اباي اتىنداعى قازاق مەملەكەتتىك اكادەميالىق وپەرا جانە بالەت تەاترى. قويىلىمنىڭ باستالۋىنا بىرنەشە مينۋت بار. كورەرمەن باستالۋىن اسىعا كۇتىپ وتىر، سىبىرلاسىپ سويلەسىپ ەرەكشە اسەر كۇتەدى. سوڭىندا جارىق ءسونىپ، پەردە باياۋ اشىلادى. قويىلىم باستالادى.

تەاترلىق ارەكەتتىڭ ارتىندا كوزگە كورىنبەيتىن ەڭبەك جاتىر. قويىلىم ءمىنسىز ءوتۋى ءۇشىن ونداعان ادام ساحنا سىرتىندا ەڭبەك ەتەدى. ونىڭ ىشىندە رەجيسسەردىڭ كومەكشىسى ايرىقشا ءرول اتقارادى. ءاليا جاباەۆا پەن گالينا بۋلگارتسەۆا – اباي اتىنداعى قازاق مەملەكەتتىك اكادەميالىق وپەرا جانە بالەت تەاترىندا جىلدار بويى قويىلىم جاساپ كەلە جاتقان جاندار.

قويىلىم باسىندا ەسىمدەرى جازىلعانىمەن، ولاردى تانيتىن جاندار كەمدە-كەم. ءاليا اتالعان ونەر ورداسىندا 28 جىل بويى جۇمىس ىستەپ كەلە جاتسا، گالينانىڭ 40 جىلعا جۋىق جۇمىس ءوتىلى بار.

«ابايداعى» وپەرالاردىڭ ءبىرى قالاي دايىندالىپ جاتقانىن كوزبەن كوردىك. گالينا وركەستر ويىنىنىڭ نوتالارىن مۇقيات باقىلاسا، ءاليا اباي پارتياسىن ورىنداپ جاتقان ءارتىس تالعات كۇزەمباەۆپەن قوسىلا شىرقاپ تۇر.

– پارتيانى جاتقا بىلەسىز بە؟ – دەپ سۇرادىق قىزىعا.

– البەتتە، جوق! – دەيدى ءاليا. – ەڭ سۇيىكتى دەگەن تۇستارىمدى عانا بىلەمىن. ونىڭ ۇستىنە «اباي» وپەراسىندا ابايدىڭ مەلودياسى كوپ.

رەجيسسەردىڭ كومەكشىسىنە وپەرا ساقتاۋشىسى ديانا اكىمباەۆا جاقىندادى:

– اكتەر ءۇشىن دوڭگەلەك كورپە سۇراڭىزشى! ۆيدەو بويىنشا ساحنادا كىلەمدە وتىرۋ كەرەك.

ءاليا راتسيامەن رەكۆيزيت قوسۋ كەرەكتىگىن جەتكىزەدى. بۇل – رەپيتيتسيادا بولاتىن جاعدايلاردىڭ  ءبىرى عانا. وسىنىڭ ءبارىن رەجيسسەردىڭ كومەكشىلەرى مۇقيات قاداعالايدى. ولار ءارتىس پەن قويۋشى رەجيسسەر اراسىنداعى كوپىر سىندى. گالينا مەن ءاليانىڭ ناقتى قانداي ءرول اتقاراتىنىن سۇراعانىمىزدا، مىناداي جاۋاپ الدىق:

– دەكوراتسيا ورنىندا ما، ارتىستەر دايىن با، سونى قاداعالايمىز. جوعارىداعىلارعا قاي ۋاقىتتا پەردەنى ءتۇسىرىپ-كوتەرۋ كەرەكتىگىن ايتامىز. ماەسترو مەن سوليستەردى شاقىرامىز، كىم قاي جەردەن شىعاتىنىن كورسەتىپ تۇرامىز. رەجيسسەر قويىلىمدى باستاعان كەزدە ءبىز رەجيسسەردىڭ ويى ىسكە اسۋى ءۇشىن پروتسەستى باقىلايمىز، - دەپ ءتۇسىندىردى گالينا.

– ءيا، ءبىز قويىلىمدى قاداعالاپ، قاي نوتادا جارىقتى قوسىپ، دەكوراتسيا اۋىسقاندا قاي سوليست شىعاتىنىن باقىلايمىز، - دەيدى ءاليا.

– باسقاشا ايتقاندا، ءبىز – قويىلىم جەتەكشىلەرىمىز، بۇكىل قىزمەتتىڭ جۇمىسىن باقىلايمىز، - دەيدى گالينا. – مىسالى، ماشينيستەر جۇمىس ىستەيتىن «ايد»، «سپارتاك»، «كورسار»، «سەۆيل شاشتارازى» سياقتى قويىلىمدار بار.

– راتسيا ارقىلى بۇيرىق بەرەمىز: «جوعارىداعىلار، اۋىسىمعا دايىندالامىز. ماشينيستەر، شىعامىز، قوزعالامىز. جارىق بەرۋشىلەر، جارىق بەرەمىز، وتىزىنشى ارەكەت. ۆيدەو، قوسىلامىز!» قويىلىم تەك ءبىزدىڭ بۇيرىعىمىزبەن قويىلادى، - دەيدى ءاليا. – قازىر بارلىق قويىلىم تەحنيكالىق تۇرعىدا وتە كۇردەلى. بۇرىن دەكوراتسيالاردان تەك ارتىنداعى زاتتار عانا بولاتىن. قازىر ۆيدەو، الىپ ستانوكتار، بيىك دەكوراتسيالار پايدا بولدى.

ءاليا جاباەۆا مەن گالينا بۋلگارتسەۆا شىعارماشىلىق تۇرعىدا بىرگە ەكەندەرىن سەزىنەدى. ولار تەحنيكالىق تۇرعىدا تسەحتارمەن تىعىز قارىم-قاتىناستا جۇمىس ىستەسە دە، ماماندىق مۋزىكالىق ءبىلىمنىڭ بولۋىن تالاپ ەتەدى، ويتكەنى تەاتردىڭ بۇكىل دەپارتامەنتىن ءبىرتۇتاس دۇنيەگە اينالدىرۋ كەرەك.

قويىلىم مەن رەپيتيتسيا اراسىندا قانشاما جىل تەر توگىپ جۇرسە دە، ولار ماماندىقتارىنان جالىقپايتىندارىن ايتادى. ويتكەنى جاۋىزدىق مەن مەيىرىم، ءومىردىڭ ماعىناسى مەن ادام بولمىسىنىڭ ءمانى، رۋحاني دۇنيە مەن قۇدايعا دەگەن سەنىم ۇنەمى وزەك بولاتىن كلاسسيكا كىم-كىمدى دە جالىقتىرمايتىنى ءسوزسىز. قويىلىمدى ءار كورگەن سايىن تۋىندىدان جاڭاشا ءمان تابادى.

– ءبىرىنشى قوڭىراۋ، پەردە جابىلدى، كورەرمەن زالعا شىقتى. ءبىتتى، بۇل ۋاقىتتان باستاپ بىزدەن باسقا ەشكىم كوماندير ەمەس! ءار قويىلىم سايىن وسىلاي! – دەيدى گالينا مەن ءاليا.

اۆتور: پولينا چيحيچينا

اۋدارعان: مەيىرگۇل وڭعاروۆا

سۋرەت: كجا

Abai.kz