پرەزيدەنت قاسىم-جومارت توقاەۆ يتالياعا رەسمي ساپارمەن باردى. بۇل تۋرالى اقوردا حابارلادى.

مەملەكەت باسشىسىن ريم اۋەجايىنان يتاليانىڭ قورعانىس ءمينيسترى گۆيدو كروزەتتو، ريم پاپاسىنىڭ وكىلى فرانچەسكو كاناليني قۇرمەتپەن كۇتىپ الدى. ساپار بارىسىندا توقاەۆ يتاليا پرەزيدەنتى سەردجو ماتتارەللامەن، پرەمەر-مينيستر دجوردجا مەلونيمەن كەلىسسوزدەر جۇرگىزبەك. ال ەرتەڭ ۆاتيكاندا ريم پاپاسى فرانتسيسكپەن كەزدەسەدى.

توقاەۆتىڭ 2024 جىلعى شەتەلگە ساپارىن ريمنەن باستاۋى كەزدەيسوقتىق ەمەس. سەبەبى، يتاليا قازاقستاننىڭ ساۋدا سەرىكتەستەرىنىڭ ۇشتىگىندە تۇرعان ەل. ەلىمىزدىڭ سىرتقى ساۋداسىنىڭ 11 پايىزىن يتالياندىق بيزنەس الادى.
قازاقستان مەن يتاليا اراسىنداعى ساۋدا-ەكونوميكالىق ارىپتەستىك قارقىندى دامىپ كەلەدى. قازاقستان مەن يتاليا 2009 جىلعى 5 قاراشادا ستراتەگيالىق ارىپتەستىك تۋرالى مەملەكەتارالىق شارتقا قول قويدى. سودان 10 جىل وتكەننەن كەيىن 2019 جىلى ەكى ەل اراسىنداعى تاۋىر اينالىمى 2,7 ملرد ەۋروعا جەتىپ، رەكوردتىق كورسەتكىشكە قول جەتكىزدى.

الەمدىك پاندەميا جىلدارى ەكونوميكاعا قاتتى السىرەدى، دەگەنمەن قازاقستان مەن يتاليا پاندەمياعا دەيىنگى تابىستى كەزەڭگە ورالۋدى ماقسات ەتىپ وتىر.
2023 جىلدىڭ قىركۇيەگىندە پرەمەر-مينيستر ءاليحان سمايىلوۆ ەلدەر اراسىندا ساۋدانى ۇلعايتۋعا الەۋەتىمىز بار ەكەنىن اتاپ وتكەن بولاتىن. ونىڭ ايتۋىنشا، قازاقستاندىق ءونىمنىڭ يتالياعا ەكسپورتىن 110 تاۋار پوزيتسياسى بويىنشا $900 ملن-نان استام سوماعا ۇلعايتۋعا بولادى.

ايتا كەتەيىك، يتاليا ەۋروپا ەلدەرىنىڭ ىشىندە قازاقستان مۇنايىنىڭ كوپتەگەن جىلدار بويعى ەڭ ءىرى تۇتىنۋشىسى.

مۇناي مەن مۇناي ونىمدەرىنىڭ قازاقستاننان يتالياعا ەكسپورتى 2023 جىلدىڭ قاڭتار-قازان ايلارى ارالىعىندا 20,1 ملرد توننانى قۇرادى. ونىڭ قۇنى - $11,8 ملرد.

قازاقستان مەن يتاليا ەنەرگەتيكا سالاسىنان باسقا دا سالالاردا ىنتىماقتاستىق ورناتقان.

بىلتىر 23 مامىردا قر پرەزيدەنتى قاسىم-جومارت توقاەۆ يتاليا پرەمەر-ءمينيسترى دجوردجي مەلونيمەن يتاليا تاراپىنىڭ باستاماسىمەن تەلەفون ارقىلى سويلەستى. سول كەزدە تاراپتار ساياسي، ساۋدا-ەكونوميكالىق، ينۆەستيتسيالىق جانە گۋمانيتارلىق ىنتىماقتاستىقتى دامىتۋ پەرسپەكتيۆالارىن تالقىلاعان بولاتىن. بۇدان باسقا، ەنەرگەتيكا، كولىك، ونەركاسىپتىك كووپەراتسيا جانە اۋىل شارۋاشىلىعى سالالارىنداعى جاڭا بىرلەسكەن جوبالاردى ىسكە اسىرۋ ماسەلەلەرى قارالدى.

ەكى ەل ءبىلىم بەرۋ سالاسىندا ايتارلىقتاي جەتىستىكككە جەتتى: قازاقستاندىق جانە يتالياندىق جوعارى وقۋ ورىندارى اراسىندا 30-دان استام كەلىسىم جاسالدى. 2023 جىلعى 30 قاراشادا الماتى قالاسىندا يتالياندىق مادەنيەت ينستيتۋتىنىڭ اشىلۋى ءوتتى.

2022 جىلدىڭ قىركۇيەگىندە ريم پاپاسى فرانتسيسك قازاقستانعا كەلىپ، استانادا وتكەن الەمدىك دىندەر مەن ءداستۇرلى دىندەر كوشباسشىلارىنىڭ VII سەزىنە قاتىسىپ كەتكەن.

قازاقستان پرەزيدەنتىنىڭ بۇل جولعى ساپارىنان دا وڭ وزگەرىستەر كۇتىلىپ وتىر. مەملەكەت باسشىسىنىڭ يتالياعا ساپارى ەكىجاقتى ىنتىماقتاستىققا جاڭ سەرپىن بەرەدى، ءارى ساۋدا، ەنەرگەتيكا، كولىك، اۋىل شارۋاشىلىعى، سونداي-اق ينۆەستيتسيالار تارتۋ سالالارىنداعى ءوزارا ءىس-قيمىل اۋقىمىن كەڭەيتۋگە مۇمكىندىك اشادى، دەيدى ساراپشىلار بولجامىندا.

Abai.kz