«2023 جىلدان باستاپ 1 كاتەگورياداعى 9 ءىرى مۇناي كومپانياسى زيانداۋشى كوزدەرگە اۆتوماتتاندىرىلعان مونيتورينگ جۇيەسىن ورنالاستىرۋ قاجەت ەدى. الايدا، بۇگىنگى تاڭدا تەك 5 كومپانيا ونداي جابدىقتى تولىق ىسكە قوستى. ەكەۋىندە قوسۋ جۇمىستارى ءجۇرىپ جاتىر، ەكەۋى ءالى ىسكە قوسقان جوق. اتاپ ايتساق «پەترو كازاحستان ويل پروداكتس» جشس، «سنپس-اقتوبەمۇنايگاز» اق-نىڭ جاناجول مۇنايگاز وڭدەۋ كەشەنى»، — دەدى ول.

دەپۋتات ەكولوگيا جانە تابيعي رەسۋرستار مينيسترلىگى اۆتوماتتاندىرىلعان مونيتورينگ جۇيەسىن ورناتپاعان كاسىپورىندارعا پارمەندى شارالاردى قابىلداۋ كەرەك دەپ ەسەپتەدى.

«سوڭعى كەزدە كاسپي تەڭىزىندە بولىپ جاتقان ەكولوگيالىق جاعدايلار قوعامدا ءار ءتۇرلى سۇراقتار تۋعىزىپ وتىر. اسەرەسە يت بالىقتاردىڭ نەدەن ءولىپ جاتقانىن ناقتى ەشكىم ايتا الماي وتىر. جالپى ەلىمىزدەگى بارلىق كاسىپورىندار ەكولوگيالىق مونيتورينگتى وزدەرى جۇرگىزىپ وتىر. سوندىقتان ولاردىڭ مالىمەتىنىڭ شىنايلىعى كۇماندى. «كىم اقشا تولەيدى، سول مۋزىكاعا تاپسىرىس بەرەدى جانە ونى تاڭداتادى»، — دەگەن اڭگىمە بار عوي. قازىرگى جاعداي وسىعان ۇقساس»، — دەدى ەدىل جاڭبىرشين.

دەپۋتاتتىڭ سوزىنشە، ەكولوگيا مينيسترلىگىندە سۋ ايدىندارىن زەرتتەيتىن ارنايى جابدىقتالعان كەمە دە جوق.

«كاسپي تەڭىزىندەگى كەن ورىنداردىڭ اينالاسىنا قورشاعان ورتانىڭ جاعدايىن ونلاين رەجيمدە قۇزىرلى ورگانعا بەرىپ وتىراتىن اۆتوماتتاندىرىلعان ستاتسيونارلىق ستانتسيالاردى ورناتاتىن ۋاقىت كەلدى. مۇنداي ستاتسيونارلىق قوندىرعىلار جەردە دە ورناتىلۋى كەرەك. سوندا ەشقانداي داۋ تۋمايدى. كىم ءبۇلدىردى، ايىپپۇل تولەيدى»، — دەدى ءماجىلىس دەپۋتاتى.