۋ، تاۋ-كەن جانە مەتاللۋرگيا ونەركاسىبىندە بىرلەسكەن ينۆەستيتسيالىق جوبالاردى ىسكە اسىرۋ ماسەلەلەرى تالقىلانىپ، ياكوب شتاۋسحولم قوستاناي جانە قاراعاندى وبلىستارىنداعى مىس كەن ورىندارىنا گەولوگيالىق بارلاۋ جۇرگىزۋ جوباسىنىڭ جۇزەگە اسىرىلۋ بارىسى تۋرالى باياندادى.

بۇدان كەيىن، قاسىم-جومارت توقاەۆ بۇۇ باس اسسامبلەياسى 78-سەسسياسىنىڭ اياسىنداعى ەكىجاقتى كەلىسسوزدەر باعدارلاماسىن ماجارستان پرەزيدەنتى كاتالين نوۆاكپەن كەزدەسۋمەن باستادى.

مەملەكەت باسشىسى باۋىرلاس حالىقتار اراسىندا تاريحي جانە مادەني بايلانىستارعا نەگىزدەلگەن ستراتەگيالىق سەرىكتەستىك ورناعانىن اتاپ ءوتىپ، ماجارستاننىڭ تۇركى ىنتىماقتاستىعىن نىعايتۋداعى بەلسەندى ۇستانىمىن جانە ەلەۋلى ۇلەسىن جوعارى باعالادى.

مەملەكەت باسشىسى بيىل قاراشا ايىندا قازاقستاندا تۇركى مەملەكەتتەرى ۇيىمىنىڭ مەرەيتويلىق 10-ءسامميتى وتەتىنىن ايتىپ، اتالعان جيىنعا ماجارستان پرەمەر-ءمينيسترى ۆيكتور وربان قاتىسادى دەپ جوسپارلانىپ وتىرعانىن جەتكىزدى. «ەلىمىزدىڭ ماجارستانمەن تىعىز ىنتىماقتاستىق ورناتقانىن اتاپ وتكىم كەلەدى. ەلدەرىمىز اراسىندا وتە سەنىمدى، ءداستۇرلى بايلانىس قالىپتاسقان. ءبىز ەكىجاقتى ىنتىماقتاستىقتىڭ قازىرگى دەڭگەيىن جوعارى باعالايمىز. وسى ءساتتى پايدالانىپ، ءسىزدى قازاقستانعا ساپارمەن كەلۋگە شاقىرامىن. سونىمەن قاتار تۇركى مەملەكەتتەرى ۇيىمىنىڭ سامميتىندە پرەمەر-مينيستر ۆيكتور وربان مىرزامەن كەزدەسەمىز دەپ ۇمىتتەنەمىن»، – دەدى مەملەكەت باسشىسى.

كەلىسسوز بارىسىندا تاراپتار ساۋدا-ەكونوميكالىق، ينۆەستيتسيالىق جانە مادەني-گۋمانيتارلىق سالالارداعى ىنتىماقتاستىق ماسەلەلەرىن تالقىلادى.

ەل پرەزيدەنتى ەكى ەل اراسىنداعى بايلانىستاردى نىعايتۋ ماقساتىندا استانا كوشەلەرىنىڭ بىرىنە ماجارستاننىڭ ۇلت اقىنى شاندور پەتەفيدىڭ ەسىمى بەرىلەتىنىن ايتتى.

پرەزيدەنتتەر مەملەكەتتەرىمىز اراسىنداعى ءوزارا تاۋار اينالىمىن ۇلعايتۋعا باعىتتالعان بىرلەسكەن شارالار قابىلداۋ، سونداي-اق ىنتىماقتاستىقتىڭ ەكىجاقتى تەتىكتەرىن جانداندىرۋ ماڭىزدى ەكەنىن اتاپ ءوتتى.

