29 قازاندا ۇكىمەت ۇيىندە پرەمەر-مينيستر ولجاس بەكتەنوۆتىڭ توراعالىعىمەن قازاقستان ۇكىمەتىنىڭ وتىرىسى وتكەن ەدى. جيىندا ونەركاسىپتى دامىتۋدىڭ باسىم باعىتتارى ايتىلدى.

ماشينا جاساۋدى دامىتۋ ماسەلەلەرى قارالدى. سالاداعى احۋال تۋرالى ونەركاسىپ جانە قۇرىلىس ءمينيسترى قانات شارلاپاەۆ باياندادى، سالالىق قاۋىمداستىقتاردىڭ وكىلدەرى – ماشينا جاساۋشىلار وداعىنىڭ توراعاسى مەيرام پىشەمباەۆ پەن ونەركاسىپتىك ينۆەستورلار وداعىنىڭ پرەزيدەنتى قايرات ەلامانوۆ، قازاقستاننىڭ اۆتوكولىك وداعىنىڭ پرەزيدەنتى انار ماقاشەۆا بايانداما جاسادى.

ونەركاسىپ جانە قۇرىلىس ءمينيسترى قانات شارلاپاەۆ بۇگىندە وڭدەۋ ونەركاسىبى ءوز كولەمى بويىنشا ءوندىرۋشى ونەركاسىپتى قۋىپ جەتكەنىن جانە ءوسىمدى جالعاستىرىپ جاتقانىن ايتتى. بۇل رەتتە جەتەكشى ورىنداردىڭ ءبىرىن ماشينا جاساۋ سالاسى الادى – 20%. وعان 4 مىڭعا جۋىق كومپانيا جۇمىلدىرىلعان، 120 مىڭنان استام ادام جۇمىسپەن قامتىلعان.

قازاقستان ماشينا جاساۋشىلار وداعىنىڭ توراعاسى مەيرام پىشەمباەۆ ۇكىمەت وتىرىسىندا سالانى دامىتۋ 7 نەگىزگى باعىت بويىنشا 79 ءىس-شارانى قامتيتىن 2024-2028 جىلدارعا ارنالعان بەكىتىلگەن كەشەندى جوسپارعا سايكەس جۇرگىزىلىپ جاتقانىن اتاپ ءوتتى. ول بويىنشا 5 جىل ىشىندە «ونەركاسىپتى دامىتۋ قورى» اق جاڭا وندىرىستەردى قۇرۋعا جانە جۇمىس ىستەپ تۇرعاندارىن جاڭعىرتۋعا 600 ملرد تەڭگە كولەمىندە، «دامۋ» اق 50 ملرد تەڭگەگە قارجىلاندىرۋ كوزدەلگەن، بۇل شوب-تى كوممەرتسيالىق بانكتەرمەن شامامەن 370 ملرد تەڭگە سوماعا قارجىلاندىرۋعا مۇمكىندىك بەرەدى.

ۇكىمەت وتىرىسىندا اۆتوموبيل جاساۋ سالاسىنىڭ دامۋى تۋرالى قازاقستاننىڭ اۆتوكولىك وداعىنىڭ پرەزيدەنتى انار ماقاشەۆا باياندادى. وتاندىق اۆتوونەركاسىپ بۇگىندە كولىك قۇرالدارىن شىعاراتىن سەگىز كاسىپورىننان تۇرادى. 2024 جىلدىڭ 9 ايىندا قازاقستاندا 91 مىڭ بىرلىك اۆتوكولىك قۇرالدارى ءوندىرىلدى.

ونەركاسىپتىك ينۆەستورلار وداعىنىڭ پرەزيدەنتى قايرات ەلامانوۆ پرەمەر-مينيسترگە اۋىل شارۋاشىلىعى تەحنيكاسى ءوندىرىسىنىڭ جىلدىق كولەمىنىڭ ءوسۋى تۋرالى حابارلادى. بۇگىندە ول 263 ملرد تەڭگەنى قۇرايدى. 2025 جىلى 300 ملرد تەڭگەگە دەيىن ءوسىم بولجانۋدا. اۋىل شارۋاشىلىعى ماشينالارىن جاساۋ سالاسىندا فەرمەرلەردىڭ جىل سايىنعى قاجەتتىلىگىن تولىق قامتاماسىز ەتەتىن 8 كاسىپورىندا تراكتورلار مەن استىق جينايتىن كومبايندار شىعارىلادى.

ۇكىمەت باسشىسى پرەزيدەنتتىڭ ەكونوميكانى ءارتاراپتاندىرۋ جونىندەگى العا قويعان ماقساتتارىنا قول جەتكىزۋ ءۇشىن وتاندىق ماشينا جاساۋ الەۋەتىن بەلسەندى پايدالانۋ جانە جاڭا تەحنولوگيالاردى ەنگىزۋ قاجەتتىگىن اتاپ ءوتتى. سونداي-اق، روبوتتاندىرۋ مەن وندىرىستىك تسيكلداردى اۆتوماتتاندىرۋدىڭ جاھاندىق تەندەنتسيالارىنا سايكەس كاسىپورىنداردا تسيفرلىق تەحنولوگيالاردى ەنگىزۋ ماڭىزدى.

پرەمەر-مينيستر ونەركاسىپ، قارجى، ۇلتتىق ەكونوميكا مينيسترلىكتەرىنە جانە «بايتەرەك» حولدينگىنە ماقۇلدانعان قارجى-ەكونوميكالىق نەگىزدەمەلەر شەڭبەرىندە ماشينا جاساۋداعى جوبالاردى قوسىمشا قارجىلاندىرۋدى قامتاماسىز ەتۋدى تاپسىردى. ولجاس بەكتەنوۆ ماشينا جاساۋ كاسىپورىندارى نەگىزگى قورلاردى جاڭارتۋ جانە تاۋارلاردىڭ جاڭا تۇرلەرىن ءوندىرۋدى باستاۋ ءۇشىن جەڭىلدىكتى مولشەرلەمەمەن كرەديتتەرمەن قامتاماسىز ەتىلۋى ءتيىس ەكەنىن اتاپ ءوتتى.

ىشكى وندىرۋشىلەردى قولداۋ ءۇشىن ولجاس بەكتەنوۆ ونەركاسىپ جانە قارجى مينيسترلىكتەرىنە مەردىگەرلەردىڭ جۇمىستار مەن قىزمەتتەردەگى وتاندىق ۇلەس بويىنشا تالاپتاردى ورىنداۋىن باقىلاۋدى كۇشەيتۋدى تاپسىردى. بۇگىنگى تاڭدا مەملەكەتتىك ساتىپ الۋلاردان بىرقاتار ماشينا جاساۋ تاۋارلارىن العانىنا قاراماستان، ساتىپ الۋ تىزىمىندە جاسىرىلعان يمپورتتىق ءونىمدى ساتىپ الۋ فاكتىلەرى تىركەلۋدە.

Abai.kz