بۇگىن 74 جاسىنا قاراعان شاعىندا قازاقستاننىڭ ەڭبەك سىڭىرگەن قايراتكەرى، جازۋشى جۇماباي شاشتايۇلى ومىردەن ءوتتى.

جۇماباي شاشتايۇلى - قر پرەزيدەنتىنىڭ ستيپەندياتى، حالىقارارىق جامبىل جانە «الاش» سىيلىقتارىنىڭ لاۋرەاتى، قازاقستان جازۋشىلار وداعىنىڭ مۇشەسى بولعان. ول «كوممۋنيزم جولى»، «لەنينشىل جاس»، «سوتسياليستىك قازاقستان»، «جاس الاش» گازەتتەرىندە، «جالىن» جۋرنالىندا ەڭبەك ەتتى. حالىقارالىق «زامان-قازاقستان» گازەتىنىڭ جانە «قازاق ادەبيەتى» گازەتىنىڭ، قازاق راديوسىنىڭ باس رەداكتورى قىزمەتتەرىن اتقاردى.

جازۋشىنىڭ «قىزىل قار»، «جالا مەن نالا»، «جىر جولبارىس»، «ءبىزدىڭ زاماننىڭ اياز ءبيى»، «جاڭعىرىق» اتتى جيناقتارى مەن روماندارى وقىرماننىڭ جۇرەگىنەن ورىن تاپتى.

Abai.kz اقپاراتتىق پورتالىنىڭ ۇجىمى قازاقتىڭ قارىمدى قالامگەرى جۇماباي شاشتايۇلىنىڭ وتباسى مەن جاقىندارىنا كوڭىل ايتادى.

پرەزيدەنت توقاەۆتىڭ كوڭىل ايتۋى:

مەملەكەت باسشىسى جازۋشى جۇماباي شاشتايۇلىنىڭ وتباسى مەن جاقىن تۋىستارىنا كوڭىل ايتۋ جەدەلحاتىن جولدادى.

«جۇماباي شاشتايۇلى قازاق ادەبيەتىنە وزىندىك قولتاڭباسىن قالدىرىپ، رۋحانياتىمىزدىڭ دامۋىنا ەلەۋلى ۇلەس قوستى. شىعارمالارى كەڭىنەن ناسيحاتتالىپ، وقىرمان تاراپىنان جوعارى باعالاندى. ونەگەلى عۇمىر كەشكەن جۇماباي شاشتايۇلىنىڭ ەسىمى مەن جارقىن بەينەسى حالقىمىزدىڭ جۇرەگىندە ماڭگى ساقتالادى. مارقۇمنىڭ يمانى سالامات، جانى ءجانناتتا بولسىن»، - دەپ جازىلعان جەدەلحاتتا.

سۋرەت kapital.kz سايتىنان الىندى

ايدا بالاەۆا، قر مادەنيەت جانە اقپارات ءمينيسترى:

- قازاقتىڭ قارىمدى قالامگەرى، ابزال ازامات جۇماباي شاشتايۇلىنىڭ ومىردەن وتۋىنە وراي ارتىنان قالعان ۇلكەن اۋلەتتەگى بارلىق باۋىرلارىنا، جاقىندارى مەن تۋعان-تۋىستارىنا قايعىرا كوڭىل ايتامىن.

جۇماباي اعا مەن ءۇشىن كەۋدەسى قازىنا، ويى تەرەڭ، ءىسى ونەگە تۇلعا ەدى.

جۇماعاڭ ءادايىم كىسىلىگى مەن كىشىلىگىنەن تانباي، ادامي بيىك قاسيەتتەرىمەن، اقجارقىن قالپىندا جادىراپ جۇرەتىن. قالامى جۇيرىك قالامگەر رەتىندە قوعام جۇگىن، ەل مۇڭىن كوتەرگەن مازمۇنى تەرەڭ وتكىر ماقالالار، شوقتىعى بيىك شىعارمالار جازىپ، ۇلت رۋحانياتىنا سۇبەلى ۇلەسىن قوستى. سوڭىنان ەرىپ، قولىنا قالام ۇستاعان جاستارعا رۋحاني اكە بولىپ، شاكىرتتەرىنىڭ شىراعىن جاقتى، تالانتىن ۇشتادى. ولار باردا اعامىزدىڭ مول مۇراسى، وشپەس تۋىندىلارى ەشقاشان ۇمىتىلماق ەمەس.

