كەشە، قىركۇيەك ايىنىڭ 26-سى كۇنى، شىمكەنت قالالىق قىلمىستىق ىستەر جونىندەگى اۋدانارالىق سوتى «Kausar Travel» كومپانياسىنىڭ ديرەكتورى مەدەت مۇراتبايۇلىن الاياق دەپ تانىپ، التى جىلعا باس بوستاندىعىنان ايىردى.

قىلمىسكەر بۇعان دەيىن الەۋمەتتىك جەلىدەگى پاراقشاسى ارقىلى مۇنىڭ ءبارىن مۇسىلمان جاماعات ءۇشىن ىستەگەنىن ايتقان ەدى. بىراق ول سوت زالىندا جۇرت كۇتپەگەن مالىمدەمە جاسادى.

ءوزىنىڭ ايتۋىنا قاراعاندا، ول قولىنا تۇسكەن قارجىنىڭ ءبارىن بەكبولات تىلەۋحانعا بەرىپتى.

«522 ملن تەڭگە، ياعني كومپانيانىڭ تاپقان تابىسى سول جەردە بەكبولات تىلەۋحان مىرزاعا بەرىلدى. 128 ملن تەڭگە مەنىڭ قاراجاتىم ەسەبىندە قالدى… ول كىسىمەن كاسىپتى بىرگە جۇرگىزەمىز، بىرگە جۇمىس ىستەيمىز دەگەن ۋادە بەرىلگەن. ول كىسى، ياعني قۇجاتتاندىرۋ بويىنشا، باسقا دۇنيەلەر بويىنشا ۋادە ەتەدى. سەبەبى بىزدە ءمۇفتيات تاراپىنان ليتسەنزيا الۋ، تۋريزم باسقارماسىنا تىركەلۋگە 100 ملن تەڭگە، ياعني مۇفتياتقا ليتسەنزيا الۋ، 50 ملن تەڭگە تۋريزمگە تىركەلۋگە» – دەدى ول.

مەدەت مۇراتبايۇلى جارتى ميلليارد تەڭگەدەن استام اقشانى اتاقتى ءانشى، «وكنو وۆەرتونا»، «كونەتس ۆلاستي» كىتاپتارىن جاتا-جاستانا وقىعان وقىرمانعا ۇستاتا سالۋىن ەكس-دەپۋتاتتىڭ قوعام الدىنداعى بەت-بەدەلىمەن ءتۇسىندىردى. ونىڭ ايتۋىنشا، بەكبولات تىلەۋحان دا «ءبارىن ءوز موينىما الامىن، سەن تەك ءوز كاسىبىڭمەن اينالىسا بەر» دەگەن ۋادەسىن ءۇيىپ-توگىپتى-مىس.

«قازىر بەكبولات تىلەۋحان مىرزانىڭ ۇستىنەن ۇقك-گە ارىز جازىپ وتىرمىن. شىمكەنت قالاسى پوليتسيا دەپارتامەنتىنە، پرەزيدەنت اپپاراتىنا، بارىنە ارىز جازىپ وتىرمىن»، – دەدى 245 ادامنىڭ ۇمرا قاجىلىققا جيناعان اقشاسىن «جىمقىرعان» «Kausar Travel» ديرەكتورى مەدەت مۇراتبايۇلى.

سوت ايىپتالۋشى ءىس بويىنشا بەكبولات تىلەۋحاننىڭ اتىن اتاعانىمەن، ونى ايىپتاۋعا دالەل كەلتىرە المادى دەدى.

سۋديا اينەل وراقباەۆا شىعارعان ۇكىم بويىنشا تۋريزم سالاسىندا جۇمىس ىستەۋ قۇقىعى 5 جىلعا شەكتەلگەن مەدەت مۇراتبەكۇلى تۇرمە جازاسىن قاۋىپسىزدىگى ورتاشا تۇزەۋ مەكەمەسىندە وتەيدى.

بەكبولات تىلەۋحان بولسا، بۇعان دەيىن الەۋمەتتىك جەلىلەردەگى پاراقشالارى ارقىلى «ەشكىمنىڭ اقىسىن جەمەگەنىن»، ەشقانداي الاياقتىققا، ەشقانداي قىلمىسقا جانە ەشقانداي ءدىني جات اعىم وكىلدەرىنە قاتىسى جوق ەكەنىن، باستىسى، اتالمىش كومپانياعا قاتىسى جوق ەكەنىن ايتىپ مۇسىلمانداردىڭ كيەلى كىتابى – قۇراندى ۇستاپ تۇرىپ انت-سۋ ىشكەنى بارشاعا ءمالىم.

ال مەدەت مۇراتبايۇلى سوتتا بەكبولات تىلەۋحانعا اقشا اۋدارعانىن راستايتىن قۇجاتتارى بار ەكەنىن ايتتى.

سوندا قاجىلاردىڭ قارجىسىن قاقالماي-شاشالماي قاقشىپ العان كىم؟

Abai.kz