اتىراۋدا وتكەن ۇلتتىق قۇرىلتايدا پرەزيدەنت توقاەۆ ايتقان ىرعىن-قىرعىن ءسوزدىڭ ەڭ باستىسى – ەلتاڭبانى اۋىستىرۋ تۋرالى ءسوز بولعانى انىق.

«ەلتاڭبامىزعا قاتىستى سىني پىكىرلەر ايتىلىپ قالادى. ونى كەڭەس زامانىنداعى گەربكە ۇقساتىپ جاتادى. تىم ەكلەكتيكالىق، كۇردەلى دەيدى. مۇنداي ويدى ەل ىسىنە بەي-جاي قارامايتىن بەلسەندى ازاماتتار عانا ەمەس، ماماندار دا ايتىپ ءجۇر. ورىندى پايىمدار ەسكەرۋسىز قالماۋى كەرەك. ورتاق كەلىسىمگە كەلگەن جاعدايدا ارناۋلى كوميسسيا قۇرۋعا بولادى. بۇل كوميسسيا ماسەلەنى جان-جاقتى قاراستىرىپ، قوعامدىق تالقىلاۋ وتكىزەدى. سوسىن قازاقستاننىڭ جاڭا ەلتاڭباسىنىڭ جوباسىن جاساۋعا اشىق بايقاۋ جاريالانادى»، - دەدى پرەزيدەنت.

قازىر قازاقستان قوعامى بۇل ايتىلعان سوزدەردى ىزۋ-قىزۋ تالقى جاساۋدا. بۇل باستامانى قولداۋشىلار دا، ونىمەن كەلىسپەۋشىلەر دە جەتكىلىكتى.

بۇگىن ءماجىلىس وتىرىسىندا دەپۋت ەركىن ءابىل ۇكىمەت باسشىسى ولجاس بەكتەنوۆتىڭ اتىنا دەپۋتاتتىق ساۋال جولداپ، ەلتاڭبا اۋىستىرۋ باستاماسى تۋرالى ۇسىنىستارىن ايتىپتى.

«مەملەكەتتىك ەلتاڭبا – تاۋەلسىزدىكتى ايقىنداۋشى سيمۆول. سول سەبەپتى دە مەملەكەت باسشىسى ونى مودەرنيزاتسيالاۋدىڭ مۇمكىندىكتەرىن ۇسىندى. الەۋمەتتىك جەلىدە ءال-ازىردەن وسى تاقىرىپقا قاتىستى تالقى ءجۇرىپ جاتىر.

ەگەر ناقتىلاپ ايتساق، ەلتاڭبامىزعا وسىعان دەيىن دە وزگەرتۋلەر جاسالعان جانە ءبىر مارتە ەمەس. 5 رەت وزگەرتۋ جاسالعان. ودان ەلتاڭبا ايتارلىقتاي وزگەرىپ كەتپەسە دە، ءتۇسى، رەڭى، فورماسى مەن جازۋى وزگەرتىلدى»، - دەيدى دەپۋتات ەركىن ءابىل.

ءماجىلىس دەپۋتاتى ءوز كەزەگىندە قازىرگى جەلىدەگى ىزۋ-قىزۋ تالقىنا ءبىر قالىپقا ءتۇسىرىپ، بۇ لۇسىنىستى جاقتاۋشى جانە كەلىسپەۋشى تاراپتارعا ءوز پىكىرلەرىن ارگۋمەنتتى تۇردە دالەلدەۋگە مۇمكىندىك جاساۋ كەرەكتىگىن ايتادى.

«مەملەكەتتىك ەلتاڭبا قاراپايىم بولۋى كەرەك. ول قازاقستان ازاماتتارىنا عانا تۇسىنىكتى بولماۋى كەرەك. كەز كەلگەن شەتەلدىك ونىڭ ءمان-ماعىناسىن تۇسىنەتىندەي بولۋى كەرەك. ەلتاڭبا وتكەن تاريحىمىز بەن كەلەشەگىمىزدى ساباقتاستىرا ءبىلۋى كەرەك. ەگەر ءبىز التىن وردا مەن قازاقستان الەمدە ەگىز ۇعىمعا اينالسىن دەسەك، ەلتاڭبادا ونىڭ بەلگىلەرى بولۋى كەرەك»، - دەيدى دەپۋتات.