اعامىزدىڭ عيبراتتى عۇمىرى، جارقىن بەينەسى جۇرتشىلىق جادىندا ماڭگى ساقتالادى دەپ سەنەمىن. قاسيەتتى رامازان ايىنداعى دۇعا-تىلەكتەرىمىز قابىل بولسىن. مارقۇمنىڭ جاتقان جەرى جارىق، توپىراعى تورقا بولسىن!

سۋرەت egemen.kz سايتىنان الىندى

ايگۇل ىسماقوۆا، پروفەسسور:

- دۇنيەدەن قازاق ماقتانىش ەتەتىن، جۇسىپبەك ايماۋىتۇلىنشا ءوز زامانىن تانىتىپ كەتكەن، جازۋشى دەگەن ابىرويعا يە بولعان مىقتى قازاق ءوتتى. جۇمەكەڭ ءوز كوركەم شىعارمالارىمەن بىزگە دە، بىزدەن كەيىنگىلەرگە دە قازاق دەگەن جۇرتتىڭ اقىلىن، مارتتىگى مەن ادامدىعىن، نامىسى مەن ابىرويىن اماناتتاپ كەتتى. كەيىپكەرلەرى ءوزى سياقتى قاراپايىم قازاق، ءوز اۋىلىنىڭ زامانداستارى ەدى. اعامداي بولعان دوس ەدى.

جۇمەكەڭدى الپەشتەپ، باۋىرىنداي سىيلاپ، قۇرمەتتەپ وتكەن جارىنا كوڭىل ايتامىن. قاسيەتتى رامازان ايى اللا تاعالا جانناتىق ەتسىن.

سۋرەت: ult.kz

قاسىمحان بەگمانوۆ، اقىن:

- تاڭ اتپاي جەتكەن قارالى حابار كوڭىل-كۇيىمدى بۇزدى. ءتورت - بەس كۇن بۇرىن قازاقستان جازۋشىلار وداعىنىڭ توراعاسى مەرەكە قۇلكەن جازۋشى دوسىنىڭ اۋرۋحانادا اۋىر حالدە جاتقانىن جوعارى جاقتاعى باسشىلارعا جانۇشىرىپ ايتىپ، دارىگەرلەرگە حابارلاسىپ جاتقانىن ەستىپ ەدىم. كوڭىلىم سەنبەپ ەدى. بولماعان ەكەن عوي. وتە وكىنىشتى...

قازىر الماتى اۋەجايىندا اتىراۋدا وتەتىن ۇلتتىق قۇرىلتايعا قاتىسۋعا ۇشقالى تۇرعان جازۋشىلار وداعىنىڭ توراعاسىنا جان دوسىنىڭ، ءومىر بويى قاتار جۇرگەن، سىيلاسقان دوسىنىڭ دۇنيەدەن وتكەنىن امالسىز حابارلاۋعا ءماجبۇر بولدىم. ءومىر دەگەن وسى، بۇگىن بار ادام، ەرتەڭ جوق.

ءيا، قازاقستان جازۋشىلار وداعىنىڭ حاتشىسى، قازاقتىڭ قابىرعالى، تالانتتى جازۋشىسى جۇماباي شاشتايۇلى قاسيەتتى رامازان ايىندا دۇنيەدەن ءوتتى.

جۇماباي اعامىز يماندى، وتە مەيىرىمدى ازامات بولاتىن. اعامىزبەن رياسىز سىيلاستىق. تالاي ساپارلاس بولدىق. جازۋشى جۇماباي شاشتاي عازيز اتىنا كىر شالدىرماي وتكەن ساڭلاق. پەندەشىلىكتەن اۋلاق ءومىر كەشتى.

اسىل اعامىز مىنا جالعاندى تاستاپ، بۇرىنعىلاردىڭ جولىنا ءتۇستى. بىرتىندەپ قازاقتىڭ بۇگىنگى ىرىلەرى كەتىپ جاتىر. جاقىندارىنا، جانۇياسىنا، قالىڭ قازاققا كوڭىل ايتامىن. جانىڭىز ءجانناتتا بولسىن، جۇماباي اعا.

Abai.kz