جاڭا جىلعا ساناۋلى كۇندەر قالدى. مەرەيلى مەرەكەنىڭ قالىپتاسقان وزىندىك سالت-داستۇرىنە ساي، ۇيىمىزدە شىرشا بوي كوتەرىپ، استا توك اق داستارحان جاياتىنىمىز انىق.  سەبەبى كەلەر جىلدان كۇتەر ءۇمىت تە ارمان دا كوپ. ال تۋعان ەلىنەن جىراقتا مەرزىمدى اسكەري قىزمەتىن اتقارىپ جۇرگەن ساربازداردىڭ بۇل مەيرامدى قالاي اتاپ وتەتىندىگى  بەيمالىم. وسى ورايدا، «شىعىس» وڭىرلىك قولباسشىلىعىنا قاراستى 5518 اسكەري ءبولىمىنىڭ ساربازدارى جاڭا جىل مەرەكەسىن قالاي قارسى الاتىندىعىن ورتاعا سالدى؟  

انۋار ورىنباي، قاتارداعى جاۋىنگەر: 

- الدا كەلە جاتقان جاڭا جىلدى قارسى الۋمەن ءۇشىن ۇلكەن جاۋاپكەرشىلىككە تولى بولماق. وتكەن جىلداعىداي انامنىڭ ازىرلەگەن ىستىق اسىن، ءتۇرلى سالاتتارىن كۇتىپ، ديۆاندا جاڭا جىلدىق كونتسەرت كورىپ جاتپايمىن.

مەملەكەت باسشىسىنىڭ اقجارما تىلەگىنەن كەيىن سىرتتا  وتشاشۋ شاشىپ،  تۋىس-تۋعاندى ارالاپ جۇرمەيمىن. بىلتىرعى جاڭا جىلدىق ءتۇن وسىلاي ءوتتى.  اعايىن-تۋىس اراسىندا دا ارقا-جارقا بولىپ، داستارحان باسىندا دالاداي پەيىلمەن بالاداي ءماز-مەيرام قالىپتا تارقاستىق. ءتۇننىڭ ءبىر ۋاعىندا  ۇيىمىزگە ورالىپ، ءتاتتى ۇيقىنىڭ قوينىنا ەنىپ كەتتىم. الايدا، مەنى تاڭەرتەڭ  كەلەڭسىز وقيعا كۇتىپ تۇردى. ءتۇن ىشىندە كولىگىمنىڭ دابىلقاققىعىشى ىسكە  قوسىلعانىن ەستىگەنىممەن كوككە قاراي اتىلعان وتشاشۋلار داۋىسىنان بولار دەپ توپشىلاپ، ءمان بەرمەپ ەدىم. ەرتەسىندە اۋلاداعى كورىنىس مەن ءۇشىن «توسىن سىي» بولدى. كروسسەۆەر ءتيپتى كولىگىمنىڭ ارت جاق تەرەزەسى شاعىلىپتى. ابىروي بولعاندا، سالون ىشىنە ەنگەن تاس باسقا دۇنيەگە زاقىم كەلتىرمەگەن.  انشەيىن دە، قۇلاققا ۇرعان تاناداي تىنىشتىقتا كۇن كەشكەن ءبىزدىڭ كوشە بۇنداي بۇزاقى ارەكەتتەردەن ادا بولاتىن. مىنە، وسى ءبىر جاعداي مەنىڭ كەشەدەن بەرى ايدىن كولدەي شالقىعان شات كوڭىلىمە قويۋ قارا نۇكتە قويدى. «نەگە مەنىڭ كولىگىم؟ نە جازىپ ەدىم؟» دەگەن ساۋالدار سانامنىڭ ساڭىلاۋىنان مازا بەرمەدى. كولىك ىشىنە تۇسكەن تاستا ادام قولىنىڭ ءىزى قالعان بولار دەپ ساقتاپ قويىپ ەدىم. الايدا، وكىنىشكە وراي، كىم كىنالىنى تابۋ مۇمكىن بولمادى. ءتارتىپ ساقشىلارى ماڭايداعى بەينەكامەرالاردى قاراعانىمەن كۇدىكتىنىڭ نازارعا ىلىگۋى  مۇڭعا اينالدى. ءيا، بۇل مەنىڭ وتكەن جاڭا جىلدىڭ العاشقى كۇنىن قارسى العاننان العان اسەرىم.

