كۇنى كەشە عانا «رەسەي سۋ جىبەردى: ورالعا سۋ باسۋ قاۋپى ءتوندى!» دەپ جازعان ەدىك. ورال جۇرتى قىزىل سۋدىڭ قۇرساۋىندا قالۋى مۇمكىندىگى تۋرالى ءماجىلىس دەپۋتاتى ابزال قۇسپان وڭىرگە جاساعان ساپارى بارىسىندا بىرنەشە كەزەك دابىل قاققان. بۇل تۋرالى Mezgil.kz پورتالى جازدى. 

وسىعان دەيىن ورال وڭىرىندە، بقو-دا توتەنشە جاعداي رەجيمى جاريالانىپ، ال بۇگىن پرەزيدەنت توقاەۆ ساپارلاپ قايتتى. پرەزيدەنت باتىس قازاقستان وبلىسىنىڭ سۋ باسقان اۋماقتارىن تىكۇشاقپەن ارالادى. تەرەكتى، سىرىم جانە قاراتوبە اۋداندارىنداعى قالىپتاسقان جاعدايمەن تانىستى. قاراتوبە اۋدانىنداعى ەۆاكۋاتسيالىق پۋنكتكە باردى.

توتەنشە جاعداي: ورالداعى قازىرگى احۋال قانداي؟

(سۋرەت اقوردا تەلەگرام ارناسىنان الىندى)

وبلىس اكىمى ناريمان تورەعاليەۆ پرەزيدەنتكە بۇگىندە 6 اۋدان مەن ورال قالاسىن سۋ باسقانىن باياندادى. قارعىن سۋ 552 تۇرعىن ۇيگە، 427 ساياجاي تەلىمىنە زيان كەلتىرگەن. ءوڭىر باسشىسىنىڭ ايتۋىنشا، سۋ تاسقىنىنا قارسى شارالارعا 1911 ادام، 332 تەحنيكا، 101 موتوپومپا، 1 تىكۇشاق جۇمىلدىرىلعان.

سونىمەن قاتار قۇتقارۋ جۇمىستارىنا الماتى جانە ماڭعىستاۋ وبلىستارىنىڭ قۇتقارۋشىلارى اتسالىسىپ جاتىر. قارعىن سۋ باسقان اۋماقتاردان 7 مىڭعا جۋىق تۇرعىن كوشىرىلگەن، جەدەل-ەۆاكۋاتسيالاۋ پۋنكتتەرى قۇرىلعان. زارداپ شەككەندەرگە بىرجولعى ماتەريالدىق كومەك كورسەتۋ ءۇشىن جەرگىلىكتى بيۋدجەت ەسەبىنەن 63 ميلليون تەڭگە قارجى ءبولىندى.

رەسەي سۋ جىبەرىپ جاتىر: ورالعا قاۋىپ ءتونىپ تۇر!

«ازاتتىق راديوسىنىڭ» جازۋىنشا، قازاقستاندا بيىل كوكتەمدە تاسقىن قاۋپى ءتونىپ، توتەنشە جاعداي رەجيمىن جاريالاعان العاشقى ايماق – باتىس قازاقستان وبلىسى. ورال قالاسى ماڭىنداعى اۋىلدار مەن ساياجاي الابىنىڭ حالقى قاۋىپتى ايماقتان كوشىرىلدى.

ادامدار تەك قۇجاتتارى مەن ازىن-اۋلاق كيىمىن عانا الىپ ۇلگەرگەن. ال ۇيلەرى تۇگەلدەي دەرلىك سۋ استىندا قالدى. بىراق تاياۋ ارادا سۋ دەڭگەيى تاعى كوتەرىلۋى مۇمكىن. ويتكەنى رەسەي ورىنبور وبلىسىنداعى يريكلا (يرەكلە) سۋ قويماسىنان ارتىق سۋدى اعىزا باستاعان.