ال تاعى ءبىر ءماجىلىس دەپۋتاتى ابزال قۇسپان: «الەمدىك تاجىريبەگە سۇيەنسەك، مەملەكەت گەربى سول ەلدىڭ تەرەڭ تاريحىمەن، ءتول دۇنيەتانىمىمەن جانە العا قويعان مۇراتىمەن تىعىز بايلانىستى بولادى. گەرب اتاۋىنىڭ ءوزى «مۇرا» دەگەن ۇعىمدى بىلدىرەدى. كەيبىر ەلدەر گەربسىز، ەمبلەمامەن عانا شەكتەلگەن.

بۇل رەتتە، ءبىزدىڭ حالقىمىزدىڭ تاريحى دا ەلدىك نىشاندار بەدەرلەۋ تاجىريبەسىنە باي. تامىرىن ساق، عۇن، تۇرىك قاعاناتى زامانىنان تارتاتىن تاڭبالارىمىز - جالپى گەربتىڭ ءتۇپاتاسى دەۋگە تولىق نەگىز بار. بابالارىمىز قۇرعان كوشپەلى وركەنيەت ءونىمى - تاڭبا جاساۋ ءداستۇرى عۇندار ارقىلى ەۋروپا ەلدەرىنە تارالعان دەۋگە بولادى. سوندىقتان تاريحى تەرەڭ تاڭبا جاساۋ تاجىريبەمىزدى ەل گەربىن جەتىلدىرۋ ىسىنە پايدالانۋدىڭ ماڭىزى زور.

راس، قولدانىستاعى گەربىمىز دە جاقسى جاسالعان. ۇلتىمىزعا ءتان قاستەرلى بەلگىلەرمەن بىرلىك پەن بەيبىتشىلىكتى ايشىقتاۋدى ماقسات تۇتقان. ول وسى كەزەڭنىڭ ەرەكشەلىگى مەن سۇرانىسىنا ساي ەل حالقىن بىرىكتىرۋشىلىك قىزمەتىن مۇلتىكسىز اتقارىپ كەلەدى.

بۇل رەتتە، قازاق مەملەكەتى 1991 جىلى عانا پايدا بولماعانىن، ونىڭ مەملەكەتتىلىك تاريحىنىڭ تەرەڭدە جاتقانىن دا ەسكەرگەنىمىز ءجون. ول - ارعىداعى ساق، عۇن، تۇرىك قاعاناتى، ۇلىق ۇلىس - جوشى ۇلىسىنىڭ، بەرگىدەگى قازاق حاندىعىنىڭ تىكەلەي مۇراگەرى. بۇل - ەرلىك پەن ورلىككە تولى تاريح.

بيىل قازاق دالاسىندا تۋ كوتەرگەن جوشى ۇلىسى - التىن وردانىڭ قۇرىلعانىنا 800 جىل تولۋىن اتاپ وتكەلى وتىرمىز.

مىنە، قازاق ەلىنىڭ وسىنداي تەرەڭ تاريحي ساباقتاستىعى، جاۋىنگەر اتا-بابالارىمىزدىڭ اسقاق رۋحى، مەملەكەتتىلىكتىڭ سۇسى مەن سەسى، اتاعى مەن ايبىنى گەربتە كورىنىس تاپسا يگى. سوندىقتان الداعى ۋاقىتتا وسى باعىتتا كوپ بولىپ كەڭەسۋ ارتىقتىق ەتپەيدى.

وسى ورايدا، پرەزيدەنتتىڭ گەربتى قوعاممەن تالقىلاۋ تۋرالى باستاماسىن قولداي وتىرىپ، ونى تاريحي ساباقتاستىقتى، زامان سۇرانىسىن ەسكەرىپ، جەتىلدىرۋ جايىن ويلاستىرعان ءجون دەپ سانايمىز.

بۇل ماڭىزدى ءىستى وسىعان جاۋاپتى مەملەكەتتىك ورگانداردىڭ قولعا الىپ، كوپشىلىكپەن، ءتيىستى ماماندارمەن، قولدانىستاعى گەرب اۆتورىمەن جان-جاقتى تالقىلاۋ ۇيىمداستىرۋىن ۇسىنامىن»، - دەيدى.

Abai.kz