ال كەلەر جاڭا جىلدا مەنى جاۋىنگەرلىك جاساق قاتارىندا كوشە ءتارتىبىن  باقىلاۋ كۇتىپ تۇر. بۇل مىندەتتى ابىرويمەن اتقارعىم كەلەدى. ويتكەنى،  اققاينارعا سىلقيا تويىپ الىپ، ويىنا كەلگەنىن ىستەيتىندەر اسىرەسە، ءدال سول ءتۇنى كوپ جۇرەدى. بىلتىرعى مەنىڭ جاعدايىم سياقتى قاننەن قاپەرسىز جاتقان ادامنىڭ جەكە مۇلكىنە زاقىم كەلتىرۋ سياقتى ءىس-ارەكەتتەردىڭ قايتالانباۋىن قالايمىن. سوندىقتان، جاڭا جىلدا جاڭا قۇقىقبۇزۋشىلىقتاردىڭ الدىن العىم كەلەدى. سول ءۇشىن بارىمدى سالامىن. سەبەبى مەرەكەلىك كوڭىل كۇيدە مەيماناسى تاسىعان جان ءۇشىن بۇنداي جاعىمسىز جاعداي تاسادان وق اتقانداي جانىڭا باتادى. مىنە، مەنىڭ الداعى جاڭا جىلىم، مەرەيلى مەرەكەنىڭ قالتارىستارىندا ورىن الاتىن وقيعالاردىڭ الدىن الۋ. جالپى، ەت-جاقىندارىما جاڭا جەتىستىكتەر مەن كاسىبي تابىستار تىلەيمىن. الداعى جىل وڭ وزگەرىستەر مەن قۋانىشتى كەزدەسۋلەرگە، باقىتتى وقيعالارعا تولى بولسىن. جاڭا جىل ءاربىر شاڭىراققا بەيبىت ءومىر، تىنىشتىق جانە مول جاقسىلىقتار اكەلسىن.

عالىمبەك ابىلايحان، قاتارداعى جاۋىنگەر;

- مەن ءۇشىن  جاڭا جىل – جاڭا  ارمان، جاڭا تانىستىقتىڭ العىشارتى ىسپەتتى.  ويتكەنى، مەن بيىلعى جاڭا جىلىمدى ەلىمىزدىڭ تۇكپىر-تۇكپىرىنەن كەلگەن ساربازدار اراسىندا قارسى الامىن. قارۋلاستارىمنىڭ ءبىرى - اقتوبە وبلىسىنان كەلسە، ءبىرى الماتى قالاسىنان شاقىرتىلعان. ارقايسى دا، بيىلعى جاڭا جىل بىلتىرعىدان وزگەرەك بولادى دەپ ءجۇر. ءيا، ارينە شىنىمەن وزگەرەك بولماق. بىلتىر مەن جاڭا جىلدى اتا-انامنىڭ اراسىندا قارسى الىپ، ون ەكىدەن كەيىن جورا-جولداستارىممەن ۋاقىت وتكىزدىم. جالپى، ءبىزدىڭ  اۋلەتتە جاڭا جىل ۋاعىندا تۋىس-تۋعانعا سىيلىق ۇسىنۋ بۇرناعىدان كەلە جاتقان ءداستۇر. مەن جانۇياداعى وسى ءبىر سالتتى ساربازدار اراسىندا  ۇيىمداستىرعىم كەلەدى. اسىپ-تاسىپ جاتقان تۇگىمىز جوق، بارلىعى كوڭىلدە دەپ قانا ويلايمىن. جاقسى ءسوز جارىم ىرىس دەيدى. جاڭا جىلداعى جىلى  لەبىزدىڭ ءوزى قاتاڭ تارتىپپەن قۇرساۋلى جاۋىنگەردىڭ جۇرەگىن بورداي ەزىپ جىبەرەتىنى ءسوزسىز. ءيا، بۇل مەنىڭ عانا جوسپارىم. وزگە وڭىردەن كەلگەن وتان قورعاۋشىلاردىڭ نە ويلاعانى بەلگىسىز. بارلىعىمىز دا توسىننان قۋانتقىمىز كەلەدى. ءيا، جاۋىنگەرلىك قىزمەتتەگى جاڭا جىل سونىسىمەن  دە ەرەكشە، بالكىم. ال، ەلىمىزدە ارقاشان تۇراقتىلىق جانە مىزعىماس تاتۋ ءتاتتى بىرلىگىمىزدىڭ باياندى بولعانىن قالايمىن. ءومىر تىلەيمىن. بەيبىت اسپانىمىزدا اتىلعان وقتىڭ داۋىسى تەك قانا وقۋ جاتتىعۋ الاڭدارىنان عانا ەستىلسىن.  ەلىمىزدىڭ جارقىن كەلەشەگى ءۇشىن ەڭبەكتەنىپ جۇرگەن بارشا قازاق ەلىنە بەيبىت ءومىر، تىنىشتىق جانە مول جاقسىلىق تىلەيمىن.

