تۇركى ەلدەرىنىڭ وكىلدەرى جۋىردا باكۋدە باس قوسىپ، تۇركى ەلدەرىنىڭ لاتىنشاداعى ورتاق ءالىپبيىن كەلىسىپ، بەكىتىپتى. ءالىپبي 34 ارىپتەن تۇرادى.

تۇركى اكادەمياسى تاراتقان اقپاراتتارعا نازار سالساق، «تۇركى الەمىنىڭ ورتاق ءالىپبي» جونىندەگى كوميسسيا 9-11 قىركۇيەكتە باكۋدە ءۇشىنشى رەت باس قوسقان. بۇل كوميسسيا تۇركى مەمدەكەتتەر ۇيىمى شەڭبەرىندە قۇرىلعان.

باسقوسۋدىڭ باستى ماقساتى – ارنايى قۇرىلعان كوميسسيانىڭ ەكى جىلدىق تاجىريبەسىن پايدالانا وتىرىپ، «تۇركى الەمىنىڭ ورتاق ءالىپبيى» جوباسى بويىنشا جۇمىستى اياقتاۋ.

شاراعا قاتىسۋشىلار عالىمدار العاش رەت 1991 جىلى ۇسىنعان لاتىن الىپبيىنە نەگىزدەلگەن ءبىرتۇتاس تۇركى ءالىپبيىنىڭ جوباسىن قاراستىردى.

«كوميسسيا ەگجەي-تەگجەيلى تالقى جاساپ، وسى ءالىپبي جوباسىندا جەتىلدىرۋدى قاجەت ەتەتىن تۇستاردى انىقتادى. وسى تىنىمسىز جۇمىستىڭ ناتيجەسىندە 34 ارىپتەن تۇراتىن ءبىرتۇتاس تۇركى ءالىپبيى تۋرالى ۇسىنىس كەلىسىلدى»، - دەلىنگەن حابارلامادا.

تۇركى ەلدەرىنىڭ ورتاق ءالىپبيىن جاساۋ يدەياسىن تۇركيا پرەزيدەنتى ەردوعان ۇسىنعان ەدى. قر ءتىل ساياساتى كوميتەتىنىڭ توراعاسى ەربول تىلەشوۆتىڭ ايتۋىنشا، ۇسىنىلىپ وتىرعان ءالىپبي لاتىن گرافيكاسىنا كوشۋدى جوسپارلاپ وتىرعان تۇركىتىلدەس حالىقتارعا ۇلگى رەتىندە قاراستىرىلادى.

سونىمەن قاتار، بيىلعى قىستا قازاقستان دا وسى الىپبيگە ەكى قازاق ءارپىن ەنگىزۋدى ۇسىندى.

تۇركى اكادەمياسى تۇركى مەملەكەتتەرى ۇيىمىنىڭ جانىنان قۇرىلعان، تۇركى ەلدەرى مەن ايماقتارى اراسىنداعى عىلىمي جانە ءبىلىم سالاسىنداعى ىنتىماقتاستىقتى دامىتۋعا جاردەمدەسەتىن حالىقارالىق ۇيىم. اكادەميا قۇرامىنا ءتورت مەملەكەت – ازەربايجان، قازاقستان، قىرعىزستان جانە تۇركيا، سونداي-اق ەكى باقىلاۋشى – ۆەنگريا مەن وزبەكستان كىرەدى. ونىڭ باس كەڭسەسى استانا قالاسىندا ورنالاسقان.

Abai.kz