سول كۇنى، ياعني 18-قىركۇيەكتە پرەزيدەنت قاسىم-جومارت توقاەۆ ماجارستان پرەزيدەنتى كاتالين نوۆاكپەن بىرگە بۇۇ-نىڭ «ورنىقتى دامۋ ماقساتتارىنا (ودم) قول جەتكىزۋ جولىنداعى پروگرەستى جەدەلدەتۋدىڭ نەگىزگى وتپەلى پروتسەستەرىنە قاتىستى اۋقىمدى ءىس-قيمىلداردى جانداندىرۋ» اتتى كوشباسشىلار ديالوگىنىڭ ءبىرىنشى سەسسياسىندا توراعالىق ەتتى.

مەملەكەت باسشىسى ءوز سوزىندە بىرىككەن ۇلتتار ۇيىمىنىڭ 2030 جىلعا دەيىنگى كۇن ءتارتىبى بۇگىنگى وسكەلەڭ ۇرپاقتىڭ جارقىن بولاشاق قۇرۋىنا بەرىلگەن ءبىر عانا مۇمكىندىك ەكەنىن اتاپ ءوتتى. «گەوساياسي قاقتىعىستارعا بايلانىستى شيەلەنىسە تۇسكەن قازىرگى جاھاندىق سىن-قاتەرلەر ءبىزدىڭ ۇجىمدىق كۇش-جىگەرىمىزگە نۇقسان كەلتىرىپ وتىر. بۇل كەدەرگىلەردى ەڭسەرۋگە جەكەلەگەن مەملەكەتتىڭ شاماسى جەتپەيدى. الەمدىك قوعامداستىقتىڭ بىرلىگىنىڭ ارقاسىندا عانا ەلەۋلى جەتىستىكتەرگە قول جەتكىزە الامىز»، – دەدى قاسىم-جومارت توقاەۆ.

پرەزيدەنتتىڭ ايتۋىنشا، قازاقستان ءۇشىن ورنىقتى دامۋ ماقساتتارىنا قول جەتكىزۋ – ۇلتتىق باسىمدىق. «ورنىقتى دامۋ قاعيداتتارى ءبىزدىڭ نەگىزگى ۇلتتىق ستراتەگيالارىمىز بەن باعدارلامالارىمىزدىڭ وزەگىنە اينالدى. بۇگىندە ورنىقتى بولاشاققا بەلسەندى تۇردە ينۆەستيتسيا قۇيىپ وتىرمىز. مەملەكەت بيۋدجەتىنىڭ 80 پايىزى ورنىقتى دامۋ ماقساتتارىنا ساي كەلەدى. ءبىز تەگىن ءبىلىم الۋدىڭ جانە دەنساۋلىق ساقتاۋدىڭ بارشاعا قولجەتىمدى بولۋىن قامتاماسىز ەتەمىز. جاڭا الەۋمەتتىك كودەكستە حالىقتىڭ وسال توپتارىن قورعاۋ شارالارى كۇشەيتىلدى»، – دەدى مەملەكەت باسشىسى.

قاسىم-جومارت كەمەلۇلىنىڭ پىكىرىنشە، بارشاعا ورتاق ورنىقتى بولاشاققا قول جەتكىزۋ ءۇشىن شۇعىل تۇردە بىرلەسكەن ءىس-قيمىلدار قاجەت. وسىعان بايلانىستى مەملەكەت باسشىسى بىرقاتار ۇسىنىس ايتتى. «ءوزارا ىنتىماقتاستىقتى نىعايتۋ ءۇشىن ايماقتىق دەڭگەيدە «ءبىرتۇتاس بۇۇ» قاعيداتىن كۇشەيتۋ قاجەت. سوندىقتان ءبىز قازاقستاندا ورتالىق ازيا مەن اۋعانستان ءۇشىن ورنىقتى دامۋ ماقساتتارى جونىندەگى ايماقتىق حاب قۇرۋدى ۇسىنامىز. ول بۇۇ-نىڭ ايماقتاعى جوبالىق قىزمەتىن ءتيىمدى ۇيلەستىرۋدى قامتاماسىز ەتەدى»، – دەدى قاسىم-جومارت توقاەۆ.