«باستاۋىن رەسەي فەدەراتسياسى اۋماعىنان الاتىن بەس ترانسشەكارالىق وزەن سۋىنىڭ دەڭگەيى كوتەرىلىپ كەلەدى. سونىڭ سالدارىنان «جاڭاقالا» مەن «قازتالوۆ» اۋدارىنداعى «قاراوزەن» مەن «سارىوزەندە» سۋ دەڭگەيى كوتەرىلەدى. «شاعان» مەن «دەركولگە» دە قاۋىپ ءتوندى. جايىق وزەنىنىڭ دەڭگەيى كوتەرىلدى»، - دەپ جازىلعان بقو اكىمدىگىنىڭ حابارلاماسىندا.

ايتا كەتەيىك، رەسەيدىڭ 22 وڭىرىندە كوكتەمگى تاسقىن سۋ جۇرتتى ابىگەرگە سالۋدا. كەيبىر وڭىرلەردە توتەنشە جاعداي رەجيمى جاريالانعان. رەسەي اۋماعىندا تاسقىن سۋدان ەڭ قاتتى زاردەپ شەككەن ايماق – ورىنبور ايماعى. وندا 540-تان استام ءۇي سۋعا كەتىپ، قيراعان.

رەسەيدەگى تاسقىن سۋ قازاقستاننىڭ 5 وزەنىنە تىكەلەي اعادى

بۇگىن بەلگىلى بولعان اقپارات: رەسەيدەگى تاسقىن سۋ قازاقستاننىڭ 5 وزەنىنە تىكەلەي اعادى. سايكەسىنشە، قازاقستاننىڭ 5 وزەنى ارناسىنان تاسۋى، جولىنداعى ەلدىمەكەندەردى سۋ شايۋى قاۋپى جوعارىلادى.

«قازاقستاننىڭ 5 وزەنى باستاۋىن رەسەيدەن الۋىنا بايلانىستى، ءبىز رەسەيدەگى ارىپتەستەرىمىزبەن اقپارات الماسىپ وتىرمىز. بۇل جاعدايدى ەگجەي-تەگجەيلى ساراپتاۋعا، بولجالدى قاۋىپ-قاتەرلەردى ەسەپتەۋگە جانە تاسقىن سۋدى اعىزۋ شارالارىن جوسپارلاۋعا، اكىمدىكتەر مەن تجد وكىلدەرىن الدىن الا ەسكەرتۋگە مۇمكىندىك بەرەدى»، - دەيدى قر سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ.

مينيسترلىك، ءدال قازىر رەسەيدىڭ ورىنبور جانە سارىتاۋ (ساراتوۆ) وبلىستارىنىڭ سۋ رەسۋرستارى باسقارماسىنىڭ وكىلدەرىمەن بايلانىستا ەكەنىن ايتقان.

«رەسەيدە تاسقىن سۋدىڭ مولشەرى شامادان اسقانى سەبەپتى، ءبىز رەسەيدىڭ «روسگيدرومەتىمەن» كۇن سايىن جايىق، ۇلكەن جانە كىشى وزەن، شاعان جانە دەركول وزدەردەرىندەگى گيدرولوگيالىق احۋال جايلى اقپارات الماسۋدامىز»، - دەيدى مينيسترلىك.

(«ۆەرحنەۋرالسكى» سۋ قويماسى)

ال «روسگيدرومەت»: «ەرىگەن قار سۋىنىڭ، تاسقىن سۋدىڭ مولشەرى ارتۋىنا بايلانىستى ورال وزەنىنىڭ سۋى 2023 جىلعى كورسەتكىشپەن سالىستىرعاندا 2-2,5 ەسە كوپ بولادى»، - دەيدى.

اتاپ ايتقاندا: رف چەليابى وبلىسىنداعى «ۆەرحنەۋرالسكى» سۋ قويماسىندا كۇتىلەتىن تاسقىننىڭ كولەمى – 0,36-دان 0,46 كۋب كيليمەترگە دەيىن جەتپەك. بۇل بىلتىرىدان 9 ەسە كوپ سۋ دەگەن ءسوز.

