ەلىمىزدە 2027 جىلعا دەيىن 180-گە جۋىق مەكتەپ سالۋ جوسپارلانعان. بۇل تۋرالى  پرەمەر-ءمينيسترى ولجاس بەكتەنوۆ ايتتى.

ۇكىمەت باسشىسى قازىر اۋىل مەكتەبى – تەك ءبىلىم ورداسى عانا ەمەس، جەرگىلىكتى حالىق ءۇشىن مادەنيەت وشاعىنا، رۋحاني ورتالىققا اينالعانىن، مەملەكەت باسشىسى اۋىل مەكتەپتەرىن دامىتۋعا ەرەكشە كوڭىل ءبولىپ وتىرعانىن اتاپ ءوتتى.

بيىل «جايلى مەكتەپ» ۇلتتىق جوباسىن قوسا العاندا، اۋىلداردا 42 مەكتەپ پايدالانۋعا بەرىلدى.

«سوڭعى ءۇش جىلدا اۋىلداردا 2,5 مىڭعا جۋىق مەكتەپ جاڭعىرتىلدى. وقىتۋ جاعدايلارىن جاقسارتۋ جانە جايلى ورتا قۇرۋ ماقساتىندا 800-دەن استام مەكتەپتى قايتا جاڭارتۋ جۇمىسى جۇرگىزىلىپ جاتىر. سونداي-اق اۋىل مەكتەپتەرى ءۇشىن 4 مىڭنان استام پاندىك كابينەت ساتىپ الىندى. وقۋ-اعارتۋ مينيسترلىگى جىل سوڭىنا دەيىن وڭىرلەرگە مەكتەپتەردى قايتا جاڭارتۋدىڭ بىرىڭعاي تالاپتارىن ۇسىنۋى كەرەك. وندا ءبىلىم وشاقتارىن كۇردەلى جوندەۋ عانا ەمەس، پاندىك سىنىپتارمەن جابدىقتاۋ ماسەلەسى دە قارالۋعا ءتيىس»، - دەدى و.بەكتەنوۆ ۇكىمەت وتىرىسىندا.

اۋىلعا بىلىكتى پەداگوگتەردى تارتۋ ماقساتىندا لاۋازىمدىق جالاقىعا 25% مولشەرىندە قوسىمشا اقى كوزدەلگەن.

سونداي-اق، «ديپلوممەن اۋىلعا» باعدارلاماسى شەڭبەرىندە پەداگوگتەرگە كوتەرمە جاردەماقى تولەنەدى، سونداي-اق تۇرعىن ءۇي ساتىپ الۋعا نەمەسە سالۋعا ءتيىمدى نەسيەلەر بەرىلەدى.

ايتا كەتەيىك، ەلىمىزدەگى 8 مىڭعا جۋىق مەكتەپتىڭ 67% نەمەسە 5247-ءسى – اۋىل مەكتەبى. وقۋشىلاردىڭ 40% اۋىل مەكتەبىندە ءبىلىم الادى.

Abai.kz