سونىمەن قاتار، پرەزيدەنت كليمات، ازىق-تۇلىك جانە ەنەرگەتيكا داعدارىسى ورنىقتى دامۋعا ايتارلىقتاي قاۋىپ توندىرەتىنىنە توقتالدى. «ءبىز بۇۇ-نىڭ باسشىلىعىمەن تەحنيكالىق قولداۋ، عىلىمي زەرتتەۋلەر جانە قاۋىپ-قاتەرلەردى باعالاۋ سالالارىنداعى حالىقارالىق ىنتىماقتاستىقتى نىعايتۋعا ءتيىسپىز. ورنىقتى دامۋ سالاسىنداعى ماقساتتار ءبارىمىز ءۇشىن جارقىن الەمگە جول اشادى. ءبىز بىرىگۋىمىز جانە كۇش-جىگەرىمىزدى ارتتىرۋىمىز قاجەت. قازاقستان بۇۇ-نىڭ ورنىقتى دامۋ سالاسىنداعى تەگەۋرىندى ءارى ءتيىمدى ءرولىن ءاردايىم جاقتايدى، – دەدى ول.

سەسسيا بارىسىندا ماجارستان پرەزيدەنتى كاتالين نوۆاك، حورۆاتيا پرەزيدەنتى زوران ميلانوۆيچ، قىرعىزستان پرەزيدەنتى سادىر جاپاروۆ، وار پرەزيدەنتى سيريل رامافوسا، اۋستريا پرەزيدەنتى الەكساندر ۆان دەر بەللەن، پەرۋ پرەزيدەنتى دينا بولۋارتە، گايانا پرەزيدەنتى يرفان الي، ميكرونەزيا پرەزيدەنتى ۋەسلي سيمينا، سولتۇستىك ماكەدونيا پرەزيدەنتى ستەۆو پەنداروۆسكي، فينليانديا پرەزيدەنتى ساۋلي نينيستيو جانە باسقالار ءسوز سويلەدى.

پرەزيدەنت قاسىم-جومارت توقاەۆ ورنىقتى دامۋ ماقساتتارى جونىندەگى سامميتتەن كەيىن بىرقاتار مەملەكەتتىڭ باسشىلارىمەن كەزدەستى. مەملەكەت باسشىسى ءبىرىنشى كەزەكتە سلوۆەنيا پرەزيدەنتى ناتاشا پيرتس-مۋسارمەن كەلىسسوز جۇرگىزدى.

قاسىم-جومارت توقاەۆ ناتاشا پيرتس-مۋساردى كەلەسى جىلى ەلىمىزدە وتەتىن استانا حالىقارالىق فورۋمىنا قاتىسۋعا شاقىردى.

پرەزيدەنتتەر قازاقستان مەن سلوۆەنيانىڭ ساۋدا-ەكونوميكالىق، كولىك-لوگيستيكالىق جانە گۋمانيتارلىق سالالارداعى ىقپالداستىق پەرسپەكتيۆالارىن تالقىلادى. سونداي-اق اڭگىمەلەسۋ بارىسىندا فارماتسەۆتيكا، لوگيستيكا جانە IT يندۋسترياسى سالالارىنداعى ءوزارا بايلانىستاردىڭ وڭ تاجىريبەسىنە نازار اۋدارىلدى.

سلوۆەنيا پرەزيدەنتى قازاقستانمەن اراداعى ىنتىماقتاستىقتى دامىتۋعا دايىن ەكەنىن راستاپ، قاسىم-جومارت توقاەۆتى سلوۆەنياعا ارنايى ساپارمەن بارۋعا شاقىردى.

تاراپتار حالىقارالىق ماسەلەلەر بويىنشا دا پىكىر الماستى. اتاپ ايتقاندا، الەمدەگى تۇراقتىلىق پەن قاۋىپسىزدىكتى قامتاماسىز ەتۋ، بۇۇ قۇرىلىمىن جەتىلدىرۋ ماسەلەلەرى قاراستىرىلدى. سونىمەن قاتار مەملەكەتتەر باسشىلارى ورتالىق ازيا مەن قازاقستاننىڭ حالىقارالىق ارەناداعى ءرولىنىڭ ارتىپ كەلە جاتقانىن اتاپ ءوتىپ، حالىقارالىق قۇرىلىمدار اياسىندا ءوزارا تىعىز قارىم-قاتىناس جاساۋ جونىندە ۋاعدالاستى.

