ۋكراينا جەرىندە سوعىستىڭ باستالۋى بۇل ەل تۋرالى كوپتەگەن قاتىپ قالعان كوزقاراستاردى وزگەرتتى. سوعىسقا دەيىن ۋكراينانىڭ قارۋلى كۇشتەرى ءالسىز، قارۋ-جاراعى ناشار دەلىنگەن.

ەلدى باسقارۋ ءىسى دە كەندە قالعان، جەمقورلىق جايلاعان مەملەكەت، ءتارتىپ جوق دەيتىن. بىراق رەسەيدىڭ باسقىنشىلىعى باستالعاننان كەيىن  ۋكراين ارمياسىنىڭ، قوعامى مەن مەملەكەتتىك اپپاراتىنىڭ ۇيىمداستىرۋشىلىق دەڭگەيىن كورگەندە الەم ەلدەرى تاڭعالا قارادى.

ال رەسەي تۋرالى قانداي ستەرەوتيپتى پىكىرلەر بار ەدى؟ جىلدار بويى رەسەيدىڭ قارۋ-جاراعى، وق-ءدارىسى كوپ، اسكەري كۇشى الەمدەگى ەڭ مىقتىنىڭ ءبىرى، ادام رەسۋرسىنان دا، ازىق-تۇلىكتەن دە ەشقاشان تارىقپايدى دەيتىن.

بىراق سوعىس رەسەيدىڭ شىن بەينەسىن جاھانعا پاش ەتتى. كرەملدىك جۇيە ورىستاردىڭ باتىستىق ومىرگە بەيىمدەلىپ، بۇرىنعىداي سوعىسقا اتتانا بەرمەيتىنىن ۇمىتتى. ولاردىڭ جىلى توسەگىن باحمۋتتاعى ىزعارلى وكوپقا ايىرباستاعىسى كەلمەيتىنىن ەسەپكە المادى.

بۇل لوگيكاعا سىيادى دا. سەبەبى ءوز ەلىنە قاۋىپ تونبەسە، ەشبىر مەملەكەت ءوزى بارىپ باسقاعا سوقتىقپايدى.

كەز كەلگەن ادام ءۇشىن سوعىس تابيعي قۇبىلىس ەمەس. ويتكەنى ول كەز كەلگەن تىرشىلىك يەسىنىڭ نەگىزگى قاعيداسىن – ءومىر ءسۇرۋ ءۇشىن كۇرەستى بۇزادى.

رەسەيلىكتەردىڭ ۋكراينامەن سوعىسقىسى كەلمەيدى. ارينە، الەۋمەتتىك جەلىدە ايتۋ وڭاي. بىراق شىنتۋايتىنا كەلگەندە حالىقتىڭ سوعىسۋعا دا، بيلىككە قارسى شىعۋعا دا ىنتاسى جوق. سوعىستىڭ قازىرگى كەيپى، رەسەي تاراپىنا ءوتۋى ازاماتتاردىڭ كوڭىل-كۇيىنە مۇلدەم اسەر ەتپەگەنى بەلگىلى. ولاردىڭ جالعان پاتريوتيزم تۋرالى ۇراندارى باسىنا قاۋىپ تونگەن كەزدە-اق سونەدى. حالىق «قالاي ءومىر سۇرسەم، باسىمدى قايدا الىپ قاشسام» دەگەن ويمەن جۇرەدى.

بۇل اسپاننان تۇسە سالعان ەنجارلىق ەمەس، بۇل ءپۋتيننىڭ نەشە جىل بويى جۇرگىزگەن ساياساتىنىڭ ناتيجەسى. رەسەي قوعامى ءپاسسيۆتى قوعامعا اينالعان.

بۇل سوعىستا ۋكراينانىڭ باسىم تۇسەر تۇسى – حالقىنىڭ رۋحى، زاماناۋي قارۋ-جاراعى جانە رەسەيلىكتەردىڭ ەنجارلىعى.

كەرىمسال جۇباتقانوۆ

Abai.kz