باسى: جىلدىڭ ەلەۋلى وقيعالارى ء(بىرىنشى توپتاما)

ءوتىپ بارا جاتقان 2023 جىلى قازاق ءبىرتالاي ايماڭداي ۇل-قىزدارىنان، بەتكە ۇستار تۇلعالارىنان ايىرىلىپ قالدى. ولاردىڭ ىشىندە قوعام قايراتكەرلەرى، اقىن، سازگەر، انشىلەر بار. ولاردىڭ اراسىندا قوعام قىزۋ تالقىلاعان كىسىلەر دە بار. سولاردىڭ ءبىرسىپىراسىن وقىرماننىڭ ەسىنە جانە ءبىر جولى سالعاندى ءجون كوردىك.

بەردىبەك ساپارباەۆ (1953-2023)

بەلگىلى مەملەكەت جانە قوعام قايراتكەرى بەردىبەك ساپارباەۆ 71 جاسقا قاراعان شاعىندا قايتىس بولدى. ول 1953 جىلى قىزىلوردا وبلىسى جاڭاقورعان اۋدانى تالاپ اۋىلىندا دۇنيەگە كەلگەن. الماتى حالىق شارۋاشىلىعى ينستيتۋتىن بىتىرگەن.

2014-2015 جىلدارى پرەمەر-ءمينيسترىنىڭ ورىنباسارى بولدى. ءار جىلدارى قىزىلوردا، وڭتۇستىك قازاقستان، شىعىس قازاقستان، اقتوبە وبلىستارىنىڭ اكىمى بولدى. 2019 جىلى ەڭبەك جانە حالىقتى الەۋمەتتىك قورعاۋ مينيسترلىگىن باسقاردى. 2019-2020 جىلدارى پرەمەر-ءمينيستردىڭ ورىنباسارى قىزمەتىن اتقارعان. 2020 جىلدىڭ اقپانىنان 2022 جىلدىڭ ساۋىرىنە دەيىن بەردىبەك ساپارباەۆ جامبىل وبلىسىنىڭ اكىمى بولدى. مەملەكەتتىك قىزمەتتە 40 جىلدان استام ەڭبەك ەتكەن.

جاسارال قۋانىشالين (1949-2023)

قوعام قايراتكەرى، وپپوزيتسيالىق ساياساتكەر، ديسسيدەنت جاسارال قۋانىشالين 18 مامىردا اۋرۋحانادا ناۋقاستان كوز جۇمدى. ول 1949 جىلى اقتوبە وبلىسى، قارابۇتاق اۋدانىندا دۇنيەگە كەلگەن.

جاسارال قۋانىشالين 1994-1995 جىلدارى قازاقستان جوعارعى كەڭەسىنىڭ دەپۋتاتى بولعان. كەيىن وپپوزيتسياعا ءوتىپ، ءتۇرلى ۇيىمنىڭ قاتارىندا بيلىك ساياساتىن اشىق سىناپ كەلدى. 2022 جىلعى ساۋىردە «العا قازاقستان» پارتياسىنىڭ نەگىزىن قالاعان. بىراق تىركەتە الماعان.

نەسىپبەك ايتۇلى (1950-2023)

اقىن، مەملەكەتتىك سىيلىقتىڭ لاۋرەاتى، قازاقستاننىڭ ەڭبەك سىڭىرگەن قايراتكەرى، «پاراسات» وردەنىنىڭ يەگەرى نەسىپبەك ايتۇلى 73 جاسىندا بۇل جالعانمەن قوش ايتىستى.

نەسىپبەك ايتۇلى – 1950 جىلى شىعىس تۇركىستاننىڭ تارباعاتاي ايماعىندا تۋعان. ەڭبەك جولىن شۇبارتاۋ اۋداندىق «جاڭا ءومىر» گازەتىندە باستايدى. 1974 جىلى قازاق مەملەكەتتىك ۋنيۆەرسيتەتىنىڭ جۋرناليستيكا فاكۋلتەتىن بىتىرگەن.

نەسىپبەك ايتۇلى «ساردار»، «تۋ»، «ناۋرىزباي»، «ءجالاڭتوس»، «شاقانتاي»، «بەردىقوجا»، «تولەگەتاي»، «اقمولا شايقاسى» اتتى پوەمالاردىڭ، «جەر – جاننان قىمبات» داستانىنىڭ اۆتورى.

اسقار نايمانتاەۆ (1965–2023)

بەلگىلى اكتەر، رەجيسسەر، ساتيريك، قازاقستاننىڭ ەڭبەك سىڭىرگەن قايراتكەرى اسقار نايمانتاەۆ تا بۇلل دۇنيەدەن وزدى.

اسقار ابدىعالىمۇلى 1965 جىلدىڭ 17 ماۋسىمىندا الماتى وبلىسى، رايىمبەك اۋدانىندا ومىرگە كەلگەن.  ۇزاق جىل «تەرىسقاقپاي» ءازىل-سىقاق تەاترىنىڭ جەتەكشىسى بولدى. حالىق تەاترىن جاڭعىرتىپ الماتى وبلىسىنىڭ رايىمبەك، ۇيعىر اۋداندارىندا «ءحانتاڭىرى»، «قارادالا» تەاترلارىن اشىپ، تول مادەنيەتىمىزگە وراسان ۇلەسىن قوستى.