سودان سوڭ مەملەكەت باسشىسى يران پرەزيدەنتى يبراحيم رايسيمەن كەزدەستى.

كەلىسسوز بارىسىندا ەكى ەل باسشىلارى قازاق-يران ىنتىماقتاستىعىنىڭ قازىرگى جاي-كۇيىن جانە ءوزارا قاتىناستاردى ودان ءارى دامىتۋ پەرسپەكتيۆاسىن تالقىلادى. تاراپتار كولىك، لوگيستيكا جانە ساۋدا-ساتتىق سالالارىنداعى ىقپالداستىقتى ارتتىرۋ ءۇشىن كەشەندى شارالار قابىلداۋ ماڭىزدى ەكەنىن جەتكىزدى. «ءبىز ۆيزا راسىمىنە، سونداي-اق ادامدار مەن بيزنەستىڭ ءوزارا قارىم-قاتىناسىنا قاتىستى وتە پايدالى ۋاعدالاستىقتارعا قول جەتكىزدىك. قازاقستان تاراپى يرانمەن اراداعى ىنتىماقتاستىقتى نىعايتۋعا نيەتتى ەكەنىن اتاپ وتكىم كەلەدى. ەكى ەل ۇكىمەتتەرى بۇعان دەيىن تەگەراندا قول جەتكىزگەن ۋاعدالاستىقتاردى جۇزەگە اسىرۋ ءۇشىن ءتيىستى شارالار قابىلداۋى قاجەت. مەن قازاقستاندا سىزبەن تاعى دا كەزدەسۋدى اسىعا كۇتەمىن»، – دەدى قاسىم-جومارت كەمەلۇلى.

يران پرەزيدەنتى يبراحيم رايسي قازاقستان مەن يراندى دوستىق پەن ءوزارا قولداۋعا نەگىزدەلگەن ۇلگىلى قاتىناستار بايلانىستىراتىنىن اتاپ ءوتتى. «يران مەن قازاقستان اراسىندا وتە جاقسى ەكىجاقتى قارىم-قاتىناس قالىپتاسقان. مۇنداي جوعارى دەڭگەيدەگى سەرىكتەستىك بىزگە ءوزارا بايلانىستاردى، اسىرەسە ساۋدا سالاسىنداعى قارىم-قاتىناسىمىزدى ودان ءارى دامىتۋ ءۇشىن ناقتى قادامدار جاساۋعا جەتەلەيدى. ءبىز باۋىرلاس قازاقستانمەن ەكىجاقتى ىنتىماقتاستىقتى كەڭەيتۋگە نيەتتىمىز. ەلدەرىمىزدىڭ الەۋەتتەرى زور جانە وسى مۇمكىندىكتەردى پايدالانۋ ءبىزدىڭ ورتاق يگىلىگىمىزگە قىزمەت ەتەدى»، – دەدى يبراحيم رايسي.

مەملەكەتتەر باسشىلارى ەلدەرىمىزدىڭ كولىك-ترانزيت بايلانىستارىن دامىتۋ ءۇشىن زور الەۋەت بار ەكەنىنە نازار اۋداردى. ناقتىراق ايتقاندا، ءوزارا ساۋدا-ساتتىقتى كۇشەيتۋ جانە كاسپي تەڭىزى ارقىلى جۇك تاسىمالداۋ ءۇشىن «قازاقستان – تۇرىكمەنستان – يران» تەمىرجولىنىڭ مۇمكىندىگىن كەڭىنەن پايدالانۋ جاعدايى اتاپ ءوتىلدى. قاسىم-جومارت توقاەۆ بەندەر-ابباس پورتىندا قازاقستاننىڭ ساۋدا تەرمينالىن سالۋدىڭ ماڭىزدى ەكەنىنە نازار اۋداردى.