دۇيسەنباي موراتحان، قاتارداعى جاۋىنگەر:

- مەن ءۇشىن جاڭا جىل تەك جىل باستاۋى عانا دەگەنمەن كۇنتىزبەنىڭ العاشقى  بەتىن البىرت شاقتاعى اڭداماي باسقان قادامداردى قايتالاماي، تۋرا جولمەن ادىمداۋ باستى ماقساتىم. اسكەر قاتارىندا، اسىرەسە، فيزيكالىق  دايىندىعىمدى جوعارى دەڭگەيدە كورسەتكىم كەلەدى. بەلتەمىرگە تارتىلۋ جانە  جاقىن قاشىقتىققا جۇگىرۋ كورسەتكىشىمنىڭ ارتا ءتۇسۋى جولىندا كۇنى-ءتۇنى  قاجىماي دايىندالۋعا ءازىرمىن. ءيا، اسكەر ساپىندا تاڭنىڭ اتىسى مەن كەشتىڭ باتىسى قاس قاعىم ساتتە وتە شىعادى. سوندىقتان، مەن ءۇشىن ۋاقىتپەن ساناسۋ ماڭىزدى. ارينە، اسكەردە سەن ءۇشىن كۇندەلىكتى ءومىر ءسۇرۋدىڭ وزىندىك ءتارتىبى  بەلگىلى ءبىر كەستە ساي جازىلىپ قويعان. دەگەنمەن، بوس ۋاقىتىمدى ءتيىمدى ءھام  ۇتىمدى پايدالانا بىلۋدە بارىمدى سالماقپىن. ارينە، «ەرىنشەكتىڭ ەرتەڭى بىتپەس» دەيدى. مەن وسى جىلى، مەيلى، مويىنۇسىنىپ وتەمىن. الايدا، جاڭا جىل مەن ءۇشىن وزگەرەتىن جىل بولماق. تۇتاس تۇسەتىن جىلاننىڭ تۇلەگەن تەرىسىندەي كەلەر جىلان جىلىنا تولىقتاي جاڭاشا سانا سەزىممەن، جاڭاشا ۇستانىممەن بارماقپىن. سىزدەرگە دە كەلەر جىلدا، كەلەر كۇندە كەلەلى ىستەرگە كوشىڭىزدەر دەپ كەڭەس بەرەمىن. جاڭا جىل جاڭا باقىت اكەلسىن. الايدا، وتان  الدىنداعى پارىزىمىزدى ابىرويلى وتكەرۋ – مەن ءۇشىن، ءبىزدىڭ اۋلەت ءۇشىن دە  ۇلكەن مارتەبە دەپ سانايمىن. ەسكى جىل - مۇڭنىڭ، وكپە-نازدىڭ بارلىعىن ارتقا تاستاپ، قيىندىق اتاۋلىنى وزىمەن بىرگە الا كەتسىن. جاڭا جىل جەتىستىكتەرگە، اسەرلى ساتتەر مەن قۋانىشقا تولى بولسىن.

ازىرلەگەن رۇستەم مۇحامەت-راقىم

وسكەمەن قالاسى

Abai.kz