ال ورىنبور وبلىسىنداعى «يريكلي» سۋ قويماسىنداعى سۋ 2,5-تەن 3,5 كۋب كيلومەترگە دەيىن جەتىپ وتىر. بۇل بىلتىرعىدان 2 ەسە كوپ سۋ دەگەن ءسوز. بۇل سۋلار اعىزىلاتىن بولسا، اۋەلى باتىس قازاقستان اۋماعىنا قاۋىپ تونگەلى وتىر.

(«يريكلي» سۋ قويماسى)

قازىرگى تاڭدا قازقاستاننىڭ 6 وڭىرىندە 1,3 مىڭنان استام ءۇي سۋ استىندا قالىپ وتىر. تاسقىن سۋدىڭ بەتى قايتار ەمەس. 105 جول ۋچاسكەسىنەن سۋ تاسىپ جاتىر. 78 تراسسا مەن 4 كوپىر جوندەلۋدە. بۇل تۋرنالى قر تجم داعدارىس ورتالىعى حابارلادى.

«سۋ باسقان ايماقتارداعى جۇرتتى ەۆاكۋاتسيالاۋ تاۋلىك بويى جۇرگىزىلۋدە. وتكەن تاۋلىكتە عانا 1524 ادام قاۋىپسىز ورىنعا كوشىرىلدى. ولاردىڭ 496-سى بالالار»، - دەدى قر تجم ءمينيسترى شىڭعىس ءارىنوۆ.

قاي ايماقتاردا احۋال كۇردەلى؟

مينيسترلىك اقپارانشا، سۋ تاسقىنى جاعدايى ءالى كۇردەلى كۇيىندە قالىپ وتىرعان ايماقتار: قاراعاندى، قوستاناي، اقمولا وبلىستارى. وسىعان دەيىن قازاقستاننىڭ 8 وڭىرىندە توتەنشە جاعداي رەجيمى جاريالانعان. بۇگىن بۇل ساناتقا پەتروپاۆل قوسىلدى.

كىمدەر كومەك ۇسىنۋدا؟

قر سىرتقى ىستەر ءمينيسترى مۇرات نۇرتىلەۋ بۇل سۇراققا: «كورشىلەس مەملەكەتتەر بىزگە تاسقىن سۋدىڭ زارداپتارىن جويۋعا كومەك ۇسىندى. ءبىز ازىرگە باس تارتتىق. سەبەبى، قازىر ءوز كۇشىمىز جەتىپ جاتىر»، - دەپ جاۋاپ بەردى. بىراق، ناقتى قاي كورشىلەردىڭ كومەك ۇسىنعانىن اشىپ ايتپادى.

قىرعىزستان

ال قىرعىزستاننىڭ توتەنشە جاعدايلار مينيسترلىگى قازاقستانعا كومەك ۇسىنعانىن، بىراق قازاقستان تارابى كومەكتەن باس تارتقانىن مالىمدەدى.

قىرعىزستاننىڭ مينيسترلەر كابينەتىنىڭ توراعاسى اكىلبەك جاپاروۆتىڭ مالىمدەۋىنشە، قىرعىزستان پرەزيدەنتىنىڭ تاپسىرماسىمەن بىشكەك قازاقستانعا گۋمانيتارلىق كومەك جىبەرۋدى جوسپارلاپ وتىر.

ونىڭ ايتۋىنشا، قازاقستان بىشكەك قالاسىنداعى جىلۋ-ەلەكتر ورتالىعىندا بولعان اپاتتان كەيىن كومەك قولىن سوزعان.

«ولار (قازاقستان – اۆتور) كومەك سۇراماسا دا، ءبىز گۋمانيتارلىق كومەك جونەلتەمىز. بۇل رەتتە مەن وزبەكستان، تۇركىمەنستان جانە قازاقستانعا العىس بىلدىرەمىن. بۇل ەلدەر ءبىز كومەك سۇراماعان كەزدە دە بىزگە قول ۇشىن سوزىپ، جاردەمگە كەلدى»، – دەپ اتاپ ءوتتى اكىلبەك جاپاروۆ.

Abai.kz