ۇلتتىق قاۋىپسىزدىك كوميتەتى توراعاسىنىڭ بۇرىنعى ءبىرىنشى ورىنباسارى سامات ابىشكە قاتىستى قىلمىستىق ءىس بويىنشا تەرگەۋ اياقتالدىپ، ءىس سوتقا جىبەرىلگەن.

بۇل تۋرالى:  «قازاقستان رەسپۋبليكاسى باس پروكۋراتۋراسىنىڭ Cوتقا دەيىنگى تەرگەپ-تەكسەرۋ قىزمەتى س.ابىشكە قاتىستى قىلمىستىق ءىستى تەرگەۋدى اياقتاعانىن حابارلايمىن. قر قىلمىستىق كودەكسىنىڭ 362-بابىنىڭ 4-بولىگى بويىنشا ءىس قوزعالىپ، سوتقا جولداندى»، – دەلىنگەن اتالعان قىزمەتتىڭ باسشىسى ريزابەك وجاروۆتىڭ رەسمي جاۋابىندا.

وسى قىلمىستىق ءىس اياسىندا سامات ءابىش اۋىر سالدارعا اكەپ سوقتىرعان بيلىگىن جانە قىزمەتتىك وكىلەتتىگىن اسىرا پايدالاندى دەگەن كۇدىككە ىلىنگەن.
كۇدىكتىگە قاتىستى ەشقايدا كەتپەۋ تۋرالى بۇلتارتپاۋ شاراسى قابىلدانعان.

ول قازىر قازاقستان اۋماعىنان شىقپاعان.

2022 جىلعى 17 قاڭتاردا مەملەكەت باسشىسى قاسىم-جومارت توقاەۆ سامات ءابىشتى قازاقستان رەسپۋبليكاسى ۇلتتىق قاۋىپسىزدىك كوميتەتى توراعاسىنىڭ ءبىرىنشى ورىنباسارى قىزمەتىنەن بوساتقان بولاتىن.

بۇعان دەيىن ۇقك 5-دەپارتامەنتىنىڭ بۇرىنعى باستىعى رۋسلان ىسقاقوۆ قاڭتار وقيعاسى كەزىندە وزىنە نۇرسۇلتان نازارباەۆتىڭ نەمەرە ءىنىسى سامات ءابىش بۇيرىق بەرگەنىن مالىمدەگەن.

«قىلمىستىق ىستە مەملەكەتتىك قۇپيالاردى قامتىعان مالىمەتتەر بار ەكەنىن ەسكەرە وتىرىپ، سوتقا دەيىنگى تەرگەپ-تەكسەرۋ دەرەكتەرى جاريا ەتىلمەيدى»، – دەپ اتالىپ وتىلگەن جوعارىداعى حابارلامادا.

Abai.kz