پرەزيدەنتتەر بەلگىلەنگەن ەكونوميكالىق جوسپاردى جۇزەگە اسىرۋ ءۇشىن ۇكىمەتارالىق بايلانىستاردى جانداندىرۋعا ۋاعدالاستى.

مەملەكەت باسشىسى سول كۇنى فينليانديا پرەزيدەنتى ساۋلي نينيستيومەن دە كەلىسسوز جۇرگىزدى.

قاسىم-جومات توقاەۆ فينليانديانى قازاقستاننىڭ سولتۇستىك ەۋروپا ەلدەرى اراسىنداعى ەڭ ءىرى ساۋدا سەرىكتەسى جانە ينۆەستيتسيا كولەمى بويىنشا ونىڭ الدىڭعى ورىندا ەكەنىن اتاپ ءوتتى. سونداي-اق ساياسي، ساۋدا-ەكونوميكالىق جانە عىلىمي-تەحنيكالىق ىنتىماقتاستىقتى ودان ءارى نىعايۋ ءۇشىن زور الەۋەت بار ەكەنى ايتىلدى. ساۋلي نينيستيو، ءوز كەزەگىندە، قازاقستان فينليانديانىڭ اسا ماڭىزدى سەرىكتەسى جانە ەكىجاقتى كۇن ءتارتىبىنىڭ بارلىق باعىتى بويىنشا ءوزارا ءتيىمدى ىقپالداستىقتى جالعاستىرۋعا دايىن ەكەنىن مالىمدەدى.

تاراپتار حالىقارالىق ساياساتتىڭ وزەكتى ماسەلەلەرى، سونىڭ ىشىندە بۇۇ-نى رەفورمالاۋ جونىندە دە پىكىر الماسىپ، مەملەكەت باسشىسى فينليانديا پرەزيدەنتىن كەلەسى جىلى وتەتىن استانا حالىقارالىق فورۋمىنىڭ نەگىزگى سپيكەرلەرىنىڭ ءبىرى رەتىندە قازاقستانعا شاقىردى.

مەملەكەت باسشىسى سول كۇنى ەستونيا پرەزيدەنتى الار كاريسپەن دە كەلىسسوز جۇرگىزدى.

كەزدەسۋ بارىسىندا ەكى مەملەكەتتىڭ ءتۇرلى سالاداعى ىنتىماقتاستىعىن نىعايتۋ پەرسپەكتيۆالارى تالقىلانىپ، قاسىم-جومارت توقاەۆ ەستونيالىق ارىپتەسىنە قازاقستاندا جۇرگىزىلىپ جاتقان اۋقىمدى الەۋمەتتىك-ەكونوميكالىق وزگەرىستەر، سونىڭ ىشىندە شەتەلدەن ينۆەستيتسيا تارتۋعا جانە ينۆەستورلاردى قورعاۋعا باعىتتالعان شارالار جونىندە مالىمەت بەردى.

تاراپتار ءوزارا ورتاق مۇددەنى كوزدەيتىن سالالارداعى ىنتىماقتاستىقتى ودان ءارى نىعايتۋعا نيەتتى ەكەنىن راستادى جانە ءبىر-ءبىرىن ءوز ەلدەرىنە ارنايى ساپارمەن كەلۋگە شاقىردى.

ال بۇگىن مەملەكەت باسشىسى بۇۇ-نىڭ باس حاتشىسى انتونيۋ گۋتەرريشپەن كەزدەستى.

تاراپتار قازاقستاننىڭ بۇۇ-مەن جان-جاقتى ىنتىماقتاستىعىنىڭ باسىم باعىتتارىن، سونداي-اق قازىرگى زاماننىڭ وزەكتى سىن-قاتەرلەرىن تالقىلادى.