اقجول مەيىربەكوۆ (1950-2023)

«دوس-مۇقاسان» ءانسامبلىنىڭ ءانشىسى، قازاقستاننىڭ ەڭبەك سىڭىرگەن ءارتىسى اقجول مەيىربەكوۆ تە دۇنيە سالدى.

ول 1978 جىلى «دوس-مۇقاسان» انسامبلىنە قابىلدانىپ، 1985-1994 جىلدارى الماتى وبلىستىق فيلارمونياسىنىڭ «ارقاس»، «سازگەن»، «ادىرنا» انسامبلدەرىندە قىزمەت ەتكەن. ءانشى 1994-1996 جىلدارى «گۇلدەر» ءانسامبلىنىڭ كوركەمدىك جەتەكشىسى ءارى ديرەكتورى بولىپ جۇمىس ىستەدى.

الەكساندر ليتۆينوۆ (1984-2023)

2023 جىلى «دوس-مۇقاسان» ءانسامبلىنىڭ نەگىزىن قالاۋشىلاردىڭ ءبىرى الەكساندر ليتۆينوۆ 75 جاسىندا دۇنيەدەن وزدى.

بولات نازارباەۆ (1953-2023)

13 قاراشادا بۇرىنعى پرەزيدەنت نۇرسۇلتان نازارباەۆتىڭ ءىنىسى بولات نازارباەۆ قايتىس بولدى.

بولات نازارباەۆ شامالعانداعى اۋىلشارۋاشىلىق تەحنيكۋمىن مەحانيك ماماندىعى بويىنشا جانە قاراعاندىداعى زاڭ ينستيتۋتىندا زاڭگەر ماماندىعىنا وقىعان.

«شامالعان» كەڭشارىندا مەحانيزاتور، ديرەكتوردىڭ ورىنباسارى قىزمەتتەرىن اتقارىپ، ۇساق مال تەرىسىن ساتۋ سالاسىندا كاسىپكەرلىك قىزمەتتى جۇرگىزدى، «ىڭكار اگرو» جشس ۆيتسە-پرەزيدەنتى بولدى.

2016 جىلى «ساليقالى ۇرپاق» قايىرىمدىلىق ۇيىمىن قۇرادى. 2022 جىلدىڭ شىلدەسىندە بولات نازارباەۆقا پنەۆمونيا، ترومبوز جانە كومەي وبىرى دياگنوزى قويىلعانى بەلگىلى بولدى.

ارمان دۇيسەنوۆ (1974-2023)

2023 جىلى بەلگىلى سازگەر سازگەر، پروديۋسەر ءارى تەلەجۇرگىزۋشى ارمان دۇيسەنوۆ كەنەت جۇرەگى توقتاپ قالۋىنا بايلانىستى ومىردەن وزدى. ارمان دۇيسەنوۆ 1974 جىلى 4 مامىردا ورال قالاسىندا دۇنيەگە كەلگەن. ول – قازاقستاننىڭ ەڭبەك سىڭىرگەن قايراتكەرى، كومپوزيتور، پروديۋسەر، تەلەجۇرگىزۋشى، بىرنەشە ءاننىڭ اۆتورى.

دارحان جۇنىسبەكوۆ (1990-2023)

حالىق اراسىندا «Darkhan Juzz» لاقاپ اتىمەن تانىمال دارحان جۇنىسبەكوۆ 32 جاسىندا تايلاندتىڭ پحۋكەت ارالىندا جول اپاتىنان كوز جۇمدى. Darkhan Juzz 1991 جىلى 9 تامىزدا الماتىدا دۇنيەگە كەلگەن. ول رەپ ورىنداۋشىسى، ءان اۆتورى جانە دىبىستىق پروديۋسەر. دارحان اندەرىندە كلاسسيكالىق تراپتى، اكۋستيكالىق گيتارانى جانە سەزىمتال ليريكانى بىرىكتىرە ءبىلدى.

قويشىعۇل جىلقىشيەۆ (1948-2023)

قازاقستان جازۋشىلار وداعىنىڭ اتىراۋ وبلىستىق فيليالىنىڭ ديرەكتورى، اقىن، قازاقستاننىڭ ەڭبەك سىڭىرگەن قايراتكەرى، قويشىعۇل جىلقىشيەۆ 74 جاسىندا دۇنيەدەن ءوتتى. ول 1948 جىلى 24 قازاندا اتىراۋ وبلىسى يندەر اۋدانى جارسۋات اۋىلدىق كەڭەسىنە قاراستى جامانقۇدىق جايلاۋىندا دۇنيەگە كەلگەن. «تۇڭعىش»، «مۇڭ-كىتاپ»، «اساۋكەر»  جىر جيناقتارىنىڭ اۆتورى. 1996 جىلى م.وتەمىسۇلى تۋرالى پۋبليتسيستيكالىق ماقالارى ءۇشىن قازاقستان جۋرناليستەر وداعىنىڭ ا.بايتۇرسىنوۆ اتىنداعى سىيلىعىن الدى.

*سۋرەتتەر الەۋمەتتىك جەلىلەردەن الىندى!

Abai.kz