دۋمانىڭ ۆيتسە-سپيكەرى قازاققا قوقان-لوقى جاسادى!
![](https://abai.kz/content/uploads/2024/05/poen.jpg)
99 جىل تاريحىندا اۋەلى كسرو-نىڭ، كەيىن رەۆانشيستىك پۋتين يمپەرياسىنىڭ ساندۋعاشىنا اينالعان «كومسومولسكايا پراۆدا» مەدياحولدينگىنە قاراستى «كپ» راديوسىنىڭ ءتىلشىسى ۆلاديمير ۆورسوبين رف مەملەكەتتىك دۋمانىڭ ۆيتسە-سپيكەرى پەتر ولەگوۆيچ تولستويدان سۇحبات الىپتى.
رەۆانشيزم دەرتىمەن ۋلانعان جۋرناليست تە ءھام ۆيتسە-سپيكەر دە: «لۆوۆتىڭ ءتىلى ءبىر بولەك، سۋمانىڭ ءتىلى ءبىر بولەك. تۇتاس ۋكراين ءتىلى دەگەن جوق»، - دەپ ايدى اسپانعا شىعارعان.
سونان سوڭ، قازاق جەرىنە كوز الارتۋىن سۇحباتتارىنىڭ سوڭعى بولىگىنە سارى مايداي ساقتاپتى.
ەندى تولتويدىڭ قازاققا قاراتا ءتىل بەزەي وتتاۋىن وقىرماندارىمىزعا ۇسىنباقپىز:
ۋكراينا تاقىرىبىن تاس قىلىپ جاپقاننان كەيىن، تولستوي قازاقستانعا اۋىز سالدى.
«ۋكراينا تاقىرىبىن جابساق، ونان سوڭ قازاقستانمەن، ارمەنيامەن جانە قازاقستاننىڭ ماڭىنداعى قورشاعان باسقا دا ەلدەرمەن اراداعى پروبلەمالار تۋىندايدى. قازاقستاندا ورىن الىپ جاتقان وقيعالارعا نازار اۋدارساڭىزدار. وندا لاتىن الىپبيىنە كوشۋ تۋرالى، تاۋەلسىزدىك تۋرالى ۇلتتىق ميفولوگيانى قايتا قۇرۋ تۇرعىسىنان دۇنيەنىڭ توڭكەرىلىپ جاتقانىنا كوز جەتكىزەمىز»، - دەپ كولگىرسيدى تولستوي.
ونىڭ ءسوزىن قۋاتتاي، قولپاشتاي سويلەگەن ءتىلشى: «قاي جاعىنان الىپ قاراساڭىزدا مەن قازاقستاندى بىلەمىن. مەن بارلىق تمد-نى جان-جاقتى ارالادىم. بىراق بۇل ادەتتەگىدەي ەمەس پە، ۇلتتىق مەملەكەت قالاي ءپىسىپ-جەتىلەدى»، - دەپ جالعايدى.
ونىڭ ءسوزىن جەرگە تۇسىرمەستەن، الگى بىلدەي دۋمانىڭ ۆيتسە-سپيكەرى پەتر تولستوي:
«مەنىڭ نەگە قارسى ەكەنىمدى ۇعىنىڭىز. ولار: «ساعان قالالارىڭدى ورىستار سالىپ بەرگەن»، دەپ ايتقان پاۆلودارلىق ورىس مۇعاليمانى كەشىرىم سۇراۋعا ماجبۇرلەدى. وندا ولار الماتىنىڭ ءبىزدىڭ كازاكتاردىڭ ۆەرنىي بەكىنىسى ەكەنىن بىلۋگە ءتيىس. تاپ وسى تاريح ۇلتتىق سانا-سەزىم ءۇشىن اسا قاجەت، ال، رەسەيدەن ىرگە اجىراتۋ ءۇشىن تاريحتى ويدان شىعارۋدىڭ كەرەگى جوق.
ەگەر دە سەن بارلىق جەرىڭدى قىتايعا ساتىپ، جەر قازبا بايلىعىنىڭ كىلتىن اعىلشىندارعا ۇستاتساڭ دا، جاقىن كورشىڭمەن تاتۋ-ءتاتتى بولۋعا ءتيىسسىڭ. ەگەر بۇل شەكتەن اتاپ كەتسەڭ بولدى. وندا ۋكراينا قاتەلىگىنە ۇرىناسىڭ.
قۇداي توبەمىزدەن ۇرىپ جەڭىلىپ قالاتىن بولساق، وندا قازاقتار ءبىزدى ارتتارىنا دا قىستىرمايتىن بولادى»، - دەپ ءوز ويىن بۇكپەسىز جايىپ سالۋى كوپ نارسەنى اڭعارتادى.
كوشەدەگى كوك اتتى ەمەس، بىلدەي ءبىر مەملەكەتتىك دۋمانىڭ ۆيتسە-سپيكەرىنىڭ وسىلايشا قازاق تاريحىنا توپىراق شاشا، كوكۋىنە قازاقستان ۇكىمەتى نوتا جولدايدى دەگەن ۇمىتتەمىز.
ەسكەرتۋ: قازىر پەتر تولستويدىڭ بۇل داۋ شاقىرعان سۇحباتى «راديو كومسومولسكايا پراۆدا» سايتىندا اشىلماي تۇر.
الايدا Google ىزدەۋ جۇيەسىندە: «ارميا روسسي دويدەت دو گرانيتس پولشي, ا مى ۆىپەم كوفە نا كرەششاتيكە» دەگەن تاقىرىپپەن سۇحبات سىلتەمەسى كورسەتىلەدى.
دەسە دە ماقالانىڭ قازاقستانعا قاتىستى ايتىلعان ءۇزىندىسى الەۋمەتتىك جەلىلەرگە تاراۋدا:
ءابىل-سەرىك الىاكبار
Abai.kz