بۇۇ باس حاتشىسى قازاقستان پرەزيدەنتىنە ءىلتيپات بىلدىرە وتىرىپ، ەكىجاقتى سەرىكتەستىكتىڭ قارقىندى دامىپ كەلە جاتقانىن اتاپ ءوتتى. «قازاقستان مەن بۇۇ بەيبىتشىلىك پەن قاۋىپسىزدىكتى نىعايتۋ، ورنىقتى دامۋ ماقساتتارىنا قول جەتكىزۋ جانە ادام قۇقىعىنىڭ ساقتالۋىن قامتاماسىز ەتۋ ماسەلەلەرى بويىنشا ىنتىماقتاستىقتى جالعاستىرا بەرەدى. قازاقستان – ءبىز ءۇشىن مۋلتيلاتەراليزمنىڭ تىرەگى، جاھاندىق دەڭگەيدەگى بەيبىتشىلىك قورعانى رەتىندە باسىمدىققا يە سەرىكتەس ەل»، – دەدى انتونيۋ گۋتەرريش.

قازاقستان پرەزيدەنتى قازىرگى زاماننىڭ ەڭ وزەكتى پروبلەمالارىن شەشۋدە بۇۇ ايرىقشا ءرول اتقاراتىنىن جانە ونىڭ ەشقانداي بالاماسى جوق ەكەنىن ايتتى. سونداي-اق مەملەكەت باسشىسى بۇۇ باس حاتشىسى انتونيۋ گۋتەرريشكە ۇيىم قىزمەتىن ودان ءارى جەتىلدىرۋ جونىندەگى وي-پىكىرىن جەتكىزدى.

بۇدان سوڭ، قاسىم-جومارت توقاەۆ Amazon كورپوراتسياسىنىڭ ۆيتسە-پرەزيدەنتى سيۋزان پوينتەرمەن كەزدەستى.

كەزدەسۋ اياسىندا قازاقستاننىڭ تسيفرلىق دامۋ جانە اەروعارىش ونەركاسىبى مينيسترلىگى («ۇات» اق) مەن Amazon Web Services اراسىندا Outpost «بۇلتتى» تەحنولوگيا شەشىمىن ساتىپ الۋ جانە ونى QazTech پلاتفورماسىمەن ينتەگراتسيالاۋ جونىندەگى پيلوتتىق جوبانى ىسكە قوسۋ تۋرالى كەلىسىمگە قول قويىلدى.

سونداي-اق، بۇگىن مەملەكەت باسشىسى GE Healthcare كومپانياسىنىڭ ەۋروپا، تاياۋ شىعىس جانە افريكا بويىنشا پرەزيدەنتى روب ۋولتونمەن كەزدەستى. GE Healthسare كومپانياسىنىڭ الەمنىڭ 140-تان استام ەلىندە وكىلدىگى بار. 2022 جىلى كومپانيانىڭ تازا تابىسى – 19 ميلليارد دوللار. ال نارىقتاعى قۇنى 34,5 ميلليارد دوللاردى قۇرادى.

روب ۋولتون مەملەكەت باسشىسىنا GE Healthcare كومپانياسىنىڭ قازاقستاندا كلينيكالىق بەينەلەردىڭ ورتالىقتاندىرىلعان ۇلتتىق تسيفرلىق مۇراعاتىن قۇرۋعا نيەتتى ەكەنىن جەتكىزدى. بۇل شارا ناۋقاستاردىڭ مالىمەتىن باسقارۋ ءىسىن وڭتايلاندىرىپ، ناتيجەسىندە كورسەتىلەتىن قىزمەت قۇنىن تومەندەتۋگە مۇمكىندىك بەرەدى.

مەملەكەت باسشىسى قازاقستاننىڭ دەنساۋلىق ساقتاۋ سالاسىنا قاتىستى ماڭىزدى جوبالار بويىنشا GE كومپانياسىمەن ستراتەگيالىق سەرىكتەستىككە جوعارى باعا بەردى.

كەزدەسۋ اياسىندا قازاقستان رەسپۋبليكاسىنىڭ ۇكىمەتى مەن GE Healthcare اراسىندا GE Healthcare كومپانياسىنىڭ ينۆەستيتسيالىق جوباسىن جۇزەگە اسىرۋعا قاتىستى نەگىزگى شارتتار تۋرالى نەگىزدەمەلىك كەلىسىمگە قول قويىلدى.

كەزدەسۋلەر ءالى جالعاسىپ جاتىر...

Abai.kz