قىرعىزستان ءانۇرانىن وزگەرتپەك. بۇل ارادا ءبىر ايتا كەتەرلىگى - ءانۇراندى وزگەرتۋدى پارلامەنت سپيكەرى نۇرلانبەك شاكيەۆ ۇسىنعان. بۇل ۇسىنىستى قىرعىز پرەزيدەنتى سادىر جاپاروۆ قولداعان.

سونىمەن، شاكيەۆ نە دەيدى، جاپاروۆ نە دەيدى؟

نۋرلانبەك شاكيەۆ, قىرعىزستان پارلامەنتىنىڭ سپيكەرى:

«قازىرگى ءانۇران قىرعىزستان كەڭەس وداعىنان ەندى شىققان كەزدە قابىلدانعان ەكەن، ال قازىر ەل دامۋدىڭ جاڭا كەزەڭىنە قادام باسىپ وتىر. سوندىقتان ءبىز ءانۇراندى وزگەرتۋمىز كەرەك. ول بۇكىل حالىق بىردەي ورىندايتىنداي بولۋعا ءتيىس»، – دەدى.

سادىر جاپاروۆ, قىرعىزستان پرەزيدەنتى:

«ءانۇراندى جاڭارتقاندا تۇرعان نە بار؟ قازىرگىسى وسىدان 33 جىل بۇرىن، ەڭ العاش تاۋەلسىزدىك العان كەزدە جازىلعان. ءبىز مەملەكەت رەتىندە تولىعىمەن قالىپتاستىق. الەمگە تانىلدىق. 100 جىل وتسە دە، قالاي ازات، تاۋەلسىزدىككە جەتكەنىمىزدى جىرلاي بەرەمىز بە؟ نەگە ءبىز حالقىمىزدىڭ بەس مىڭ جىلدىق تاريحى بار ەكەنىن بولاشاق ۇرپاققا ارناپ انۇران جازبايمىز؟ ارينە، قازىرگى انۇران دا ۇمىتىلمايدى. ول تاريحتا رەسپۋبليكامىزدىڭ تۇڭعىش انۇرانى رەتىندە قالادى»، – دەدى.

ءارى قاراي: «ءانۇراندى ەرتەڭ وزگەرتە سالايىق دەپ جاتقان ەشكىم جوق. ءانۇراندى شىعارماشىل ادامدار، اقىندار مەن كومپوزيتورلار دايىنداپ، ەلگە ۇسىنسىن. كوپشىلىك قولداپ جاتسا، جاڭا ءانۇران رەتىندە قابىل الىناتىن بولادى.

ءانۇرانىمىزدى وقۋشى بالالاردان اقساقالدارعا دەيىن شىرقاپ تۇرسا جاقسى ەمەس پە؟ كەرەك بولسا، توي-كونتسەرتتەردە ايتىلىپ تۇرسا نەسى جامان؟  انۇراننىڭ مازمۇنى – مەملەكەتىمىزدى بيىككە، ازاماتتارىمىزدى وتانشىلدىققا، بىرلىك پەن ىنتىماققا شاقىرىپ تۇرۋى قاجەت. تاۋەلسىزدىگىمىزدى عاسىردان-عاسىرعا ساقتاپ قالايىق دەگەن ۇراندى سوزدەر بولۋى كەرەك.

قىتايدىڭ ارحيۆتەرىندە 5 مىڭ جىلدىق تاريحىمىز قاتتالىپ جاتقانىن دالەلدەدىك. قازىر ءبىزدىڭ تاريحشىلارىمىز سول ارحيۆتەردى اقتارىپ-توڭكەرىپ، قىرعىز تاريحىن تۇگەندەپ جاتىر»، – دەيدى سادىر جاپاروۆ.

قىرعىز اعايىنداردىڭ ءانۇرانىن وزگەرتەمىز دەۋى ەش جاڭالىق ەمەس. تاپ وسى قادامعا بۇعان دەيىن ءبىزدىڭ ەلىمىزدە بارعان-تىن. قازاقستان ءانۇرانى سوڭعى رەت 2006 جىلى وزگەرتىلگەن. كەڭەس وداعى كەزىندە ءانىن ءشامشى قالداياقوۆ، ءسوزىن جۇمەكەن ناجىمەدەنوۆ جازعان «مەنىڭ قازاقستانىم» ءانىنىڭ ءسوزىن بۇرىنعى پرەزيدەنت نۇرسۇلتان نازارباەۆ وزگەرتىپ، اۆتور رەتىندە قوسىلىپ، جاڭا ءانۇران دەپ جاريا ەتكەنى كۇنى كەشە عانا ەدى. ەندى باستان وتكەن جولعا قىرعىز باۋىرلاردا تۇسكەلى وتىر.

Abai.kz