قازاقستاننىڭ بۇرىنعى پرەمەر-ءمينيسترى ءاليحان سمايىلوۆ قر جوعارى اۋديتورلىق پالاتاسىنىڭ توراعاسى لاۋازىمىنا تاعايىندالدى. بۇل تۋرالى اقوردا مالىمدەدى.

«مەملەكەت باسشىسىنىڭ جارلىعىمەن ءاليحان اسحانۇلى سمايىلوۆ قازاقستان رەسپۋبليكاسى جوعارى اۋديتورلىق پالاتاسىنىڭ توراعاسى لاۋازىمىنا تاعايىندالدى»، - دەلىنگەن پرەزيدەنت جارلىعىندا.

بۇل قىزمەتتى كۇنى بۇگىنگە دەيىن ناتاليا نيكولايقىزى گودۋنوۆا اتقارىپ كەلگەن. پرەزيدەنت جارلىعىنا سايكەس، گودۋنوۆا قىزمەتىنەن بوساتىلدى.

سمايىلوۆتىڭ جاسى 51-دە. 2022 جىلدىڭ 11 قاڭتارىنان باستاپ 2024 جىلدىڭ 5 اقپانىنا دەيىن قازاقستان ۇكىمەتىن تىزگىندەگەن.

ءار جىلدارى قر ستاتيستيكا اگەنتتىگىن، قر قارجى مينيسترلىگىن باسقارعان. قر ۇلتتىق ەكونوميكا مينيسترلىگىندە، قر پرەزيدەنتى اكىمشىلىگىندە، قر سىرتقى ىستەر مينيسترلىگىندە جاۋاپتى قىزمەتتەردە بولعان.

سمايىلوۆ ۇكىمەتتى باسقارعان ەكى جىلدا قازاقستان ۇكىمەتىنە قاراتا ايتىلعان سىن از بولعان جوق. وڭىرلەردەگى قۋاڭشىلىق ماسەلەسى، قىستىڭ قاقاعان ايازىندا جەو-لاردىڭ كەزەك-كەزەك جارىلۋى، باعا ءوسىمىنىڭ تەجەلمەۋى، بيۋدجەت شىعىندارىنىڭ توقتاۋسىز ءوسۋى، بۇكىل ەنەرگەتيكالىق (تەتس، قۇبىر), كوممۋنالدى ينفراقۇرىلىمنىڭ ەسكىرۋى، ماسەلەنى شەشۋدە كرەاتيۆتى كوزقاراستىڭ جوقتىعى ت.ب.

جالپى، ءاليحان سمايىلوۆ كومانداسىندا ماسەلەنى شەشۋدە باتىل شەشىم مەن كرەاتيۆ جوقتىڭ-قاسى بولدى. وعان ايتىلعان سىننىڭ دەنى وسىعان بايلانىستى بولدى. بارلىق جارقىن باستامالاردى ۇكىمەتىشىلىك بيۋروكراتيا تەجەدى.  بيۋروكراتيا - قازاقتىڭ ناعىز سورىنا اينالىپ وتىرعانى ەشكىمگە جۇمباق ەمەس. پرەمەردىڭ ايتقانى اكىمدەرگە باسقاشا جەتىپ وتىردى. سمايىلوۆ «شاش» دەسە، وبلىس اكىمى ونى «قۇلاق» دەپ ەستىدى. سول سەبەپتى ءاليحان سمايىلوۆ تا ەكى جىلدا راسىمەن شارشادى. سمايىلوۆ ۇكىمەتىشىلىك بيۋروكراتيامەن كۇرەسۋگە تالپىندى. بىراق، قولىنان كەلمەدى.

اۋەلدەن ستاتيست مامان ەندى جوعارى اۋديتورلىق پالاتاسىنىڭ توراعاسى لاۋازىمىنا تاعايىندالدى. سمايىلوۆ ەندى ەسەپپەن شۇعىلدانباق. بۇل قىزمەت سمايىلوۆتىڭ قولىنان كەلە مە، جوق پا، ۋاقىت كورسەتە جاتار...

Abai.kz