اتىراۋدا جايىق وزەنىنىڭ دەڭگەيى كوتەرىلىپ، قاۋىپتى شەككە جەتتى. بۇل تۋرالى اتىراۋ وبلىسىنىڭ توتەنشە جاعدايلار جونىندەگى جەدەل شتابى مالىمدەدى.

اتىراۋ وبلىسى تج جەدەل شتابىنىڭ مالىمەتىنشە:

*اتىراۋ (+6 سم): قازىر سۋدىڭ دەڭگەيى – 551 سم-گە جەتكەن، ال قاۋىپتى شەك – 550 سم;

* يندەربور كەنتى (+3 سم): قازىر سۋدىڭ دەڭگەيى – 1041 سم-گە جەتكەن، ال قاۋىپتى شەك – 845 سم;

* ماحامبەت اۋىلى (+14 سم): قازىر سۋدىڭ دەڭگەيى – 980 سم-گە جەتكەن، ال قاۋىپتى شەك – 850 سم;

* جاڭاتالاپ اۋىلى (+7 سم): قازىر سۋدىڭ دەڭگەيى – 398 سم-گە جەتكەن، ال قاۋىپتى شەك – 500 سم;

* ەركىندالا اۋىلى (+5 سم): قازىر سۋدىڭ دەڭگەيى – 356 سم-گە جەتكەن، ال قاۋىپتى شەك – 450 سم.

باق مالەمەتتەرىنە سۇيەنسەك، جايىق وزەنىنىڭ بويىن بويلاي ورنالاسقان ەلدىمەكەندەر مەن كەنتتەردىڭ ماڭىنداعى سۋ باسۋ قاۋپى تونگەن جەرلەرگە كۇزەت قويىلعان. قارعىن سۋمەن كۇرەسكە توتەنشە جاعدايلار قىزمەتكەرلەرى، جەرگىلىكتى تۇرعىندار مەن ەڭبەك ۇجىمدارى جۇمىلدىرىلعان. كەزەكشىلىككە شىققاندار سۋ جارىپ وتكەن بوگەتتەردى دەرەۋ بەكىتىپ وتىرادى دەلىنگەن اقپاراتتا.

كۇنى كەشە عانا قر ۇكىمەت باسشىسىنىڭ ورىنباسارى قانات بوزىمباەۆ اتىراۋداعى سۋ تاسقىنىنا قارسى قۇرىلىستاردى تەكسەرىپ قايتقان ەدى.

«تەكسەرىلگەن العاشقى نىسان – «سوكولوك» ارناسى بولدى. 32 شاقىرىمعا سوزىلعان جايىق وزەنىنىڭ ۇلكەن سۋ اعىسىن اتىراۋعا قاراي باعىتتاۋعا ارنالعان. «سوكولوك» ارناسى قالانى اينالىپ ءوتىپ، جايىق پەن كاسپي تەڭىزىن قوسادى جانە سەكۋندىنا 100 تەكشە مەتر سۋ قابىلداي الادى. سونداي-اق، ۆيتسە-پرەمەر ۇزىندىعى 24 شاقىرىم بولاتىن جاڭا ارنانىڭ جۇمىسىن تەكسەردى»، - دەپ حابارلاعان ۇكىمەت ءباسپاسوزى.

وسىعان دەيىن، اتىراۋدا سۋ تاسقىنىنىڭ شارىقتاۋ شەگى شامامەن 4-5 كۇننەن كەيىن بولادى دەپ بولجانعان. كەشە اتىراۋعا بارعان ۆيتسە-پرەمەر قانات بوزىمباەۆ جاعالاۋدىڭ سۋ شايىپ كەتەتىن جەرلەرىندە بوگەتتەردى نىعايتۋدى تاپسىرعان.

اتىراۋ جاقتاعى جۇرت بيىل تاسقىن سۋدىڭ زاردابىن ابدەن تارتىپ كەلەدى. تاسقىن وبلىستاعى جۇرتتى ناۋرىزدان بەرى ابىگەرگە سالۋدا.

اۋەلى ويىل مەن جەم وزەندەرى تاسىپ، ءوڭىردىڭ شىعىسى مەن سولتۇستىك-شىعىسىنداعى تۇتاستاي ەلدىمەكەندەر سۋعا كەتتى.

ونان سوڭ، قىزىلقوعا مەن جىلىوي اۋداندارىندا توتەنشە جاعداي جاريالاندى.

كەيىن 65 مىڭنان استام حالقى بار قۇلساپى تۇگەلدەي سۋعا كەتتى.

وسىدان سوڭ، وڭىردەگى قارعىن سۋدىڭ بەتى قايتقانداي، اپات ارتتا قالعانداي بولعان. ءتىپتى، وڭىردەگى ءبىراز جۇرت ءوز ءۇي-جايلارىنا ورالىپ، مەملەكەتتەن ءتيىستى وتەماقىسىن الۋعا ارەكەتتەنە باستاعان. ارادا تۋرا ءبىر ايعا جۋىق ۋاقىت وتكەندە، تاسقىن سۋدىڭ قاۋپى قايتا تۋدى. بۇل جولى قاۋىپ اتىراۋ قالاسىنا ءتونىپ تۇر.

ەلىمىزدىڭ باتىسىنداعى مۇنايلى ولكە اتىراۋ وبلىسىنداعى 700 مىڭنان كوپ حالىقتىڭ تەڭ جارتىسى (2022 جىلعى دەرەك بويىنشا 320 مىڭ) اتىراۋ قالاسىندا تۇرادى.

Abai.kz